Aktuashon di nos futbolistanan den eksterior
E hóben periodista i analista deportivo Carl Ruiter tur siman ta relatá aktuashon, detaye i análisis di nos futbolistanan of mihó bisa futbolistanan di famia Kurasoleño i Antiano den ekterior. Carl ta redaktor deportivo i presentado di e programa di Deporte ‘Deporte Hoyer’. Tambe Carl ta produktor di programanan di deporte na TV Direct. Awe, 30 di novèmber 2020 nos tin aktuashon di e futbolistanan di wikènt pasá.
[NOS FUTBOLISTANAN]:
Otro fin di siman kaminda vários di nos futbolistanan a destaká.
DJABIÈRNÈ
▪︎Patrick Van Aanholt a hunga wega kompletu den e derota di su ekipo di Crystal Palace na man di Newcastle United. Esaki tabata Patrick su di 5 wega e temporada aki den Premier League.
▪︎ Den Bundesliga (promé divishon na Alemania) Tahith Chong a hunga e último 18 minütnan den e derota di su ekipo Werder Bremen.
▪︎ Vurnon Anita un biaha mas tabata titular pa RKC Waalwijk. Nan a gana di Twente ku skor di 2 pa 0 den wega bálido pa Eredivisie.
▪︎ Otro di nos futbolistanan ku tabata den akshon pa RKC Waalwijk tabata Jurien Gaari. Gaari a hunga e ultimo 7 minütnan di e wega kontra Twente.
▪︎ Jarchinio Antonia a hunga 54 minüt den e viktoria di su ekipo Cambuur. Nan a gana di FC den Bosch ku skor di 3 pa 1 den wega bálido pa di dos divishon na Hulanda.
▪︎Kevin Felida ounke ku ta den kousa perdí a bria atrobe ku su di dos gol di temporada pa FC Den Bosch.
▪︎ Jearl Margaritha tabata riba banki pa Almere City. Lástimamente Jearl no a subi den e wega ku a kaba na un empate na 2 entre Volendam i Almere. Almere ta empatá ku Cambuur na promé luga den di dos divishon na Hulanda (Cambuur tin un wega ménos hungá)
▪︎ Nigel Thomas a sali den e promé 11 pa Jong PSV. El a hunga 63 minüt den nan derota di 1 pa 0 na man di Helmond Sport.
▪︎ Shurandy Sambo i Jeremy Antonisse tur dos keda riba banki pa Jong PSV den e wega aki.
▪︎ Brandley Kuwas ku un karchi hel den viktoria di su ekipo di Al Nasr den promé divishon di Emiratonan Arabe. Brandley tin
1 gol i 1 pase di gol den 7 wega e temporada aki pa Al Nasr.
▪︎ Gino van Kessel a hunga 5 minüt pa su ekipo di Olympiakos Nicosia na Chipre. Olympiakos Nicosia ta na di 4 lugá den promé divishon na Chipre.
▪︎ Darryl Lachman a debutá ofisialmente pa Perth Glory den e AFC Champions League (Champions League Asiatikó). El a hunga 63 minüt den nan derota di 2 pa 0 na man di Ulsan Hyundia.
DJASABRA
▪︎ Lentini Caciano tabata riba banki pa e derota di su ekipo di FC Emmen. Ajax a gana di FC Emmen ku skor di 5 pa 0.
▪︎ Sherel Floranus un biaha mas tabata e rèksbèk titular pa SC Heerenveen. El a kompletá 93% di su pasenan durante e 90 minüt. SC Heerenveen a empatá na 1 ku Ado Den Haag.
▪︎ Jafar Arias ta keda un di nos hungadonan den mihó forma. Jafar a hinka su di 3 gol di temporada pa VVV- Venlo den e empate na 3 kontra PEC Zwolle. Último 3 weganan pa VVV- Venlo, Jafar a kuminsá tur komo titular i a hinka 2 gol.
▪︎ Sontje Hansen un biaha mas tabata titular pa Jong Ajax. Nan a pèrdè ku skor di 3 pa 1 kontra FC Dordrecht den wega bálido pa di dos divishon hulandes.
▪︎ Ar'jany Martha a subi na inisio di e di dos mitar pa Jong Ajax. Ar'jany, di 17 aña , ta un atakante ku tin 5 wega hungá e temporada aki pa Jong Ajax. Ar'jany a hunga pa algun selekshon hubenil hulandes kaba den su karera.
▪︎Leandro Bacuna un biaha mas komo rèksbèk pa Cardiff City. Bacuna i su ekipo a gana fasil di Luton ku skor di 4 pa 0 den Championship
▪︎ Juninho Bacuna manera su ruman a inisia na rèksbèk. Juninho i su ekipo di Huddersfield Town tambe a gana. Nan a gana di Middlesbrough ku skor di 3 pa 2 den wega bálido pa Championship (di dos divishon na Inglatera).
▪︎ Rigino Cicilia a hunga 19 minüt pa su ekipo di Slovacko den nan viktoria di 3 pa 1 kontra Opava den un wega bálido pa promé divishon di Republika Cheko.
▪︎ Gevaro Nepomuceno tabata titular pa FC Halifax Town den nan derota di 1 pa 0 kontra
Sutton United. Gevaro e aña aki den National League (di sinku divishon na Inglatera) tin 7 wega hungá.
DJADUMINGU
▪︎ Luthsharel Geertruida un biaha mas ku gol.
El a hunga rèksbèk den e empate na 1 di su ekipo di Feyenoord kontra FC Utrecht. Su gol, di 3 di temporada, tabata pa empatá e wega pa Feyenoord.
▪︎ Jeremy Cijntje a hunga 16 minüt den e derota di su ekipo di Heracles Almelo na man di AZ Alkmaar. Esaki tabata e promé wega pa Jeremy for di 7 di novèmber.
▪︎ Kenji Gorré ku 26 minüt pa Nacional. Den e wega bálido pa Primeira Liga (promé divishon na Portugal) Nacional ta pèrdè kontra Portimonense ku skor di 1 pa 0.
▪︎ Charlison Benschop a hunga e promé 45 minütnan pa Appollon Limassol den e den e derota di 2 pa 1 na man di AEL Limassol. Benschop tin 5 gol i ta entre e lidernan di gol na Chipre e temporada aki.
▪︎ Anthony van den Hurk ku karchi hel na Suesia. Van den Hurk su ekipo di Helsinborg a empatá na 0 kontra Falkenbergs FF.
▪︎ Richairo Zvikovic ku 2 gol pa Guanzhou R&F den wega bálido pa Kopa Chines. Richairo tin 3 gol den su regreso den futbòl chines.
▪︎ Quenten Martinus a hunga 78 minüt den e derota di Urawa Red Diamonds. Quenten i su ekipo a kai 4 pa 0 kontra Kashima Antlers den wega di promé divishon na Hapon.
▪︎ Eloy Room a pèrdè e semi final di Eastern Conference di MLS pa motibu ku e la tèst positivo pa Covid -19. Columbus Crew asina no por a konta ku nan gran kiper pa e wega aki.
