Homenahe na rumannan Vanchi i Riley Toppenberg i Donny Balentina den Liga 60
WILLEMSTAD – Djadumingu 31 di mei direktiva di Liga 60 a honra 3 baluarte di Sòftbòl Veterano na Frank Curiel Ballpark. A honra Giovanni ‘Vanchi’ Toppenberg, Riley Toppenberg i Donald ‘Donny’ Balentina den presensia di nan famia. E seremonia a start kaminda maestro di seremonia ta hasi e introdukshon dor di pidi representantenan (5) di e 9 ekiponan partisipante pa subi tereno i forma un mitar sirkulo den infield.
Despues e 3 baluartenan na kende e kampionato ta wòrdu dediká, Donald Balentina, Giovanni Toppenberg i Riley Toppenberg ta wòrdu invitá pa a subi tereno. Direktiva di e Asosiashon 60 Sòftbòl tambe a subi tereno huntu ku e baluartenan. Despues a sigi orashon di Pastor Santiago, himno di Kòrsou i despues maestro di seremonia Jeffrey Martina ta yama e baluartenan unu pa unu dilanti i lesa nan biografia pa después entregá plakat na baluartenan dor di Presidente Sr. Urvin Martina i un bouquet di flor na señora òf un miembro di e famia dor di sra. Lutania Visers. Tur baluarte a dirigí palabra despues ku nan a risibí e plakat. E baluartenan a lansa promé bala, risibí felisitashon i después a sigi e wega entre Curacao Super Stars i Jaws.
Resultado di weganan
Pitufos 5, Los Amigos 4
E wega aki a keda empatá i despues a tira lòt i Pitufos a gana e wega 5-4.
Jaws 13, Curacao Super Stars 0
Riley Toppenberg tabata e picher ganadó pa Jaws i Gilbert Juliet a bati di 3-2. Marvin Wijman di 1-1.
Nos Tambe Por 9, Nos Power 0
Sharlon Hanst tabata picher ganadó i vários batiadó a bati di 2-1.
MAS INFORMASHON DI SÒFTBÒO I BEISBÒL
Fanátikonan di Deporte Kòrsou, bon dia i felis wikènt. Awe, naturalmente, ta futbòl, futbòl, futbòl. Nos selekshon di futbòl lo hunga su último wega amistoso i ta rumbo pa USA pa topa Alemania den nos promé wega den historia di Mundial. Stadion Ergilio Hato lo ta de bote en bote mayan pa e wega kontra di Aruba. Fanátiko, yega stadion pa apoyá nos ekipo ku e sosten moral. Nos a kai den un pul fèrfelu, pero no imposibel pa klasifiká, ánke ta den e mihó number 3 di e pulnan. E bala ta rondó i tur kos por pasa, i kada wega ta un wega.
* * * * *
Pa loke ta Slowpitch, weganan di Liga 50 ta sigi djasabra na Van Engelen Ballpark ku 4 wega. E wega kayente, naturalmente, ta e wega di 12’or entre Baranka i Jaws. Ekipo Jaws a gana Baranka dos biaha den e temporada regular aña pasá, pero den play-off Baranka a dal Jaws dos biaha i pasa pa final. Den Liga 50, ekiponan lo hunga 13 wega atrobe, manera tabata e kaso den 2025. Promé ku esei, ekiponan di e liga tabata hunga 18 wega i na vários okashon tabatin weganan final ku a tuma lugá den desèmber.
* * * * *
Awe nos tin reportahe di apertura ofisial di Liga 60 ku a tuma lugá djadumingu 31 di mei na Frank Curiel Ballpark. A honra Donny Balentina i rumannan Toppenberg den kompania di nan famia. Un seremonia impreshonante kaminda a pasa riba karera di kada un di e hungadónan menshoná. Nan a risibí plakat i nan kasa/yunan a risibí búket di flor serka direktiva di Liga 60. Despues e baluartenan a tira promé bala, sigi pa e skema di dia, esta weganan di 1’or i 3’or. Nos tin e resultado di e weganan ku a tuma lugá djadumingu den nos edishon di awe.
* * * * *
Jersey Isenia, konosido artista ku ta bèk na Kòrsou, ta organisá un ‘song festival’ di hungadónan di Slowpitch. E festival lo tuma lugá dia 9 di yüli 2026 na Klup Di Shell. Pa otro siman, e partisipantenan lo ranka lòt. E partisipantenan ta: 1. Arthur Bonevacia (Treasure), Gladwin Lacrus (Nos Power 60+), Edmar Cornelia (Baranka 50), Jertiza Wawoe (Unidos Damas), Suyen Otto Apostel (Treasure Damas), Sharlenda Walle (Eureka), Marlon Elisabeth (Umpire), Arnaldo Angila (Jaws 60), Rubineck Matilda (SDKK), Broertje Curie (Jaws 60), Pedro Austriano (Curacao Super Stars), Suryli Ipcedencia (SDKK Damas), Dudley Penso (Lions 60+), Edwina Janse (Eks Rising Trotters), Olinda Laurencia (Golden Girls), Siegfried Lopez (Baranka 60+). Segun dianan ta bai, nos lo tin mas detaye di e songfestival aki organisá pa Jersey Isenia.
* * * * *
Nos tin skema di weganan di wikènt tantu di Liga 50 komo Liga 60. Liga 50 ta sigi na Van Engelen Ballpark djasabra 6 di yüni ku e siguiente weganan: 10.00 Lions – Flamboyan, 12.00 Jaws – Baranka, 14.00 Artemisia – Ban Serio, 16.00 Sluggers – Jandoret Raiders. Barwacht ta na enkargo di Pitufos i Marlins ta liber. Pa loke ta Liga 60, lo tin 3 wega djadumingu 7 di yüni na Frank Curiel Ballpark: 11.00 Jaws – Pitufos, 13.00 Curacao Super Stars – Lions, 15.00 Baranka – Mon Repos Sluggers. Nos Power tin barwacht. Nos Tambe Por i Los Amigos ta liber. E skema di Liga 60 ta kompletu, esta un buelta i mei kaminda tur ekipo ta hunga 12 wega. Ekiponan ta 9 i lo topa 4 ekipo na dos okashon. Dianan liber kaminda lo no tin wega ta 14 di yüni, 21 di yüni, 5 di yüli i 4 di òktòber.'
* * * * *
Djamars Royal Scorpions a kibra invikto di Santa Maria Pirates den Beisbòl Dòbel A. Royal Scorpions a gana relatívamente fásil ku skòr di 6 pa 2. Miguel Angel Vilchez i Kevin Kelly a tira bon pa Royal Scorpions gana e wega. Djarason, Santa Rosa Indians a gana di Wild Cats ku skor di 6-4. Ayera mester tabatin wega entre Wild Cats i Santa Rosa Indians. Nos ta bai drenta temporada hòt di Little League kaminda lo tin Senior League Sòftbòl di 17 pa 23 di yüni aki den Stadion Post 6 na Kòrsou. Ta despues di 20 aña ku tin un kampionato regional na Kòrsou. Nos muchanan di Little League Sòftbòl lo ta na Puerto Rico di 5 pa 12 di yüli na Guánica. Beisbòl Senior League Karibe ta na Kòrsou di 28 di yüni pa 5 di yüli. Nos ta keda te akí pa awe i te mayan ku Poder di Dios.
