AKUERDO ENTRE FEDERASHON DI BEISBÒL KÒRSOU I USTUDY SPORTS
Riba 1 di sèptèmber, FEBEKO, e Federashon Nashonal di Beisbòl Kòrsou, i UStudy Sport a drenta un akuerdo úniko pa brinda tur hungadó hóben e oportunidat pa sigui desaroyá riba e tereno di beisbòl na Merka, miéntras nan ta sigui nan estudio. E akuerdo aki ta enserá ku UStudy lo bira un partner integral den desaroyo i promoshon, i lo proveé oportunidat i eksperensia, pa pèrmití hungadónan individual di rònt Kòrsou maksimalisá nan potenshal pa bira lidernan den wega di beisbòl miéntras nan ta keda ku bista pa nan desaroyo personal. Esaki ta akapará posibilidatnan pa ku e tim nashonal te ku inisiativanan di kampamentu lokal i diferente showcase. UStudy ta ofresé hungadónan konseho, ta proveé ekspertisio i ta halsa e nivel di amatùr i profeshonal di beisbòl na Merka. Meta di e Federashon ta pa krea i desaroyá programanan di desaroyo ekstenso pa studiantenan atleta i pa enkurashá tur hungadó na e isla pa hasi uso di e akuerdo.
Kualke hungado na Kòrsou ku ke sa ki posibilidatnan e tin na Merka i ku ke apliká pa e programa “Go USA Get Recruited’ mester manda video i puntuashon (stats) pa UStudy. Despues di esei e hungadó lo risibí un lista di ‘coach’ na Merka ku lo drenta den kontakto kuné pa deliberá tokante di un puesto den nan tim. E Federashon di Beisbòl di Kòrsou lo brinda rekomendashon i su propio vishon na e hungadó pa lokual ta trata e opshon mas adekuá. E kostonan pa partisipá na e programa ta 750 euro inkluso impuesto. Si e hungadó ta deseá, UStudy por sostené ku e siguiente stapnan tambe, manera asistí ku aplikashon pa skol na Merka, regla visa, ets. Hungadónan Kurasoleño ku ta forma parti di e programa aki lo risibí tambe un deskuento riba e pakete di sostén aki.
Un otro programa di UStudy ku por benefisiá algun di e hungadónan lokal ta e PIE Academy ku ta proveé edukashon Merikano onlain ku guia i sosten personal. Via di e Pie Academy hungadónan por optené un diploma di skol sekundario òf diploma universitario miéntras nan ta hunga beisbòl na nivel profeshonall na Merka òf tambe por halsa nan puntuashon (GPA) pa bira elegibel pa NCAA Academic, den kaso esaki ta nesesario.
E akuerdo úniko aki ta riba e mesun liña ku Korpodeko su plannan, pa sigui ku e desaroyo i profeshonalismo di hungadonan hóben, i sostené nan den nan ambishon pa realisá nan soño Merikano. Kolaborando ku UStudy, e federashon por proveé hungadonan i mayornan informashon di ekspertisio tokante di diferente oportunidatnan di beisbòl i akadémiko na Merka, opshonnan pa finansiamentu, posibilidatnan pa ta eligibel pa NCAA/NAIA/NJCAA, ets. Pa e motibu ei e Fedrashon di Beisbòl Kòrsou lo ofresé su propio programa di desaroyo internashonal, un oportunidat úniko den e region di Caribe.
Jedrek Magdalena, presidente di e federashon nashonal, ta sumamente honrá ku e akuerdo aki: “Awor nos por ofresé tur hungadó yu di Kòrsou mas oportunidat pa un karera dual fruktífero, esta tantu den beisbòl komo na skol na Merka. Ustudy Sport ta eksitoso den dunamentu di konseho i akomodá hóbennan na Merka pa mas ku 16 aña kaba. Ku nan konosementu, eksperensia i ret di kontakto vasto na Merka nan por ta di sirbishi pa tur hungadó hóben.”
E akuerdo inisial tin un durashon di 3 aña. UStudy lo ofresé informashon regular via di webinar spesialmente pa hungadónan i mayornan na Kòrsou. Koperashon riba otro áreanan tambe ta den deliberashon, manera partisipashon ku un tim dediká di UStudy na un showcase i torneo na Merka.
Si bo ta deseá mas informashon òf ke apliká pa e programa Go USA Get Recruited Program, por fabor tuma kontakto ku Marina Meijer, direktor na UStudy. Email: marina@ustudy.nl, Telefòn +1 778 723 2973, WhatsApp +31 6 1416 2972.
Pa mas informashon tokante di Federashon di Beisbòl Kòrsou bishitá: http://baseballcuracao.com
Pa mas informashon tokante di UStudy Sports bishitá https://www.ustudysports.world
Pa mas informashon tokante di PIE Academy bishitá https://www.pieacademy.org/pre-college-courses
***
