Amstel Bright Premier Cup a terminá djadumingu
WILLEMSTAD- Amstel Bright Premier Cup 2024 a terminá djadumingu 10 di mart na Van Engelen Ballpark. Ekiponan Jaws (60+), Jandoret Raiders (50+), Bombers (40+),Brandweer (Soshal Maskulino), Chonchi’s (Soshal Open) i COED (Open), ADC kampion (Coed Corporate).
.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bonnochi i felis siman. Amstel Bright Premier Cup a yega na final di su ekistoso torneo djadumingu 10 di mart. Un torneo kargá ku ambiente i ta solamente un protesta a kai na momentu ku Aqualectra a gana di Keyfin. Djabièrnè Keyfin a gana di Aqualectra ku skor di 8 pa 3 pa despues pèrdè pa medio di protesta ku Aqualectra a fail. Despues Aqualectra a sigi den play-off i a logra gana di MCB ku skor di 18-8. Den final Soshal Maskulino Aqualectra a kai vensí kontra di Brandweer. Tremendo ambiente djasabra i djadumingu tabata weganan di final. Despues nos lo tin resultadonan final.
• * * * * *
Un ratu pa Beisbòl Veterano, bastante kambio na kaminda pa temporada 2024. Parse ku ekipo The Friends a manda un mensage pa direktiva di Beisbòl Veterano Kòrsou (BEVEKO) pa anunsiá ku nan lo no partisipá mas na kampionato 2024. E ekipo mester a bini ku hungadónan di Marchena Stars i Vosama pa kampionato BEVEKO 2024. Manera ta konosí tantu Marchena i Vosama ku a partisipá na kampionato 2023 no tei mas den Beisbòl Veterano. Dirigentenan Cedrix Valies i Aldrin ‘Yoyo’ Crispina a forma e ekipo The Friends pa partisipá den BEVEKO 2024, pero ya Beisbòl Veterano lo tin 11 ekipo e aña aki. Flamingo bou di direkshon di Pedro Hernandes si tei figo pa kampionato 2024.
• * * * * *
Tin rumor ku un grandi di Quality Stars lo move bèk pa Santa Maria. Di otro banda Santa Maria a pèrdè vários hungadó entre otro Dave Kirindongo ku tabata playing manager i Dwight Alexander ku ta outfielder. Dos hungadó mas tabata pendiente pa move pero nan a wanta un ratu pa wak kiko ta bai pasa. Parse ku un ekipo lo bini ku algun proposishon entre otro pa laga hungadó di 39 aña ku ta kumpli 40 aña den 2024 kuminsá hunga for di momentu ku temporada start. BEVEKO ta pidi ekiponan pa bini ku un baluarte pa dediká kampionato 2024 na su persona. Reunion general ta programá pa tuma lugá djabièrnè 22 di mart na Landhuis Salinja.
• * * * * * *
Siman pasá nos tabatin algun rekomendashon di Sidney ‘Pipi’ Pieter pa loke ta trata Sóftbòl Slowpitch Veterano i awe nos tin mas. Ta rekomendashon- i proposishonan pa un mihó kampionato epseshalmente di e liganan pa e peloteronan di mas edat. Pipi Pieter: “Otro regla ku mester tene kuenta ku ne, ta esun di ‘special runner’. Durante un wega algun aña atras, entre Nos Power i Lions, Lions a usa un hungadó komo Special Runner i despues, mesun pelotero ku a kore pa e hungadó, a bin bati kome pinch hitter pa otro hungadó. Pues, e Special Runner a kore pa un hungadó i despues mesun Special Runner a pinch hit pa otro hungadó. Segun un miembro di Lions, e Special Runner por hasi tur 2 trabao i ku e regla aki no ta mesun ku esun di Little League. Segun ami (Pipi), tabata na aña 2022. Ultimo wega di e kampeonato.” Ta asuntunan ku nos ta trese dilanti den e dianan benidero.
• * * * * *
Ban bèk pa Slowpitch, parse ku Liga van Engelen lo stop di eksistí. Durante reunion di Hope resientemente, dirigentenan di Liga Van Engelen tabata buska boluntarionan pa tuma e liga over. Temporada 2023 ekipo Jaws a bira kampion pa promé biaha den e liga i a kibra e dinastia di Swift den e liga. Liga 40 i Liga van Engelen si ta parse stabil. Liga 40 lo tin ekipo Bombers pa 2024, un ekipo ku a marka historia den Liga Amstel i gana 7 kampionato sigi ku sigur ta un rekòrt pa loke ta Slowpitch. Manera ta konosí Wild Cats tin e rekòrt den Beisbòl Dòbel A ku 8 título sigi di 1994 pa 2001.
• * * * * *
Royal Scorpions ta buskando un kècher despues Stephan Vidal a bai Wild Cats. Dashenko Ricardo no ta sigi mas komo kècher i no sa unda el hunga beisbòl den 2024 òf si e ta sigi hunga beisbòl. Ildion Martina, otro kècher di Royal Scorpions a move bèk pa Santa Rosa Indians. Royal Scorpions a bira kampion di Beisbòl Dòbel A despues di 11 aña. Tin indikashon ku Vernon ‘Tripel A’ Isabella mes lo keda komo manager di Santa Maria Pirates. Richard ‘Chado’ Obispo ta rumbo pa Marchena Braves. Na 2018 Chado Oibispo, komo manager a klasifiká ekipo Marchena Braves i por poko a hiba e ekipo pa e serie final. Nos ta keda te aki pa awe, te mayan ku Poder di Dios.
%20copy.jpg)
