Wild Card di Sòftbòl Liga 50 ta start awe djasabra na Van Engelen Ballpark
WILLEMSTAD — Weganan di wild card entre ekiponan ku a terminá na puestonan 4, 5, 6 i 7 despues di e buelta regular lo topa ku otro djasabra, 19 di sèptèmber na Van Engelen Ballpark. Den e promé partido pa 12:00 PM, e ekipo di Flamboyan (number 4) lo topa ku number 7 ku ta Pitufos, i despues pa 2:00 PM Jaws (ku a terminá na di 5 lugá) lo topa ku number 6 ku ta Marlins. Ganadónan lo hunga djadumingu pa 2:00 PM pa saka e puesto number 4. Djasabra 26 di sèptèmber lo tin e promé weganan di semifinal entre e ekiponan 1 vs 4 i 2 kontra 3. Ta trata aki di e ekipo Jandoret Raiders kontra e ganadó di e Wild Card i Ban Serio kontra di Baranka.
Mientrastantu e standing final ta konosí i tambe e lídernan individual. Den e kolumna nos tin mas detaye.
E posishon final di e buelta regular di Liga 50 ta Jandoret Raiders 11-2, Ban Serio 11-2, Baranka 10-3, Flamboyan 8-5, Jaws 8-5, Marlins 7-6, Pitufos 4-9, Lions 3-10, Sluggers 3-10 i Artemisia 0-13. E MVP-nan di e weganan di djasabra último tabata Joëll Angelista (Jaws), Myron Wijman (Jandoret Raiders), Juburney Davelaar (Ban Serio) i Sherwin Schoop (Baranka).
Baranka 19, Marlins 5 Baranka a konektá 21 hit i no a kometé eror. Ramiro Balentina a bati di 4-3 (un doblete), Rolin Eustatius di 3-3 (un doblete), Gregory Reina di 3-3 (tres doblete), Dennis Dambruck di 3-2 (un doblete), Sherwin Schoop di 3-2 (dos doblete), Robertico Ramazan di 3-2, Djuric Pieters di 2-2 i Edmar Cornelia ku un homerun. Anthony Pieter a picha 1.2 inning pa bira e picher ganadó. Pa Marlins ku a bati 9 hit i a kometé 2 eror, Irving Sambo a bati di 3-3 (un doblete), Jurien Martina di 2-2 (un doblete), Curby Brunken di 2-1 (un doblete) i Eddy Obispo di 3-1 (un doblete). Luis Alcantara tabata e picher pèrdèdó.
Ban Serio 11, Flamboyan Gamers 10 Ban Serio a bati 13 hit i a kometé 1 eror. Jair Josepha a bati di 3-2 (un doblete), Albert Pieternella di 3-2 (un doblete), Kelvin Winklaar di 2-2, Shurandy Lourens di 2-1 (un homerun) i Hubert Sakoetoe di 2-1 (un triple). E. Antonia a gana e wega den kuadro di relevo. Pa Flamboyan ku a bati 13 hit i a kometé 2 eror, Gilbert Juliet a bati di 3-3 (un doblete), Tyrone Hollander di 3-2 (un homerun), Gerthon Matrona di 3-2 (un doblete), Olav Verbrugge di 3-2 i Stanley Palm di 2-1 (un doblete). Gilbert Keller tabata e picher pèrdèdó.
Jandoret Raiders 13, Lions 3 Jandoret Raiders a bati 19 hit i a kometé 1 eror. Myron Wijman a bati di 3-3 (un homerun), Gregory Zimmerman di 3-3 (un doblete), Raylan Francisca di 3-3, Earl Virginia di 3-2 (un doblete), Chervin Maduro di 3-2 i Mairon Martinus di 2-1 (un triple). Gilbert Henrietta a picha 4 inning permitiendo 3 kareda pa logra e viktoria. Pa Lions ku a bati 5 hit i no a kometé eror, Ferdinand Rosalina a bati di 2-2 (un doblete) i Wendell van 't Kruys di 2-1 (un homerun). Giovanni Maduro tabata e picher pèrdèdó. MVP di e wega aki tabata Myron Wijman.
Jaws 13, Sluggers 3 Jaws a konektá 16 hit i a kometé 4 eror. Joëll Angelista a bati di 3-3 (un doblete), Cedrix Valies di 3-3, Xaviero Avastia di 2-2, Fernando Rosario di 3-1 (un doblete) i Anthony Leonora di 3-1. Fernando Rosario a tira e wega kompletu di 5 inning pa tuma e triunfo. Pa Sluggers ku a bati 4 hit i a kometé 2 eror, Dudley Felicia a bati di 3-1, G. Pernett-Pedraza di 2-1 i Giovanni Martina di 2-1. Claifson Domacasse tabata e picher pèrdèdó.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Djasabra, 19 di sèptèmber, ta start ku playoff wild card di Liga 50 na Van Engelen Ballpark. E weganan aki lo tuma lugá pareu ku e weganan di Torneo Hechuchu. Den e promé wega di e wild card, ekipo number 4 ku ta Flamboyan lo topa ku number 7 ku ta ekipo Pitufos. E wega aki ta start 12’or i e otro wega di wild card ta entre ekipo Jaws (number 5) kontra di Marlins ku a terminá na number 6. Ganadónan di e weganan aki lo topa ku otro djadumingu 20 di sèptèmber pa 2’or.
* * * * *
Ganadó di e wega aki ta bira number 4 i lo topa ku Jandoret Raiders ku a terminá number 1 di e buelta regular den semifinal. E otro seri ku ta semifinal lo ta entre Ban Serio (number 2) kontra di Baranka (number 3). Serinan di Liga 50 lo bira interesante. Ban Serio ta kampion di temporada 2023 i 2025, miéntras Baranka a bira kampion di 2021, 2022 i 2024. E dos ekiponan aki ta dominá Liga 50 i promé ku esei tabata ekipo Ban Serio ku a dominá na 2017, 2018 i 2019. 2016 tabata Marlins i 2015 tabata ekipo Pitufos. Nos ta bai pone tur e kampionnan di Liga 50 unu tras di otro manera ta e kaso ku nos Kopa ABC, ántes Liga Van Engelen, Liga Amstel i naturalmente Béisbòl Dòbel A.
* * * * *
Liga 60 ta a la karga aki na Kòrsou rumbo pa playoff. Promé ku playoff lo tin un wikènt kaminda lo tin un torneo internashonal ku partisipashon di ekiponan di Hulanda, Kòrsou, Aruba i Sint Maarten. Na Aruba e kampionato Liga 60 a yega na su fin. Nos a risibí e informashon di sr. Freddy Refunjol, èks-pelotero di nivel haltu den su tempu, èks-pelotero veterano den e super ekipo Kenro i èks-gobernador di Aruba. Ekipo Decos a bira kampion ganando di Astros 9 pa 2 den final. Astros a bira supkampion. Surprise Troopers a gana Tigers 10-3 i sali na di 3 lugá.
* * * * *
Nos a risibí e sifranan individual den Liga 50 di 2026. Ta trata aki di sifranan final. Ramiro Balentina di Baranka a sali kampion bate ku promedio di .704, produkto di 19 hit den 27 turno. Gilbert Juliet di Gamers/Flamboyan a keda na di dos lugá ku promedio di .667 i di tres tabata Myron Wijman ku .654. Julius Veeris (Baranka) a terminá ku .654 i Irving Sambo (Marlins) ku .607. Den homerun tabatin un empate entre Ramiro Balentina i Reinaldo Casimiri di Ban Serio ku tabatin 2 homerun. A sigi 19 hungadó empatá ku un homerun.
* * * * *]
Gilbert Juliet a sali líder den kareda empuhá ku 18, sigí pa Earl Virginie di Jandoret ku tabatin 17, Richenel Candelaria tambe tabatin 17 RBI. Despuès ta Albert Pieternella di Ban Serio ku 16 RBI, Julius Veeris i Emeric Agatha ku 15 RBI. Fernando Rosario di Jaws i Sherwin Schoop di ekipo Baranka tambe tabatin 15 RBI. Gilbert Henrietta di Jandoret Raiders a bira kampion picher ku 5 ganá i 0 pèrdí. Na di dos lugá a keda Michelangelo Boekhoudt (Ban Serio) ku 4-0 i Anthony Pieter (Baranka) 4-0. Gregory Martijn di Jandoret Raiders a terminá ku 4-1. Na final di e kampionato lo tin entrega di premio. Pabien na e ganadónan di premio for di awor.
* * * * *
Round Robin di Béisbòl Veterano 40+ ta start dia 26 di sèptèmber i playoff semifinal di Liga 50 ta start dia 27 di sèptèmber 2026. Ke mèn wikènt benidero no tin wega di Béisbòl Veterano. Den Liga 60 ta kandela tin na e momentu aki kaminda ekipo Nos Tambe Por (ku ta na di dos lugá) lo topa ku Pitufos (ku ta na promé lugá). Despues tin otro wega kandela na momentu ku Los Amigos topa ku Jaws. Nos ta terminá nos kolumna ku notisia tristu di fayesimentu di dos gran deportista i dirigente. Zulma Martis di sòftbòl femenino i Sòftbòl Little League i e gran futbòlista i hungadó di sòftbòl veterano Siegfried Brunken a bai sosegá. Kondolensia i forsa na famianan di e gran personahenan aki. Nos ta keda te aki pa awe. Te mayan ku Poder di Dios.
