Amstel Bright Premier Cup ta sigi e wikènt aki ku 31 wega na Van Engelen Ballpark
WILLEMSTAD- Amstel Bright Premier Cup ta sigi e wikènt aki ku 31 wega na Van Engelen Ballpark. Djabièrnè, 16 di febrüari tabatin un wega di COED i dos wega di Soshal Maskulino. Den e promé wega di awenochi pa 7.30 CITCO a kai vensi ku skor grandi 13-4 vs SOAB.
Tur dos ekipo a logra gana den nan promé wega di Amstel Bright Premier Cup. SOAB a gana di ORCO/SSC ku skor di 12-8 den nan promé wega i CITCO a gana MCB ku skor di 5-4. Pero djabièrnè ekipo SOAB a mustra fuertisimo. Den e di dos wega pa 8.45 pm e ‘team to beat’ den Soshal Corporate Belasting Dienst a gana Corendon 9-2 pa tremendo picheo di Giovanni Maduro. Pa djasabra i djadumingu lo tin un total di 28 wega pa kompletá e 31 weganan di wikènt.
Dave Kirindongo di Santa Maria Pirates pa Isla Crackers den Beisbòl Veterano
WILLEMSTAD- Dave Kirindongo despues di 3 aña den Santa Maria Pirates lo pasa pa Isla Crackers den Beisbòl Veterano. Dave Kirindongo un estrea kècher/picher i infielder lo bai hasi e diferensia pa Isla Crackers logra nan promé título den Beisbòl Veterano. Dave Kirindongo a drenta den Santa Maria Beisbòl Veterano 2021 i mesora a logra hasi Santa Maria kampion.
Na 2022 e ekipo tabata falta un wega pa ripití komo kampion pero a keda kòrtiku. 2023 di un manera sorprendente Santa Maria Pirates a keda eliminá pa Jandoret Raiders den e wega 4 vs 5 (wild card). Tabatin rumor ku Dave Kirindongo lo bai e ekipo Yesterday pero Dave mes a konfirmá ku nos ku elo bai Isla Crackers den 2024. Parse ku tin mas hungadó di Santa Maria rumbo pa Isla Crackers den 2024. Tin vários kambio mas na kaminda den Beisból Veterano i den kurso di otro siman nos tin mas detaye
MAS INFORMASHON DI SÒFTBÒL I BEISBÒL
Fanátikonan di Extra Inning bon dia i felis wikènt. Promé wikènt despues di e temporada pisá di karnaval. Nos a drenta kuaresma tambe i mester bai poko poko ku e bebidanan i otro kosnan di bon bida. Sòftbòl Slowpitch ta sigi normal den e popular Amstel Bright Premier Cup na Van Engelen Ballpark. 31 wega e wikènt aki i un skema nobo a sali kaminda a reprograma algun wega ku no por a tuma lugá debí ku lus riba tereno B no ta kla ainda.
• * * * * * *
Nos a risibí algun informashon serka Pim Fangman “Please tuma bon nota ku tur wega na kora ku background hel ta weganan ku nos mester a re-progamá dor ku NO a logra pone e lusnan na Vèlt B traha! Pa tur sobra wega NO tin kambio at all. Nos ta supliká tur ekipo pa ta na tempu na vèlt pa weganan por kuminsá na ora i pa nos tòg por kaba na e orario programa! Nos ta bolbe puntra un i tur pa spesialmente riba djasabra NO parker riba lugá di parker di nos bisiñanan. I por último kòrda riba nos lema: “ Laga FAIRPLAY prevalesé”! Komishon organisadó di Amstel Bright Premier Cup ta deseá tur ekipo tur klase di éksito ku nan kompromiso(nan) den e fin di siman benidero.
• * * * * *
Wikènt benidero ekipo Curacao Super Stars a keda di reuní tokante e ‘joint venture’ entre ekipo Curacao Super Stars i Baranka. Hopi hungadó ta pendiente pa wak si Baranka ta djòin pa nan drenta Baranka mesorá. Ta trata aki di vários eks hungadó di Baranka di 20 i 30 aña pasa ku ta kla pa djòin. Pa ta eksakto ta djasabra awor e reunion lo tuma luga pa 2’or di atardi na Sentro di Bario Santa Rosa. Kandela den pipa den Sentro di Bario Santa Rosa djasabra awor. Nos lo trata na haña detaye pa e edishon di djaluna benidero.
• * * * * * *
Otro informashon kayente ta ku Dave Kirindongo lo move di Santa Maria Pirates pa Isla Crackers den Beisbòl Veterano. Atkisishon tremendo pa Isla Crackes ku ta keda ekipo pa logra nan promé título den Beisbòl Veterano. Naturalmente na momentu ku otro super estrea yega 40 aña e tambe lo bai Isla Crackers. Ta trata aki di Randy Kirindongo ku ta kumpli 40 aña temporada 2025. Beisbòl Veterano lo bira hopi interesante. Isla Crackers tin mas eks estrea ku a kaba di kumpli 40 na kaminda. Isla tabata hopi serka di yega final atrobe den 2023 pero a kai vensí kontra Santa Rosa Memories.
• * * * * * *
Tin tur indikashon ku ekipo Bombers lo hunga den 40+ di Sòftbòl temporada 2024. Bombers a presentá ku un ‘dream team’ den Torneo Amstel Bright i a dal Jaws durísimo ku skor di 19-3. Nos a mira grandinan manera Dave Kirindongo, Johnny Balentina, Luigino Domacasse, Julius Veeris, Stanford Landburg, Curby Brunken, Reginald Pietersz, Ericson Senior, Ramsey Kirindongo. Dream Team ruman ku lo bira kompeti fuerte den Liga 40, espeshalmente kontra Baranka ku tin dos temporada sigi kampion den 40. Randy Kirindongo ta manager di Bombers 40+ i wikènt awor nan lo topa ku Cicoza Legends djadumingu 2’or riba tereno B na Van Engelen Ballpark. Otro wega fèrfelu riba e fecha menshoná ta Flamboyan kontra Jandoret Raiders. Tur dos ekipo ta bini di un viktoria den liga 50.
• * * * * * *
60+nan tambe ta debutá wikènt benidero den Torneo Amstel Bright. Pa 9.30 djasabra awor Jaws 60+ lo topa ku Los Amigos sigi pa Flamboyan kontra Marlins. Flamboyan lo hunga dos wega wikènt benidero. Los Amigos a gana Jaws segun nos fuentenan. Djadumingu ta Nos Tambe Por kontra di Pitufos. Ke men ekiponan ku a sali number 1, 2 i 3 den kampionato di 60+ a kuminsá move kaba na komienso di aña aki. Jaws a sali kampion Liga 60, Pitufos na di dos lugá i Nos Tambe Por na di 3 lugá. Hopi moveshon mes wikènt awor na Van Engelen den Amstel Bright Premier Cup.
• * * * * * *
Rekordatorio pa inskribí pa torneo di Beisból Veterano organisá pa Azucar. By the way Gerald Gregorius ku antes tabata picha den Beisbòl Dòbel A pa ekipo Santa Maria Pirates ta agente liber den Beisbòl Veterano. Johannes ‘Johnny’ Gregorius lo kumpli 42 aña i ainda ta kompeti fuerte den Dòbel A ku su ekipo Santa Maria Pirates. Nos ta keda te aki pa awe, te mayan ku Poder di Dios.
%20copy.jpg)
