Skibi pa Pepi Sulvaran
Analisis di selekshon di Kòrsou di Futbòl i e problema ta den defensa
WILLEMSTAD.- Awor ku e problema entre Bicentini i FFK ta pasado, ta ora pa huntu wak dilanti. Un be ta aworo pa wega di klasifikashon pa Mundial 2022. E speransa ta ku Hiddink lo konbensé algun di e hopi talentonan ku nos tin riba nivel profeshonal haltu. Riba papel, ku e material ku tin awor, nos por sali for di e promé buelta. Sint Vincent, Cuba, Islanan Birgen Britániko i Guatemala ku nos ta haña na kas, mester por.
Bolante ku entre otro Bacunanan ku Roly Bonevacia ta di nivel. Apesar ku Roly no a demostrá su kalidat ainda den selekshon, ta un hungadó ku pasado den Ajax i Roda JC den Eredivisie i di edat relativamente hoben ainda. Mirando e kontrinkantenan den e promé buelta, un medio kampo ku nan tres ta di nivel mas haltu kompará ku e paisnan den nos grupo. Si por konbensé Kevin Felida, nos tin un bolante prometedor pa reforsá e linea media.
Delantero tambe ta superior na e paisnan menshoná. Jafar Arias ta bayendo bon den VVV i a bira manera semi estelar. Charlison Benschop tambe tin un bon aña na Chipre. Riba ala Kuwas i Jeremy Cijntje ku tambe a kuminsá haña su pidanan ku Heracles, ta duna nos un delantero di nivel di Eredivisie. Pa nos regio esei ta un bon nivel. Antonia i van Kessel tambe ta aleronan ku ta den bon ritmo e temporada aki. Kier men pa e buelta aki nos ta mustra superior den bolante i atake.
E dolor di kabes ta defensa. E úniko hungadó aktivo riba nivel, ta Jurien Gaari di RKC. Gaari mes ta pida wega e ta haña. Di e tres otro defensanan ku a yega di hunga riba nivel ku nos tin, dos tin hopi tempu sin ekipo, esta Cuco Martina i Michael Maria. Everton a laga Cuco bai foi yüli 2020 i Maria a stop di hunga na Oustralia den mesun temporada. Darryl Lachman tambe tabata basta tempu sin ekipo, pero resién a djòin un ekipo Oustraliano. Nos no tin mas defensa ku a hunga riba nivel máksimo. Esaki por bira un problema si nos pasa e promé buelta. Tin hopi kandidato, pero mayoria, si no ta tur, ta soña irealistiko ku selekshon ulandes. Sherel Floranus (Heerenveen), Giovanni Troupée (Utrecht) i Lutsharel Geertruida (Feyenoord) pa lokual ta trata e puesto di defensa riba ala drechi. Nan dilanti tin hopi hungadó ku ta militá mas haltu ku nan den ekipo grandi. Denzel Dumfries (PSV), Hans Hateboer (Atalanta), Kenneth Tete (Fulham), Deyovaisio Zeefuik (Hertha BSC) i Sean Klaiber (Ajax). Floranus ta hunga ku tur respèt den Heerenveen. Troupée ni den su ekipo FC Utrecht no ta estelar. Geertruida, ku tin un bon aña ta hunga rèksbèk of sentral of bolante defensivo ora tin leshon. E ta un sorto di ‘utility player’ den Feyenoord. E chèns ku un di nan ta yega selekshon di Hulanda ta nulo, mirando e edat hoben of relativamente hoben di nan konkurensia.
Pa e puesto di sentral tin Armando Obispo (PSV), Tommy St. Jago (FC Utrecht) i Jurrien Timber (Ajax). Obispo ta reserve den PSV, meskos ku St. Jago, ku ta hunga ora tin leshon. Esun ku tin mas chens pa yega ‘Oranje’ ta Timber, kende ku 19 aña ya a pasa pa e onsena máksimo di Ajax i ya a haña kuater ‘piet’ kòrtiku. E konkurensia ta mortal pa nan tambe. Virgil van Dijk (Liverpool) i Matthijs de Ligt tin e puestonan di sentral den lòk. Pero tin mas konkurensia. Sven Botman (Lille) di 20 aña ta kla pará pa okupá e puesto ora Van Dijk retirá. Tin tambe ahinda Stefan de Vrij (Inter). Tantu Daley Blind (Ajax) komo Nathan Aké (Manchester City) tambe por hunga bèk sentral.
Riba ala robes den defensa nos tin un potensial kandidato so, ku ta Tyrell Malacia (Feyenoord). Tyrel tampoko lo yega. Den Feyenoord mes e ta un skohensia tras di Ridgeciano Haps. Pa e dies aña ku ta bini e puesto ei den selekshon ulandes ta di Owen Wijndal di AZ. Hoben di desendensia surinameño ku ya tin ekipo grandi su tras. Ademas tantu Aké komo Blind tambe ta hunga einan. Den Paris Saint Germain tin Mitchel Bakker, hoben ulandes di 20 aña ku ya ta hunga riba e máksimo nivel.
Mester di un aserkamentu mustrando e talentonan aki di nos, ku via Kòrsou nan chens pa yega un Mundial ta mas realístiko. Hiddink kompaña pa Hedwiges Maduro, Fer of Anita por aserká e defensanan aki un pa un. Mirando nan edat, un futbolista di nòmber huntu ku Hiddink, mester por konbensé dos pa tres di nan. Ku bista tambe riba e siguiente buelta ku lo ta di nivel haltu. Si nos gana e promé grupo, kasi sigur ‘los canaleros’ di Panamá, pais mundialista ta warda nos.
