Ekipo Nos Tambe Por a rindi homenahe póstumo na Sor Moesquit
WILLEMSTAD – Djadumingu 5 di yüli, na Frank Curiel Ballpark, promé ku e wega final di Torneo Sor Moesquit, ekipo Nos Tambe Por a duna homenahe póstumo na Sor Moesquit den presensia di su famia i dirigentenan di Beisbòl di Santa Maria. Tambe a ofishalmente a inougurá ofishalmente Patio Sor Moesquit ku ta keda den kurá di Frank Curiel Ballpark.
Pa start e seremonia, famianan a subí tereno i para alrededor di e pitching plate, i e MC a yama e dos ekiponan ku lo hunga final pa alineá di home pa primera i di home pa tersera. Himno a keda interpretá pa hungadó di Baranka, Siegfried Lopez, i señora. Kenneth Gijsbertha, na nòmber di Santa Maria Pirates i organisashon di Beisbòl di Santa Maria, a hiba palabra. Despues, Frank Curiel a entrega plakat na sra. Vanessa Sasso.
A sigi palabra di señora di Sor Moesquit, sra. Vanessa Sasso, i yu di Sor Moesquit, ku ta Kevin Moesquit. Kevin Moesquit a lansa promé bala i Frank Curiel tabata na bate. Despues a move pa Patio Sor Moesquit den kompania di e dos ekiponan i tambe fanátiko i dirigentenan presente. Sra. Vanessa Sasso i Kevin a kòrta e sinta pa drenta e patio, i den presensia di dirigentenan di Nos Tambe Por, Frank Curiel, Jero William, Edmond Balentina, Richenel Rafaela i Frank Curiel, a desvelá e bòrchi, Patio Sor Moesquit. Segidamente ekiponan a bai bèk tereno pa start ku e partido final. Despues di e partido final, famia Moesquit a entrega Kopa Rotativo i kopa kampion na e ekiponan kampion i subkampion.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia. Despues di un eksitoso kompetensia di Senior League, nos t'ei atrobe ku informashon di Beisbòl i Sòftbòl. Wikènt pasá tabatin torneo di Sòftbòl dediká na Norwin ‘Sor’ Moesquit, Sòftbòl Liga 50 i Liga Streanan di Ayera. Promé ku e final di Torneo Sor Moesquit tabatin un seremonia impreshonante riba vèlt i na Patio Sor Moesquit, ku ta un patio den kurá di Frank Curiel Ballpark kaminda hungadónan di e tim Nos Tambe Por ta reuni despues di wega.
* * * * * *
Den Liga 50 Sòftbòl, sorpresa grandi a kai na momentu ku ekipo Lions a kibra invikto di Jandoret Raiders, ganando ku skor di 7-2 den e promé wega di djasabra último na Van Engelen Ballpark. E sigiente sorpresa tabata ekipo Jaws ku picheo di Edison Sambo a gana Ban Serio ku skor di 11-2. Edison Sambo mes a bati di 2-2. Baranka a gana Artemisia 11-2, Farley Lard a wanta bon pero no por a wanta e poderio di Baranka. Den e último wega djasabra, ekipo Sluggers a gana nan promé wega di kampionato ku un viktoria di 10-2 riba Pitufos.
· * * * * * *
Ban pa Beisbòl Dòbel A ku a sigi djadumingu ku wega entre Groot Kwartier Stars i Santa Maria Pirates riba nivel Dòbel A. Beisbòl Hubenil sí a sigi den wikènt ku vários wega, Beisbòl Klase A tambe tabata wanta pendiente selekshon di Kòrsou bini bèk for di Hulanda. Italia a gana Hulanda ku skor di 4-3 pa bira kampion di e Harlemse Honkballweek. E wega final a tuma lugá djasabra den Pim Mulier Stadion na Haarlem. Kòrsou a terminá ku rèkert di 2 ganá i 4 pèrdí. Nos a gana Repúblika Cheka i International Globe Trotters. Standing final tabata Italia 6-1, Hulanda 5-3, Taipei 4-3, Kòrsou 2-4, República Cheka 2-4, International Globe Trotters. Selekshon di Kòrsou a regresá djadumingu anochi.
· * * * * * *
Beisbòl Veterano a start djasabra 4 di yüli na Vi Jansen Ballpark ku varios wega. Den e wega di dia, ekipo Santa Rosa Memories a laga Quality Stars den tereno riba hit di Stanford Landburg. Picher ganadó tabata Ramses Jamancika i Andley Simmons tabata e picher perdedó. Santa Rosa Memories ku general manager Shendy Cras a presentá ku varios hungadó nobo, entre otro e rumannan Dave i Randy Kirindongo, Shuremy Fornerino, Burton van der Gen, Henkie Pinedo, èts. Quality Stars tabatin Andley Simmons komo hungadó nobo.
· * * * * *
Otrabanda a laga Volcano den tereno den tie-break. E aña aki Volcano tin tim den Liga 40 i Liga 50 di Beisbòl Veterano. Den dianan benidero nos tin mas detaye di Beisbòl Veterano ku a ranka sali den gran forma den 2026 aki. Little League ta sigi move ku biahanan pa eksterior. E selekshon Minor a bini bèk djabièrnè despues ku nan a terminá number 3 na Loíza, Puerto Rico. Selekshon Junior di Liga Pariba lo move djasabra 11 di yüli den oranan di mèrdia pa Sint Maarten. Mientrastantu selekshon Little bou di direkshon di Sontje Gijsbertha ta ful den preparashon rumbo pa Williamsport (USA). Manera ta konosí, Kòrsou lo hunga komo Kòrsou i no Caribbean den e kampionato Mundial na Williamsport. Selekshon Senior a bira kampion di Karibe djasabra anochi den Tio Daou Ballpark. No hopi fanátiko manera kustumber, pero nos a bira kampion na Kòrsou atrobe despues ku for di 2023 nos tabata kampion di e kampionato Senior di Karibe. E aña ei nos a bira kampion Mundial tambe na Easley, South Carolina, i despues hopi di e hòbennnan aki a firma profeshonal i otronan a bai kolegio na USA.
· * * * * *
E último wega a terminá ku skor di 5-3 kontra di Puerto Rico, pero mester apuntá ku e otro weganan a bai relativamentu fásil. Pabou a gana Repúblika Dominikana 19 pa 2, djaluna despues Pabou a dal Pariba 21-4, segidamente Pabou a gana di Aruba 12-4 pa klasifiká number 1 den nan Pul, esta Pul B, pa playoff semifinal. Den Playoff semifinal Pabou a dal Pariba 10-1 i finalmente gana Puerto Rico 5-3 den e wega final. Selekshon di Kòrsou lo hunga mundial na Easley, South Carolina di 1 pa 8 di ougùstùs. Pabien na manager Charlie Merite i su stàf tékniko, direktiva di Liga Pabou, i henter Kòrsou naturalmente ku e título. Nos ta keda te aki pa awe, te mayan ku Poder di Dios.
