ANALISIS I SIFRA

Kandela awenochi den wega number 5 entre Santa Rosa i Wild Cats

WILLEMSTAD-Awenochi tin wega number 5 di e play-off final di Beisbòl Dòbel A entre Santa Rosa i Wild Cats. E wega ta programá pa start 6’or pm den Tio Daou Ballpark. Públiko no tin mag di drenta, pero por sigi e wega via emisoranan i medionan soshal. Extra tin sifra di e lidernan den e final i análisis kòrtiku di e seri entre e dos ekiponan.

Santa Rosa ta dilanti den e seri 3-1 despues ku nan a gana 3 wega sigí i pèrdè e wega di djaweps último, despues ku por poko Santa Rosa por a bai ku e viktoria. Wild Cats tambe tabata kómodo dilanti i Santa Rosa a bòltu e skor den un inning.  Den semi-final Wild Cats (.320) a bati un tiki mas tantu ku Santa Rosa (.308).

Pa loke ta e seri final Santa Rosa a nota 26 kareda, Wild Cats 18 kareda. Santa Rosa a konektá 48 hit, Wild Cats 32 hit.  Santa Rosa a kometé 6 eror (3 den último wega). Wild Cats a kometé solamente 1 eror den 4 wega ku ta un parti hopi fuerte. Tòg mester atmití ku e picheo di Wild Cats no a wanta manera a spera.


Santa Rosa lo bini fuerte awe pa kaba kos.

Santa Rosa lo habri e wega di awe ku Jordan Lucas ku tabata entre e lidernan den picheo durante kampionato re ular i a gana 3 wega kaba den play-off, 2 den semi-final I unu den final. Un picher sigur ku tin un rekta normal, pero un tremendo kambio di velosidat i ta pone e bala kaminda e ké. Un dje mihó pichernan di aktualidat ku a gana tur ekipo grandi durante kampionato regular i a demonstrá esei den play-off. Wild Cats lo habri ku Klevert Martina ku ta un picher di Hubenil ku por tira te ku 88 miya i un bon kambio di velosidat kombiná ku un spleter.

Randy Kirindongo tabata DH i a drenta wega komo kècher djaweps ültimo.


LIDERNAN
Despues di kuater wega di final di Beisbòl Dòbel A entre Santa Rosa Indians i Wild Cats, Jurgen Statie di Santa Rosa Indians ta lider ku .625. Shakir Albert di Santa Rosa ta lider den RBI ku 5. Jordan Lucas (Santa Rosa) tin un ERA di 0.00 i Jair Jurrjens (Wild Cats) tin 11 ponche tirá.

BATEO
Jurgen Statie (Santa Rosa) .625;
Yevganni Reinita (Santa Rosa) .545;
Terrence Josephina (Wild Cats) .455;
Rojean Cleofa (Wild Cats) .444;
Calten Daal (Wild Cats) .412.

Jurgen Staite, lider den bateo den play-off final.

RBI
Shakir Albert (Santa Rosa) 5;
Riordan Windster (Santa Rosa) 5;
Christopher Pieter (Santa Rosa) 4;
Calten Daal (Wild Cats) 4;
Randy Kirindongo (Wild Cats) 4.

Shakir Albert lider den RBI ku homerun deskomunal djaweps último.

ERA
Jordan Lucas (Santa Rosa) 1.50;
Marvin Ludowika (Santa Rosa) 1.50;
Jair Jurrjens (Wild Cats) 3.77;
Hershelon Juliana (Santa Rosa ) 3.86;
Siamani Boekhoudt (Santa Rosa) 4.86.

Jordan Lucas, lider den ERA i picher habridó di awenochi.

PONCHE TIRA
Jair Jurrjens (Wild Cats) 11;
Siamani Boekhoudt (Santa Rosa) 6;
Marvin Ludowika (Santa Rosa) 3;
Risandro Pastor (Wild Cats) 2;
Hershelon Juliana (Santa Rosa ) 2.

Jair Jurrjens, lider den ponche i bon picheo den dos wega den final.

‍