Análisis i sifra
Wega finalísimo entre Wild Cats i Santa Rosa djaweps 15 di òktober
WILLEMSTAD – Djaweps 15 di òktober tin e wega finalísimo entre Wild Cats i Santa Rosa Indians. E seri ta empatá na 3 viktoria pa banda despues ku Santa Rosa a sali gana e promé 3 weganan di e seri final, Wild Cats a bini bèk durísimo i gana e 3 sigiente weganan. Wild Cats ta faborito pa bira kampion, pero mirando e sifranan di e seri Wild Cats mester keda tene debídamente kuenta ku Santa Rosa. Pa Deporte Kòrsou tur kos por pasa den e wega final.
Wild Cats ta bini ku e estelarísimo Jair Jurrjens ku tabata e picher pèrdèdó den e promé wega di final ku Wild Cats a pèrdè ku skor di 4-1 djaweps 1 di òktober 2020. Den e wega ei Jair a picha 8 inning i tuma 3 kareda na man di Santa Rosa Indians. Jair a tuma apénas 3 hit den 8 inning di trabou den e promé wega ei di e final. Jair Jurrjens a bolbe picha ku un siman di sosiego dia 8 di òktober i a tira 6 inning tuma 4 kareda. Jurrjens a laga e wega ganá 5-3, pero relevistanan a tuma kareda i Santa Rosa a bòltu e skor den e inning ei 7-5, pa despues Wild Cats bini bèk den e wega i gana 9-7 ku bon relevo di Risandro Pastor. Tabata wega number 4 di e seri ku Santa Rosa faltando algun out pa bira kampion.
E wega di djaweps awor lo bira di 3 wega ku Jair Jurrjens ta picha den final i di 5 den play-off. Jair Jurrjens no tin viktoria ainda den play-off semi-final i final. E último wega ku Jair a gana tabata kontra Firebirds dia 1 di sèptèmber 2020. Jair Jurrjens su rekòrt durante kampionato kompletu i play-off ta di 3-4 ku un ERA di 5.07. Wild Cats ta pone tur speransa den Jair Jurrjens pa bira kampion pa di 16 biaha den Dòbel A den nan historia. Wild Cats lo tin Risandro Pastor klá pa tira den relevo. Risandro tabata tremendísimo den play-off ku dos viktoria kontra Santa Maria den semi-final i dos mas den final kontra di Santa Rosa. E picher ku a salba Wild Cats den pèrtá den tur dos play-off. Risandro Pastor su rekòrt overall ta 5-2 ku 2 wega ganá i 1 pèrdí den play-off final i 2 ganá i 0 pèrdí den semi-final.
SANTA ROSA
Ekipo Santa Rosa Indians lo bini ku Jordan Lucas ku tabata bon den picheo den play-off semi-final i final. Den final e tin un derota i 0 wega ganá. Jordan a tira tremendo den wega number dos tumando dos kareda den 6 inning i despues relevistanan no a logra salba e wega, pero e relevista Hershelon Juliana a bin gana e wega despues. Den wega number 5 di e final djasabra Jordan Lucas a laga e wega empatá den di 9 inning i despues e relevista a bin pèrdè e wega riba base por bola. E picher derecho Jordan Lucas tabatin un tremendo temporada overall ku 5 ganá i 1 pèrdí ku un ERA di 2.59. Varios wega ganá durante temporada kontra timnan grandi manera Santa Maria i dos wega ganá kontra Royal Scorpions den semi-final. Santa Rosa lo usa Jordan Lucas ku hopi konfiansa i pichernan ku lo ta pendiente pa drenta ta e slengu Siamani Boekhoudt ku a gana wega number 1 pa Santa Rosa i pèrdè den wega number 4.
Picher ku sigur lo mira akshon djaweps awor ta Marvin Ludowika, lider den ERA (1.50) den play-off final. Durante temporada regular tabatin un ERA di 0.00. Den play-off tambe Ludowika tabata bon i tin un ERA overall di 1.00. Hershelon Juliana i probablemente Swindley Lint ku tabata heroë den semi-final i den final tambe a tira bon, pero tabata e picher pèrdèdó den wega number 4. Lint a salba wega number 2 di seri pa Santa Rosa i pèrdè e wega krusial, e wega number 4.
