Apertura ofishal di kampionato Little League 2025/2006 dediká na Nydia Daal i Sixto Laker
WILLEMSTAD- Kampionato di Beisbòl Little League a start djabièrnè 31 di òktober den Sixto Laker Ballpark na Montanja Abou. Pa promé biaha e tene un apertura ku partisipashon di tur e liganan ku ta kai bou di Curacao Little League Foundation. Promé ku e apertura ofishalmente a desvelá e bòrchi di Sixto Laker Ballpark, kaminda kasá di Sixto Laker (QEPD), Diana Daal i yu Sidiane Laker -Daal a desvelá e bòrchi na entrada di e parke. E desvelo a tuma lugá dilanti di hungadó i dirigentenan di Liga Pariba, Liga Pabou, Liga Willemstad, Liga Soraida Juliana i Aminta Sprockel Challengers Little League.
Despues ekiponan a desfilá i drenta e parke menshoná dilanti e públiko grandi ku tabata presente. A sigi himno di Kòrsou ku a keda interpretá pa Reina di Tumba 2025, srta. Jefdaney Manuela. Obispo sr. Luis Secco a dirigí palabranan spiritual i a bendishoná e hungadó- i dirigentenan. Despues a sigi palabranan di sr. Sharier Dorand representante di spònser number 1 di Little League RBC Royal Bank.
Por último District Administrator a hiba palabra pa despues huramentá tékniko i hungadónan. A honra baluartenan Nydia Daal i Sixto Laker i MC Jeffrey Martina a lesa e CV di a baluartenan. Sidiane Laker-Daal a tira promé lansamentu den representashon di su tata Sixto Laker i Nydia Daal tambe a tira e promé bala despues ku nan a risibi regalonan di Curacao Little League Foundation. E promé wega tabata entre Santa Maria i Montanja Ariba.
Fanátikonan di deporte Kòrsou bon tardi i felis wikènt. Nos a drenta novèmber i ainda Sòftbòl Slowpitch ta moviendo den Liga 60 i torneo aki i aya. Djadumingu 2 di novèmber tabata e último fecha di kampionato regular di Liga 60 tambe aya na Frank Curiel Ballpark. Definitivamente playoff ta start dia 9 di novèmber despues ku ekiponan a vota den reunion di djarason 29 di òktober. Lions number 1 lo topa Nos Tambe Por 2 i Los Amigos number 3 lo topa ku Jaws number 4.
** * * * *
Vários miembro di ekipo Los Amigos lo no tei pa dia 9 di novèmber, e promé dia di playoff mientras tin algun ekipo mas ku lo pèrdè hungadó. Ta ekipo Los Viajeros ta bai Medellin pa di 3 aña sigi i direktiva huntu ku miembronan a tuma desishon ku weganan ta sigi normal. Pa dia 16 di novèmber e ekipo ku pèrdè entre number 1 i 2 lo topa ku ganadó di number 3 i 4. E playoffnan page system lo ta solamente un wega, esta dal saka pa despues final bira un seri mihó di 3. Pa loke ta e último añanan. Nos Tambe Por tabata kampion na 2019, 2020 i 2021, Jaws a bira kampion na 2022 i 2023. Nos Tambe por a kue e título bèk na 2024.
• * * * * *
Direktiva di liga 60 a anunsiá ku na momentu ku wega òf weganan keda suspendé pa awaseru òf kualke otro motibu lo hunga e wega riba e sigiente djasabra. Por ehèmpel si e wega di playoff di djadumingu dia 9 di novèmber keda suspendé lo hunga e wega ei e su sigiente djasabra. Esei ta konta pa tur fecha di playoff. Durante reunion a papia tambe tokante e punto di aseptá Baranka den Liga 60 den 2026. Parse ku awor si mayoria ekipo ta OK pa Baranka drenta Liga 60 otro aña. Vários hungadó ta kla pa bai Baranka entre otro Sendley Reina i Jerson Beaumont di ekipo Los Amigos. Tin indikashon ku kasi tur ekipo lo pèrdè hungadó, entre otro Jaws, Nos Tambe Por, Lions, Pitufos, Curacao Super Stars i Nos Power. Di Sluggers nos no a tende masha nòmber. By the way Baranka a drenta ofishalmente den liga djarason 5 di novèmber despues ku ekiponan a vota pa Baranka drenta.
• * * * * *
Djasabra den oranan lat di anochi, ekipo Los Angeles Dodgers a bira kampion ganando e ekipo Toronto Blue Jays ku skor di 5-4. Asina Dodgers a gana e World Series 4-3 den kas di Toronto Blue Jays, esta Rogers Centre. Dodgers ta bira e promé ekipo di 25 aña ku ta ripití un título di Serie Mundial. New York Yankees a bira kampion na 1998, 1999 i 2000. Yoshinobu Yamamoto a gana 3 wega den e World Series pa bira MVP di e seri. Miguel Rojas tabata tremendo despues ku ela start wega 6 i 7. Tremendo den defensa den e weganan menshoná i e homerun pa empatá e wega 7 den di 9 inning. Hungadanan bon defensivamente, korementu di base i bon picheo ta gana wega i no batimentu di homerun so. Toronto tambe a hasi vários fayo den korementu di base ku a kosta nan. No papia mes di e hugada di wega number 6 kaminda wega a terminá ku dobel play. Koredó na tersera, Isiah Kiner Falefa den bòm di di 9 inning den wega number 7, apenas Kiner-Falefa ta habri na base pa skor kaminda ta batiadó links ta na bate. Segunda base Rojas ta kue e bala bon dobel clutch i Kiner-Falefa mester a nota masha ora mes pa Blue Jays bira kampion.
• * * * * *
Toronto Blue Jays a tira hopi chèns di gana afó i Dodgers ora di bèrdat a hasi e trabou. Los Angeles Dodgers kampion meresí i mester apuntá ku e ekipo aki a bai pa gana hinkando masha hopi sèn di firmamentu di agente liber. Un ekipo ku 3 ganadó di premio MVP den nan filanan, ku vários picher ganadó di e premio Cy Young den pasado. Un ekipo tremendsimo ku lo sigi gana debí ku nan ta invertí hopi pa gana i pa traha un dinastia. Pabien na tur fanátiko di Dodgers na Kòrsou. Nos ta keda te aki pa awe. Te mayan ku Poder Di Dios.
