Beisbòl Little League - Apertura ofishal kampionato di Beisbòl Little League

Den presensia di spònsernan RBC Royal Bank i Kenley Jansen
Apertura ofishal kampionato di Beisbòl Little League

WILLEMSTAD- Djasabra 5 febrüari na Tio Daou Ballpark tabatin apertura ofishal di kampionato di Little League 2022 i di Torneo Kenley Jansen. Kenley Jansen, representante di RBC Royal Bank, Sharier Dorand Bank, representante di Minister di Enseñansa, Kultura i Deporte Errol Bishop, District Administrator Urny Floran i representante di liganan tabata presente.

Sharier Dorand di RBC Royal Bank na palabra den presensia di Kenley Jansen i DA Floran.

Torneo Kenley Jansen ta e torneo kaminda tur ekipo di Junior i Senior League (13 pa 16 aña) di Kòrsou ta partisipá. RBC Royal Bank ku ta spònser number 1 di Beisbòl Little League, ya pa 22 aña kaba ta spònser mayo di e kampionato. District Administator sr. Urny Floran a hiba palabra i splika di e kampionato i di Torneo Kenley Jansen di Junior i Senior League. Ku koperashon di Kenley Jansen i espeshalmente ku e gran kantidat di bala ku Kenley a pone disponibel, ekiponan por hunga muchu mas tantu wega.

Floran i Kenley Jansen ta pose ku e balanan i e plakat ku Kenley Jansen a risibí

Branch Manager Sharier Dorand a hiba palabra i splika atrobe e motibu di spònsering di RBC Royal Bank di tur e añanan. “Nos hubentut ta nos futuronan di mayan i e filosofía di Little League ta pas ku e maneho di RBC Royal Bank, esta krea lidernan pa futuro.” Sharier Dorand a gradisí Kenley Jansen i tur otro spònser ku ta yuda RBC Royal Bank den e kousa. Ela bisa ku huntu mester kontribuí ku e muchanan ku ta nos lidernan mayan. Kenley Jansen i representante di Gobièrnu sr. Bishop a hiba palabra durante di e apertura ku a tuma lugá den e espasio tras di tribune.

District Administrator, Urny Floran dirigiendo palabra. Ela gradisí Kenley Jansen i RBC Royal Bank pa nan aporte na Little League. Ela splika tambe kon e parti di Torneo Kenley Jansen, e parti di Junior i Senior ta hinka den otro.

Despues di e spichnan na nòmber di Little League di Kòrsou, District Administrator sr. Floran a entregá un plakat na Kenley Jansen komo muestra di apresio pa e koperashon.
Promé i despues ku e apertura tabatin algún tremendo wega na Tio Daou Ballpark.
Tur wikènt tin weganan di e torneo na Montab Ballpark, Tio Daou Ballpark i Shon Ki Nicasia Ballpark. Miéntras tantu kampionatonan di Minor i Little League di Liga Pabou, Willemstad i Pariba tambe ta pendiente pa sigi e kampionato ku a start na 2021. Kenley Jansen tambe a dirigí palabra durante di e apertura ku a tuma lugá den e espasio tras di tribune.