Argenis Martina, manager di selekshon Intermediate:
“Nos a train duru ku e selekshon aki pa gana e seri”
WILLEMSTAD- Despues ku selekshon di Pabou Intermediate a kaba di gana e seri i klasifiká pa representá Kòrsou den Latino Americano, nos a kombersá ku Argenis Martina ku ta manager di selekshon Intermediate Pabou. Argenis: “ Nos a train duru ku e selekshon aki. Nos a train 5 biaha pa siman, pasa riba e situashon ku por presentá den wega di beisbòl. Esei ta hopi importante mes mes. Nos a fokus riba pa prepará e muchanan riba tur kos i nos a sali viktorioso tambe. Nos a pasa riba e defensanan plus nos a bati hopi batting practice den e trainingnan.”
Nos a puntra Argenis riba su eksperensia ku selekshon, ela bisa nos: “Mi promé aña tabata na 2021 den Covid nos a bai Aruba ku selekshon di Junior. For 2022 bini ariba mi a coach selekshon di Intermediate. Mi a bai 2022 i na 2024 mundial di intermediate komo coach. E biaha aki ta mi promé biaha komo Manager di selekshon”
Pabou ta gana Pariba 5-4 den Intermediate i lo representá Kòrsou den Latino Americano
WILLEMSTAD- Pabou ta laga Pariba den tereno i ta gana wega number 11 di e seri i klasifiká pa e Latino Americano ku lo tuma lugá na Meksiko di dia 20 pa 27 di yüni. E seri a terminá 6-5 na fabor di Pabou despues ku e seri a empatá djasabra. E wega a terminá 5-4. Pa djarason 25 di febrüari e seri tabata empatá. A sigi djaweps, kaminda Pariba a gana 5-0, Pabou a gana 7-3 djabièrnè, Pabou promé wega djasabra 7-5 i Pariba a kai vensí 9-1 den wega number 10 di e seri riba e double header di djasabra. E 5 weganan promé tabata Pabou 9 - Pariba 0, Pariba 3 – Pabou 2, Pariba 3- Pabou 2, Pabou 14- Pariba 7, Pabou 11,Pariba 4, Pariba 2 - Pabou 0.
Nos Goso ta gana Rising Phoenix 5-3 den apertura Diamond Stars League
WILLEMSTAD- Djabièrnè 27 di febrüari 2026 tabatin apertura di Diamond Stars League na Sam Bunting Ballpark. Despues di e apertura ofishal e ekipo Nos Goso a gana Rising Phoenix ku skor di 5-3. Ta trata aki di e di 5 kampionato di Diamond Stars League i e biaha aki ta dediká na 5 baluarte. Ta trata aki di Girela Maria Isabela di Nos Goso, Janella Comenencia di Rising Phoenix, Jurnille D’Arnault di Treasure New Era, Rubia Jonis Adelina di The Fighters i Milusca Leito pa Mas Goso. Weganan a sigi djasabra i djadumingu i den kurso di siman nos tin mas resultado i detaye.
MAS INFORMASHON DI BEISBÒL I SÒFTBÒL
Fanátikonan di Deporte Kòrsou bon dia i felis wikènt. Nos a kaba un wikènt kaminda tabatin masha bon wega mes di Amstel Bright Premier Cup. Sin duda un torneo hopi popular kaminda ekiponan di modified i esnan di soshal ta kompetí den mesun torneo. E weganan di e kategoria modified kaminda Swift i Cicoza ta kompetí ta hopi serio. Siman pasá nos a komentá ku ta mihó hunga fastpitch maskulino mirando e picheo i e bon hungadónan ku ta riba tereno. Ponchenan ta kai un tras di otro den e kategoria aki. Den Liga 40 i 50 tambe tin kompetensia serio i no papia mes di e kategorianan soshal.
* * * * *
Miéntras tantu invitashonnan a sali pa Torneo Hope 2026 ku lo start dia 28 di mart na Van Engelen Ballpark. Fundashon Desaroyo Deportivo Kòrsou (FDDK) ta enkargá ku organisashon di Torneo Hope atrobe den 2026. Ta FDDK a organisá Torneo Hope na 2025, loke a resultá un éksito rotundo. Segun nos, Marlon Paz i su crew lo forma parti di e organisashon i The Greatest Umpire & Scorer ta enkargá ku arbitrahe i skormentu. Por spera un Torneo Hope den gran forma ku animashon musikal bibu tur djasabra i naturalmente un apertura tur afó. Último añanan e timnan no tabatin masha interes pa partisipá na apertura i a bini ku insentivo pa ekiponan ku partisipá na apertura.
* * * * *
E siman aki (djaweps) lo start ku World Baseball Classic (WBC) i nos lo tin basta detaye espesialmente weganan di Hulanda. Nos a kai den un pul fuertísimo ku ekiponan manera Venezuela i Repúblika Dominikana. Nicaragua i Israel tambe ta den mesun grupo i ta timnan ku ta duna bataya. E aña aki nos tin un di e mihó selekshonnan di tur tempu. Kòrda ku nos selekshon a yega semifinal na dos okashon. Esei tabata tempu bon di nos selekshon. Remarkabel ta ku den e último WBC nos no a logra pasa e promé rònt.
* * * * *
Awe nos tin mas detaye di partisipashon di Hulanda den WBC di pasado. Aña 2006, e promé WBC. Nos a keda eliminá for di promé rònt ku rèkòrt di 1-2. E aña ei Shairon Martis a drenta historia pichando un "No-Hitter" kontra Panama, e wega a terminá 10-0. Esaki ta e úniko no-hitter den historia di WBC. Aña 2009 kaminda tabatin sorpresa grandi kontra e gran ekipo di Repúblika Dominikana. Hulanda a eliminá e faborito Repúblika Dominikana ganando di e ekipo aki na dos okashon. E viktoria di 2-1 den 11 inning pa eliminá e dominikanonan ta keda un di e sorpresanan mas grandi den historia di World Baseball Classic.
* * * * *
Pa loke ta 2013, nos a yega semifinal bou di mando di Hensley ‘Bam Bam’ Meulens. Nos a terminá na di 4 lugá, pero nos a gana Cuba dos biaha. Andrelton Simmons a bati un homerun klave den di 9 inning kontra Cuba pa despues nos gana riba un flai di sakrifisio walk off. Nos a pèrdè e semifinal kontra Repúblika Dominikana (ku a resultá kampion invikto). Segun nos, ta Andruw Jones a nota e kareda for di tersera riba bataso, e flai di sakrifisio di Kalian Sams kontra di Cuba. Esaki a duna Hulanda e viktoria di 7-6 riba Cuba. Einan Andruw Jones a bai bedei e manager di Cuba algun kos na momentu ku e wega a terminá.
* * * * *
Na 2017 nos a bolbe yega semifinal ku tremendo bateo di Wladimir ‘Coco’ Balentien. Coco Balentien a keda den e All-Star di e WBC e aña ei. Den e semifinal nos a pèrdè den un wega históriko 4-3 den di 11 inning (den tie-break) kontra di Puerto Rico. Nos a keda na di 4 lugá i na 2023 nos no a pasa e promé rònt. Esei ta historia di e selekshon di Hulanda den WBC promé ku nos start djabièrnè awor kontra di Venezuela.
* * * * *
Parse ku den FEBEKO tin mobilisashon pa bini ku un direktiva nobo. Algun fuente a informá nos un ku otro. Jedrek Magdalena, e aktual presidente, a yega di bisa ku si timnan ke otro presidente, e ta habrí pa hala un banda pa otronan bin dirigí. Diamond Stars League a start na Sam Bunting Ballpark djabièrnè siman pasá i nos lo tin mas detaye den e dianan benidero.Nos ta sigi e desaroyo di FEBEKO djaserka. Nos ta keda te aki pa awe. Te mayan ku Poder di Dios.
