Artemisia a sera aña i premia hungadónan Azucar tambe a sera aña
WILLEMSTAD- Djadumingu 19 di desèmber ekipo di Sòftbòl 50+ Artemisia a sera aña na Playa Caracasbaai. Den mesun evento e ekipo a premia hungadónan ku a destaká durante 2021. Hungadónan ku a destaká durante 2021 tabata Clifton ‘Kabibi’ Ostiana ku a risibí e premio di Hungadó Mas Valioso. Rudney Martina a resultá e Hungadó Mas Disipliná di 2021. Tabatin un tremendo ambiente serka Artemisia i ta spera hopi kos bon den 2022.
Ekipo Azucar a klousurá 2021
Ekipo Azucar tambe a bini huntu pa kòmbersá den bon ambiente aya na Koredó na altura di Marriot Hotel . E selebrashon kombiná ku beach party a start 9’or i terminá te den oranan lat di atardi djasabra 18 di desèmber. Azucar tin plan grandi pa reforsá nan ekipo formal den 2022 den Beisbòl Veterano. Tambe tin intenshon di bini ku un ekipo 50+ tambe. Riba e dos pòtrètnan por mira momentu di ambiente ku ekipo Azucar.
Informashon di Beisbòl i Sòftbòl
Fanátikonan di Deporte Korsou, bon dia. Bon Dos Dia di Pasku. Ekiponan a sera aña unu tras di otro. Ekipo di Sòftbòl di Liga 50, ekipo Artemisia a sera aña i premia nan hungadónan mas destaká. Azucar tambe a sera aña wikènt di 18/19 di desèmber Ekiponan mester a kuminsá prepará pa sera aña purá òf habri aña, mirando e medidanan ku a bini despues di dia 22 di desèmber.
* * * * *
Dos gran hungadó di Beisbòl Veterano, dos picher ta agente liber parse. Nan no ke pa menshoná nan nòmber i nos ta wanta un ratu. Ta trata di dos picher ku por dominá e wega relativamente fásil. Aña 2022 ta varios nòmber tin di hungadónan ku ta bai kumpli 40 aña i ta klá pa drenta Beisbòl Veterano. Varios 50+ a bisa klá ku nan ta bai dediká na 50+ so i yuda den 40+ ora tin mester. Di Sòftbòl 40+ i 50+ no tin muchu moveshon. Van Engelen Ballpark lo ta basta okupá den 2022. Nos a risibi informashon ku Fundashon Van Engelen Ballpark ta bai tuma Torneo Hope over i lo ta papiando ku e organisashon ku tabata pendiente pa organisá Torneo Hope. No ta konosi mes ku Hope 2022 lo por sigi debí na Covid-19 ku ketu bai ta bini ku variante nobo i komplikashonnan.
* * * * *
Awe nos ta sigi ku Resumen i nos tin ekipo Santa Maria Pirates ku a bira kampion di Beisbòl Veterano pa di dos biaha den nan historia. Santa Maria Pirates a bira kampion ganando di Isla Crackers 2-1 den e seri final. Isla Crackers a terminá kampionato regular invikto pa despues bin pèrdè 2-1 den final. Tur e serinan di play-off di Beisbòl Veterano a bai 3 wega, e dos semi-finalnan i despues e seri final. Un temporada eksitoso di Beisbòl Veterano ku e direktiva nobo enkabesá pa Shendy Cras. E temporada a kulminá dia 5 di desèmber na momentu ku Jandoret Raiders a bira kampion den 50+ di Beisbòl Veterano.
* * * * *
Nos tin algún informashon di ABC&S riba nivel di veterano 40 i 50 +. Pa 2022 lo tin Torneo ABC 50+ aki na Kòrsou. Sint Maarten a splika ku gastunan ta haltu i a disidí ku ta tene e torneo na Kòrsou. Sint Maarten i Boneiru lo tei na Kòrsou na 2022. Boneiru mester ta presente na Kòrsou na 2022 pa nan por haña e sede na 2023. Intenshon ta pa yega na 10 tim i lo partinan den dos pul . 6 tim di Kòrsou lo tei, 2 tim di Aruba, 1 di Boneiru i ta pendiente di un tim mas sea di Aruba òf di Kòrsou. No ta sigur ku Sint Maarten lo bini, ké mèn falta un ekipo pa forma 10. Weganan lo tuma lugá 27, 28, 29, 30 di aprel i 1 di mei. Promé di mei, Dia di Obrero lo kai riba djadumingu i probablemente lo tin un dia liber mas, dia 2 di mei 2022.
* * * * *
Weganan lo tuma lugá na Van Engelen Ballpark, pero mester tene kuenta ku Van Engelen Ballpark ta negoshando pa haña Torneo Hope ku ta supose di terminá den e dianan menshoná manera ya a bira un tradishon. Wikènt di Ascencion lo tin torneo di 40+ maskulino na Kòrsou. Nos a risibi informashon di Aruba tambe ku tin idea pa lanta un torneo internashonal ku yama Global Atletic Caribbean Series. E organisadؚؚónan lo invitá 10 ekipo di Liga 50 i lo tin un liga kaminda tur edat por hunga. Tres tim di Kòrsou ta poné pa partisipashon den e torneo ku ta Ban Serio, Lions i Pitufos. 3 tim di Aruba, 2 di República Dominicana, unu di Puerto Rico i un ekipo di Boneiru. Lo hunga 2 pul di 5 ekipo. E torneo aki lo tuma lugá alrededor di 26 di mei ku ta Ascencion.
* * * * *
Skibiendo di resumen, ta bon pa rekordá tambe ku Kòrsou a bira kampion di Caribbean Cup ganando di ekipo Cuba ku skor di 4-3 den un final dramátiko dilanti un públiko grandísimo den Tio Daou Ballpark riba un djasabra 3 di yüli. Ku e wega empatá na 1 Kòrsou a bai ariba 4-1 den di 8 inning. Cuba a bini fuerte bèk, pero keda kòrtiku. Momentunan grandi pa Beisbòl di Kòrsou kaminda nos hóbennan a hasi un tremendo trabou dilanti nos fanátikonan. Nos ta keda te aki pa awe.
