Deporte General - Atletanan sobresaliente den disputa pa “Kopa Bèto Adriana” awenochi na WTC

Atletanan sobresaliente den disputa pa “Kopa Bèto Adriana” awenochi na WTC

WILLEMSTAD.-Awe nochi Korsou ta para dilanti un bunita anochi di premiashon di nos deportistanan ku mas a sobresalí den 2022. Pa simannan largu FDOK a bin ta hasi e preparashon nesesario pa duna rekonosimentu na tantu deportista- komo dirigentenan ku den e aña tras di lomba a hasi nan máksimo esfuerso pa karga deporte di nos pais na laira.

Ku máksimo rekonosimentu pa tur e kategorianan di premiashon, tòg no tin duda ku por lo general e atenshon públiko ta hopi dirigí riba e 4 kategorianan di deportistanan mas sobresaliente di aña, ku lo ta den kompetensia pa e máksimo honor esta “Kopa Bèto Adriana”. Ta trata di nominadonan den kategorianan Femenino Hubenil i Senior komo tambe Maskulino Hubenil i Senior.

‍

KATEGORIANAN HUBENIL

Den e Kategoria Hubenil femenino lo tin un kompetensia fuerte entre e kabayista Sophia Schotte, e landadó Kyra de Cuba i e atleta di pista Zsa Zsa Frans.

Sophia a konta ku un aña hopi bunita den ekitashon, ku ta kabai di paso fino. Su 3er puesto den Mundial na Cali, Colombia, komo tambe oro den kompetensia na Rep. Dominicana ya ta bisa tur kos.

Kyra no ta keda’tras, ku un 2022 di hopi progreso den pisina. Tantu den kompetensianan lokal komo tambe internashonal el a bari ku medaya. Den Kompetensia Hensley Heerenveen e tabata bon pa no ménos ku 11 medaya, di kua 6 di oro. El a sigui pa ABC Swimming Competition i a ‘sweep’ ku 12 medaya, ku ta inkluí 11 oro. Den pisina internashonal na Rep. Dominicana el a gana 1 medaya di oro i 1 plata.

Riba pista di atletismo aki na Kòrsou Zsa Zsa tabata dominante den U-15. No solamente ku el a konkistá 17 oro, 3 plata i 1 bròns, sino tambe ku na 4 okashon el a kibra rèkert nashonal. El a hasi esei riba 60m Hurdles, 80m., 60m i Heptatlòn.

Pa loke ta kategoria Hubenil Maskulino, ta remarkabel ku aki e mesun 3 federashonnan ta keda representá, esta: Atletismo ku Rithemslij Daal, ekitashon representá pa Leonardo Winkel i natashon ku Jayen Viscaino.

Rithemslij ta e hóben di atletismo, un gran atleta riba disiplina di ‘high jump’. Aki na Kòrsou e ta invensibel, bon pa 4 medaya di oro den 2022. El a kompetí bou bandera di Kòrsou den ODESUR Junior na Argentina, kaminda el a konkistá medaya di plata.

Leonardo den 2022 a pone Kòrsou bek riba mapa pa loke ta trata ekitashon. E representante di Asosiashon Paso Fino Kòrsou a gana medaya di oro na Cali, Colombia, den kategoria Jinete 9 pa 11 aña. Tabata despues di seis aña ku Kòrsou ta bolbe gana oro den ekitashon den un Mundial.

Laga nos ban den pisina, kaminda ta topa ku Jayen, un dje orguyonan di Federashon Akuátiko Kòrsou. Un aña espektakular pa Jayen, un kosecha rikísimo di 29 medaya di oro, 10 plata i 10 bròns den 2022. Ku honor el a representá bandera di Kòrsou na Florida, Perú, Argentina, Pto. Rico, Aruba i Paraguay. Tambe na dos okashon el a kompetí riba laman ganchu aki na Kòrsou, ganando tur dos kompetensia.

KATEGORIANAN SENIOR

E sòftbolista J-dah Girigorie ta e strea indiskutibel di su ekipo i di selekshon di Kòrsou. Lesa bon, esta kampion pitcher Klase A ku rèkert di 6-0 pero tambe kampion pitcher ‘AA’ ku 14 viktoria i 1 derota. Esakinan a bai kompañá ku e premio MVP den ámbos kategoria. J-dah a gana medaya di bròns ku selekshon den South American Championship na Argentina, titulá kampion Latino Amerikano ku selekshon Senior na Pto. Rico, pa despues konkistá bròns den Senior League World Series na Delaware, USA.

Deporte di tènis di mesa tambe ta den kontienda, representá pa Marie-Antoinette Keli. Otro bon aña pa Marie-Antoinette, kampion invikto den Kopa FTMK pa despues den kampionato nashonal presta pa lo siguiente: sup kampion individual, kampion dòbel i sup kampion dòbel miksto. Kampion Divishon B i sup kampion Dutch Caribbean Tournament na Aruba.

Deporte di ekitashon ta representá pa Demi Schimmel. Pa motibu di estudio den eksterior e no a kompetí lokalmente, pero na momento di Mundial na Cali, Colombia, si e tabata presente i a gana medaya di oro den kategoria Amazona (18-21 aña).

Laga nos tira un bista serka e kabayeronan, kaminda Dimitri Leon (tènis di mesa), Dwinley Mathilda (bòkseo) i Matthew Sophia (atletismo) ta den kompetensia.

Dimitri su dominio den tènis di mesa ketu bai ta vigente. Kampion Kopa FTMK I sup kampion Kopa Harry Walters, siguí pa kampion Mini Olympics Divishon A i di dos lugá den kategoria Open. Medaya di plata den Dutch Caribbean Tournament na Aruba, pa despues rematá den kampionato nashonal ku e título máksimo tantu individual komo den wega dòbel. E ta sera aña ku e título den torneo Top 6.

Deporte di bòkseo ta lanta kabes ku Dwinley kende tabata hopi aktivo den 2022. E ta gana su promé pelea di aña na Aruba i ta sera aña ku otro viktoria riba suela arubano. Pero meimei di esei el a biaha pa Hulanda pa kampionato hulandes kaminda el a konkistá medaya di bròns den su kategoria. Mas aleu el a representá Kòrsou den ODESUR.

E kategoria ta sera ku atleta Matthew Sophia, Atletá di Aña di 2021. Na Kòrsou Matthew ta é atleta di 110m ku opstákulo, no tin diskushon. Despues el a kompetí den CARIFTA Games na Jamaica kaminda el a demostrá su klase, imponiendo den kategoria U-20 ku medaya di oro riba e disiplina.

E aña aki FDOK a agregá 3 kategoria nobo. Kategoria Enith Brigitha, Kategoria Yu di Kòrsou i Selekshon di aña. Esaki ta netamente pa honra nos atletanan ku ta biba den eksterior k uta Yu di Kòrsou i ku di un manera òf otro a sa di representa nos país dignamente.

Risibi esaki komo un kordial saludo pa huntu kubo nos disfrutá di un anochi ameno, kargá ku entretenimento/ premio i alabes instalá miembronan nobo den nos salón di fama, komparti ku nos “influencers” nan i hopi mas.

Djaweps 6 di aprel na World Trade Center lo sa ken ta e respektivo ganadónan

SALON DI FAMA

Federashon Deporte i Olímpiko Kòrsou ( FDOK) ta organisá su "Honorsnight ".

Riba e anochi aki lo instalá baluartenan den Salón di Fama i lo premia deportista- i dirigentenan deportivo ku a sobresalí den aña 2022.

Aparte di esaki e atletanan (Maskulino i/o femenino - adulto i/o hubenil) ku a destaká den nan respektivo ramo di deporte lo risibí un medaya di rekonosementu di Federashon Deporte i Olímpiko Kàrsou

Pa e anochi aki 6 baluarte lo keda instalá den Salón di Fama FDOK.

E baluartenan ta:

Sra. Norma Silvia Boeldak-Carolina (Sòftbàl)

Sr. Stanley Juan Ignacio (Aspafiko)

Sra. Lai Cam Jocette C. Coeriel-How (Karate)

Sr. Mirro M, Sabina (Weightlifthing)

Sr. Stanley Sixto Coffy (Futbàl)

Sra. Alejandra F. Rumai (Bodybuilding)

Durante e magno evento aki lo duna homenahe na 4 baluarte di nos deporte ku ta:

• Sr. Virgilio Constancia (Futbà[)

• Sr. Frank del Rosario Hoyer (Tennis)

• Sr. Gilbert Merien (Beisbàl)