Baluartenan di Beisbol Veterano pa 2021
WILLEMSTAD - Resientemente tabatin apertura ofishal di kampionato di Beisbol Veterano. A dedika e kampionato aki na 7 hungado 60+ ku ainda ta kompeti den 40+. Ta trata aki di Royston Privania di Azucar, Wendell van het Kruys di The Brothers, Fitzgerald Pieter (Jandoret), Renato Anasagasti di Jandoret, Erwin Curial (Yesterday) Norwin Moesquit di Bulldogs, Danchelo Moesker (Quality Star). Den un publikashon anterior a pone CV di Renato Anasagasti, Sor Moesquit, Fitzgerald Pieter, i Danchelo Moesker. Awe nos tin CV (hopi kòrtiku) di e otro 3 baluartenan, ku ta Wendell van het Kruys, Erwin Curial i Royston Privania.
WENDELL VAN HET KRUYS (THE BROTHERS)
Wendel van het Kruys, konosí pa tur hende komo Barry, a kuminsá hunga Beisbòl for di chiki den e bario di Groot Kwartier. Wendel a nase 6 di òktober 1961 i lo kumpli 60 aña òktober aki naturalmente. Semper van het Kruys a hunga Beisbòl den e bario di Groot Kwartier. For di 10 aña ela kuminsá hunga Beisbòl serka Ganga Chirino den Groot Kwartier Little, Senior League i Klase A. Ela hunga Dòbel A 3 luna. Despues ela bin bèk ku Slowpitch ku Catpower. Hunga hopi aña den Klase A (6 aña), bai Groot Kwartier atrobe den Beisbòl Veterano ku ekipo di Rudsel Poulina, despues ela a bai Otrabanda, despues Santa Maria i despues The Brothers. Wendell ta un di 7nan ku ta ketu bai aktivo ku 60+ òf yegando 60.
ERWIN CURIAL (YESTERDAY)
E hungadó ku mas edat den Beisbòl Veterano anto aktivo den 40+. E ta picha den 40+ ora tin mester. Erwin Curiel tin 68 aña i ainda ta aktivo. Erwin Curiel a nase 28 di aprel 1953. Erwin a kuminsá ku 14 aña den un tim di Jandoret ku yama South Sharks. Despues e tim a bira naturalmente Sharks. Den e tim ei tabatin Yubi Evertsz, Cosni Evertsz, Yuchero Liberia ets. Na 1974 Erwin Curiel a bai Santa Maria Pirates i a keda den Santa Maria te dia ku ela retirá. Erwin Curial a hunga bou di masha hopi manager den Santa Maria Pirates. Frank Curiel, Boebo Anasagasti tio di Nato Anasagasti, Gachi Thielman, Feo Sulvaran, Winston Obispo, Kenneth Gijsbertha i Dois Gijsbertha. Na 1995 mas o ménos den Beisbòl Veterano ERA nobo Erwin Curiel a djoin Yesterday i tei ku Yesterday i Yubi Evertsz te ku awe. Un aplouso speshal pa Win Curial ku ta e hungadó ku mas edat aktivo den Beisbòl Veterano.
ROYSTON PRIVANIA (AZUCAR)
Royston a nase 11 di sèptèmber 1960 i ta hunga den Azucar. Royston su stail di picha ta úniko, e ta saka e bala side arm òf under arm ‘bou di man’. E stail aki tabata konosí tempu di Rollie Fingers. Wak e snòr di Royston pa esnan ku ta kòrda tempu di Rollie Finger. Ken Tekulve, otro relivista konosí den Grandes Ligas, tabata tira side arm òf bou di man. Royston a kuminsá hunga Beisbòl den Senior League, despues Hubenil di Suffisant komo mucha di Suffisant. Royston a hunga serka Juan Piña, despues den e ekipo Oakland. Na 1983 Royston Privania a djoin e ekipo Blue Hawks i semper a hunga den Blue Hawks. Na 1984 Royston a hunga den selekshon di Beisbòl bou di Lipo Elhage i a tira tremendo na Cuba. Royston a start den Veterano ku ekipo Viejas Glorias huntu ku Juan Piña. Den Beisbòl Veterano Royston a hunga den Viejas Glorias, Yesterday, Vosama i Azucar.
