Ban Serio i Baranka ta klasifiká pa final di Liga 50 i Nos Tambe Por pa final di Liga 60
WILLEMSTAD- Ekipo Ban Serio i Baranka a klasifiká pa final di Liga 50 djadumingu atardi na Van Engelen Ballpark. Ekipo Baranka a dal Marlins 12-2 djasabra i 10-0 djadumingu pa klasifiká pa final di Liga 50 pa di 4 aña sigí. Den e otro seri e ekipo Ban Serio a logra klasifiká ku un viktoria di 7-6 djasabra riba Jaws i djadumingu Ban Serio a dal Jaws duru 13-2.
Ban Serio a klasifiká pa final ganando Jaws ku skor di 7-6 djasabra i 13-2 djadumingu.
E dos ekiponan a enfrentá otro den final di 2023 kaminda Ban Serio a logra di swip Baranka i bira kampion. Na 2022 Baranka a gana di Ban Serio den final i na 2021 Baranka a gana Pitufos den final. Den dianan benidero nos tin numeritonan di e 4 weganan. Final ta start djasabra 9 di novèmber na Van Engelen Ballpark. Wega number 2 lo tuma lugá 16 di novèmber i wega number 3 djasabra 23 di novèmber si ta nesesario.
Nos tambe Por ta gana Lions 10-1 i klasifiká pa final di Liga 60
WILLEMSTAD- Nos Tambe Por ku bon bateo, defensa i picheo a gana di Lions ku skor di 10-1 den e semi-final di Liga 60. E wega semi-final a tuma lugá djadumingu 3 di novèmber na Frank Curiel Ballpark dilanti un bon públiko. Nos Tambe Por a pika dilanti ku skor di 2-0 riba homerun di Winston Kirindongo.
Nos tambe Por no a pèrdè e ventaha mas i a bini gana e wega ku skor di 10-1 apoyá pa tremendo picheo di Siegfried Lopez. Nos Tambe Por lo topa Jaws den final djadumingu awor na Frank Curiel Ballpark. Wega number dos lo ta 17 di novèmber na mesun parke i si ta nesesario lo hunga dia 24 di novèmber. Siegfried Lopez tabata e picher ganadó di e wega i Gregory Martijn picher pèrdèdó. Den kurso di siman nos tin numeritonan di e partido.
MAS INFORMASHON S0FTBÒL I BEISBÒL
Fanátikonan di Deporte Kòrsou bonnochi. Nos ta den luna di novèmber i liganan ta yegando na final. Masha hopi play-off lo topa otro. Liga Amstel, Liga 40, Liga 50, Liga 60 i Beisbòl Veterano. Tur ta den novèmber aki. Ban spera ku tur lo terminá den novèmber tambe pa tur hungadó, dirigente i fanátiko tin tempu pa famia den luna di desèmber. Si awaseru permití, tur e play-offnan lo kaba den novèmber aki. Beisbòl Veterano tabata pa hunga su promé wikènt di play-off dianan 9 i 10 di novèmber, pero e wega entre Jandoret Raiders i Broncos a keda empatá i lo mester keda hunga komplatamente di nobo. Despues ta sigi semi-final dianan 24 i 25 di novèmber. Si serinan splet si.... Beisbòl Veterano lo terminá den desèmber.
* * * * *
Djasabra nos tabata presente na e torneo internashonal di Sòftbòl organisá pa Rising Phoenix. Ekiponan Rising Phoenix, Bonaire Angels, The Fighters, Nos Goso Dream Team i Treasure a kompetí den e torneo. The Fighters i Rising Phoenix ta mustra hopi stabil i kandidato pa yega final. Tremendo ambiente aya na Sam Bunting Ballpark i esnan di Boneiru i Hulanda a gosa un bòl di nos isla. Ya, hopi wega riba otro si, pero no tin moda di hasi. Timnan mester hunga un wega so pa dia i riba e fecha final un òf dos wega. Ultimo tempunan nos ta ripará ku ekiponan ta bai afó i hunga 5 pa 6 wega den 3 dia ku ta hopi. Den e parti final ta hopi leshon i kansansio tin. E gran final mester a tuma lugá djadumingu 8’or pm entre number 1 i 2 di e 6 ekiponan menshoná, den lat nos a tende ku ekipo the Fighters a bira kampion i Rising Phoenix na di dos lugá.
* * * * *
Play-off Liga 40 ta start djamars 5 di novèmber na Van Engelen Ballpark. Ekiponan ku a klasifiká ta Gamers, Baranka, Swift i Cicoza. Djamars tabata Cicoza vs Swift pa 7.30 i despues pa 9.30 ta Baranka/Gamers. Barwacht ta na enkargo di Jaws. Cicoza a gana Swift i Baranka a nokout Gamers. Djaweps 7 di novèmber ta Gamers vs Baranka pa 7.30 pm i despues Cicoza vs Swift pa 9.30 pm. Ta trata di un play-off page system seri mihó di 3. Gamers a terminá number 1, Baranka number 2, Swift number 3 i Cicoza number 4. Djamars 12 di novèmber si mester lo hunga wega number 3 di e serinan. E seri di e pèrdèdó 1 vs 2 kontra pèrdèdó 3 vs 4 lo start dia 14 di novèmber.
* * * * *
Nos a warda e di dos parti di e kolumna aki pa nos elaborá riba e play-offnan di Liga 50. Ban Serio i ekipo Baranka a klasifiká pa final. E dos ekiponan aki a gana di ekiponan Marlins i Jaws den e semi-final. Remarkabel ta ku ekiponan ku a klasifiká number 1 i 2 di temporada regular a kai afó i ekiponan 3 i 4 a klasifiká pa final. Aña 2023 tabata mesun ekiponan aki ku a klasifikؘá pa final i tabata ekipo Ban Serio ku a bira kampion. Na 2022 ekipo Baranka a gana di Jaws den final. Bon públiko tantu riba djasabra komo djadumingu pa mira e weganan di semi-final. Baranka a simplemente pasa riba Marlins pa medio di nòkout (12-2 i 10-0), miéntras Ban Serio mester a lucha formal den wega number 1 djasabra pa gana 7 pa 6 i djadumingu si a bai fásil kaminda Ban Serio a gana 13 pa 2.
* * * * *
Pa loke ta Liga 60 e ekipo Nos tambe Por a gana Lions relativamente fásil ku skor di 10-1 pa pasa pa final kontra ekipo Jaws. Djadumingu 27 di òktober Jaws a gana di Nos Tambe Por ku skor di 5-4 i pasa dirèkt pa final. Lions a gana di Pitufos 4-0 den e seri 3 kontra 4, pero a kai vensí ku kontra di Nos Tambe Por djadumingu último. E seri final lo ta un seri mihó di 3 i lo start djadumingu 10 di novèmber. Lo sigi 17 di novèmber i si ta nesesario 26 di novèmber. Den kurso di siman nos lo tin mas detaye.
* * * * *
Ekipo Los Amigos/Viajeros a move pa Medellin djadumingu ku un delegashon basta grandi. Nan lo hunga den un torneo 60+.E delegashon a yega bon djadumingu mèrdia na Bogota i a move pa Medellin. Djarason na a gana un wega 5 pa 4 kontra Hotel Prada i pèrdè e otro 13-3 vs Bogota. Nos ta keda te aki pa awe. Te mayan ku Poder di Dios.
