Ban Serio ta dal Jaws duru den Liga 50 i suta Catpower 37 pa 3
WILLEMSTAD- Ban Serio ku un ofensiva serio a nòkout Jaws ku skor di 19 pa 6 djasabra 17 di yüni na Van Engelen Ballpark. Ban Serio tabata atras 5-0 te den di 3 inning, pero ta nota 12 kareda ku dos granslam den di 3 inning pa bòltu e skor i keda dilanti den e wega. Djasabra 24 di yüni Ban Serio a dal Catpower 37-3, feros na Van Engelen Ballpark. Ban Serio a bati 10 homerun, Luigi Yanez, Kelvin Winklaar i Sherdon Rombley a dal dos homerun, vários otro hungadó a dal un homerun. Den otro wega Marlins a dal Sluggers 7 pa 2, Lions a zona Artemisia 23-0 i Baranka ketu bai invikto a dal Pitufos 15-2. Weganan ta sigi djasabra awor na Van Engelen Ballpark.
Ban Serio 19, Jaws 6
Ban Serio a dal 14 hit i hasi 3 eror. Norman ‘ Nonnie’ De Roon tabata e picher ganadó. Reinaldo Casimiri a bati di 3-3. Jair Josepha, Charlton van Thijs i Winston Kirindongo a dal un homerun. E homerunnan di Charlton van Thijs i Winston Kirindongo tabata grandslam. Jaws a bati 7 hit i hasi 4 eror. Ralph Hermans tabata e picher pèrdèdó. Victor Caldera a bati di 2-2.
Marlins 7, Sluggers 2
Marlins a bati 10 hit i a kometé 1 eror. Gilbert Henrietta a gana. Eugene Antonia a bati di 3-2. Jeffrey Martina, Johnny Balentina, Eddy Obispo, Gibi Henrietta i Shernold Martina a bati di 1-1.
Sluggers a dal 5 hit i hunga sin eror.Eldred Bakker tabata e picher pèrdèdó. Hubert Cicilia a bati di 1-1.
Lions 23, Artemisia 0
Lions a konektá 18 hit i hasi 1 eror. Fabiani Orcadio a bati di 4-3, Hubert Sakoete di 2-2. Sendy Marcelia i Gurtney Adriana a bati di 1-1. Fabiani Orcadio a dal un homerun. Artemisia a dal 3 hit i kometé 2 eror. Wederfoort tabata e picher pèrdèdó. Rudney Martina i Charles Daal a bati di 1-1.
Baranka 15, Pitufos 2
Baranka a dal 13 hit i kometé 2 eror. Kenny Hellement tabata e picher ganadó. Shendy Cras a bati di 4-4. Fisel Pereira i Robertico Ramazan a bati di 3-2. Emmeric Agata a bati un homerun.
Pitufos a konektá 5 hit i hasi 2 eror. Sidney Lourens tabata e picher pèrdedó i Abigail Vilchez a bati di 1-1.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon tardi. Nos ta sigi manera ta e kaso tur siman i nos tei atrobe ku hopi informashon di Sòftbòl i Beisbòl. Swift a bira kampion invikto di Liga van Engelen. Segun nos ta promé bia ku Swift a bira kampion invikto den un kampionato. Den historia ta masha tiki ekipo a bira kampion invikto den un temporada ku mas ku 15 wega. Nos ta referí na kampionato i play-off adén. Ta Pichingolo tin e rekòrt aki den algun kampionato i den Slowpitch ta Catpower tin e rekòrt aki na dos okashon tempu di nan tempu. Na 1995 den Liga Trai Seru ku nan a kampionisá invikto i na 2006 den Liga 40.
* * * * *
Bon chèns pa nos bai bèk den tempu atrobe ku Sòftbòl Slowpitch. E popular deporte aki tin hopi historia. Historianan for di promé ku 1970. Ekiponan ku mas historia ta Jaws, Swift, Navegantes i Cicoza tin hopi aña. Ta ekiponan ku 50 i 40 piku aña di eksistensia. Baranka i Catpower tambe tin riba 30 aña. Den Beisbòl Veterano ta Otrabanda ta e ekipo ku mas tempu sigí pa Azucar ku tin hopi historia, pero den Beisbòl Dòbel A i Klase A. Yesterday di Yubi Evertsz un tempu tabata Athletics ku tei for di promé ku aña 80 tempu di Nutrament. Yubi Evertsz a move ku Grapette Athletics na komienso di aña 80. Boso ta kòrda e limonada Grapette.
* * * * *
Basta ekipo despues di aña 2000 a bai move den 40 i 50 so. Entre otro Marlins i Catpower lo keda move den Liga 40/50 so. Marlins mas promé i Catpower despues ku e ekiponan a move laga Liga Trai Seru bai Suvek (Van Engelen) mas o ménos aña 2008. Catpower a wanta un ratu ku timnan di hóben. Tantu Marlins komo Catpower tin ekipo di 50+ so den e ERA moderno aki. Na 2006 Catpower a sali kampion invikto i despues ekipo Baranka a bin dominá den Liga 40 i despues Baranka huntu ku Happy Stars. Tabata parse ku Crazy Tigers lo bai komandá i dominá den Liga 40, pero na 2022 Swift a bira kampion. Djamars mester tabatin wega number 1 di e gran final entre Crazy Tigers i Baranka den Liga 40, Baranka a pika dilanti ganando 10-6. Djaweps nan a gana 20-9 i bira kampion di Liga 40. Keda pendiente pa mas detaye despues.
* * * * *
Na aprel 2004 tabatin e promé ABC veterano na Kòrsou. Tabata un ABC di 40/50 organisá pa Marlins. Ingemar ‘Maal’ Jonis huntu ku Mati Oehlers tabata den pa Rising Trotters. Maal tabata 40+ miéntras Oehlers ta 50+. Jozef Martina ya riba 60+ den Liga 50 tabata parti hit rònt tereno. Un dje grandinan di tur tempu ku nos a pone su historia aña pasá den korant Extra. Mango Marks tabata hungando pa Marlins 40+ , Roland Mingeli un dje gran pichernan di tur tempu den Slowpitch tabata ku Marlins den 50, pero ya leu riba 50 dominando ketu bai. Mirto M.T. Martina ketu bai tabata sakando di homerun den 50 rumbo pa 60.
* * * * *
Bèk pa Swift, e ekipo a bira kampion invikto den Kopa ABC tambe. Esei naturalmente ta ménos wega. Swift a gana 8 wega den Kopa ABC&s pa bira kampion pa di 5 aña sigí den luna di mei aki na Kòrsou. Bari Swift a bari e aña aki den Liga van Engelen. Tempu di Baranka, Dalpega, Buena Vista Power ta kandela tabatin i kompetensia fuerte. Na momentu ku e ekiponan aki a disidí di bai laga e liga, e kompetensia a bira ménos i Swift a keda bira kampion unu tras di otro. Baranka a bira kampion di Liga van Engelen na 2014 pa último biaha. 2013 tabata Dalpega ku a bira kampion di Liga van Engelen.
* * * * *
Pa loke ta trata Beisbòl Veterano, djadumingu awor pa 1’or Santa Rosa Memories lo topa ku Santa Maria Pirates den Beisbòl Veterano. Santa Maria Pirates tin rekòrt di 3-1 i Santa Rosa Memories ta invikto ku rèkòrt di 4-0. Djasabra 1’or tambe tin un bon wega na momentu ku Isla Crackers topa ku Vosama. Skèdjel kompletu den Beisbòl Veterano ta djasabra 24 di yüni: The Brothers – Otrabanda, 13.00 Isla Crackers – Vosama, 15.30 Azucar – Yesterday. Djadumingu 10.30 Marchena Stars – Quality Stars, 13.00 Santa Rosa Memories – Santa Maria Pirates, 15.30 Marlins – Jandoret Raiders. Nos ta keda te aki pa awe.
