Ban Serio ta swip Baranka i bira kampion Liga 50
WILLEMSTAD- Ban Serio a gana Baranka ku skor di 11-5 den e di dos wega di final i bira kampion Liga 50 kampionato 2025. E wega aki a tuma lugá djasabra 25 di òktober dilanti un bon públiko na Van Engelen Ballpark. Ban Serio a gana e promé wega djasabra 18 di òktober ku skor di 8-6. Michelangelo ‘Galbou’ Boekhoudt a tira i gana tur dos wega di final pa bira MVP di e seri final. Ban Serio atras ku skor di 1-0 ta probechá di algun eror di Baranka den di 3 inning pa nota 8 kareda bai ariba 8-1 i no a pèrdè e ventaha mas durante e wega. Baranka a bati bèk i trata na yega serka, pero a keda kòrtiku. Despues di wega tabatin entrega di premio individual i di ekiponan. Tambe a honra baluarte- i kolaboradónan di Liga 50 ku ta Pim Fangman, Maal Jonis i Robert Klooster.
NUMERITONAN
Ban Serio a skor na 11 okashon bati 13 hit i hasi 1 eror. Michelangelo Boekhoudt tabata e picher ganadó. Bryon Kook a bati di 3-2 ku un homerun. Luigi Yanez a bati di 4-3. Baranka a nota 5 kareda, dal 12 hit i hasi 2 eror. Kenny Hellement tabata e picher pèrdèdó i ela risibí relevo di Fisel Pereira. Fisel Pereira, Djuric Pieters, Emmeric Agata, Sherwin Schoop i Dennis Dambruck a bati di 3-2.
PREMIONAN
Kampion: Ban Serio.
Supkampion: Baranka.
Di tres lugá: Jaws.
MVP Final: Michelangelo Boekhoudt (Ban Serio).
Kampion bate: Irving Sambo (Marlins).
Lider di homerun: Ramiro Balentina (Baranka).
Kampion picher: Fernando Rosario (Jaws).
Baluarte kolaboradó di Liga, Maal Jonis ta risibí rekonosimentu.
Robert Klooster kolaborador finansiero di Liga 50 ta risibí rekonosimentu.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Djasabra 25 di òktober den oranan di atardi ekipo Ban Serio a bira kampion di Sòftbòl Liga 50 ganando ekipo Baranka ku skor di 11-5. Michelangelo ‘Galbou’ Boekhoudt a tira wega number 2 i e mes a tira wega number 1 pa bira picher ganadó di tur dos wega i MVP di e seri final. Hopi fanátiko a presentá atrobe pa mira e gran final di 50+. Ban Serio a bira kampion despues ku nan a pèrdè e título na 2024. 2023 Ban Serio tabata kampion. E ekipo dirigí pa Jerry Booi ta den un tremendo racha den 2025. Nan a gana Kopa ABC&S na Sint Maarten i awor nan ta sali kampion di e kampionato di 2025. Den e artíkulo i den e kolumna aki nos lo tin mas detaye.
* * * * *
Ekipo Un Kara a bira kampion di Liga di Nos Tur 2025. Djabièrnè ekipo Un Kara a gana Shining Stars 16-1 i djasabra 13-1. Dos viktoria relatívamente fásil di e ekipo dirigí i fundá pa Pepi Martis i Gerald Mathilda. Un Kara tabata kampion na 2022 i Sin Stres ku a keda eliminá for di final tabata kampion na 2023 i 2024. Despues di wega tabatin entrega di premio i den kurso di siman nos lo tin mas detaye. Awe nos tin reportage amplio ku pòtrèt i entrega di premio di Liga 50 Sòftbòl Maskulino. Den Beisbòl Veterano Quality Stars a gana di Santa Maria Pirates ku skor di 9-8 den e promé wega di e gran final. Santa Maria tabata ganá 8-0 i despues 8-1, 8-3 i den e último inning ganá 8-6. Ekipo Quality Stars komo ekipo di kas ta nota 3 kareda den nan último chèns pa laga Santa Maria Pirates den tereno. Yurendell de Caster a picha wega kompletu pa Santa Maria Pirates i no a risibí respaldo di su kompañeronan den defensa. Ela tuma 9 kareda di kual 4 tabata shushi. Di otro banda Xaviero Avastia a relevá tremendisimo. Mario Mujica a habri wega i bai solamente 2 tersio di inning i tuma 7 kareda. Xaviero Avastia a tira 6 inning i un terserio i tuma solamente 1 kareda pa bira e picher ganadó pa Quality Stars.
* * * * *
Miéntras tantu ekiponan di Liga 50 di Beisbòl Veterano ta pendiente pa hunga e gran final djadumingu 2 di novèmber. Ekipo Wak E Kos ku a klasifiká number 1 a gana di Volcano 16-6 djadumingu pasá. Volcano a klasifiká number 4 i a keda eliminá naturalmente. Santa Rosa Royals a gana Jandoret 6-4 i a pasa pa e final. Wak e Kos di Moises Zimmerman lo topa Santa Rosa Royals di Shendy Cras. Jandoret Raiders ku ta kampion 6 biaha den 8 kampionato a keda afó. No ta sigur ku Jandoret Raiders lo ta den 50+ pa otro aña, debí ku e ekipo a djòin Liga 50 di Sòftbòl. Jandoret Raiders a kuminsá ku Sòftbòl Slowpitch den Liga Trai Seru na 1996 i ta rumbo pa selebrá 30 aña di eksistensia. 30 aña stret kompetiendo den liganan di Sòftbòl i Beisbòl Veterano. Algun nòmber di hungadónan di 50+ ta entre otro Gerthon Matrona, Roque Zimmerman, Jair Josepha, Eldred Estanista, Omar Valies, Skippy Sambo, Kelvin Winklaar, Luigi Yanez, Byron Kook, Francisca Alcantara, Jurien Martina, Lindomar Cathalina, Winston Kiridongo i Roderick Postina di Wak e Kos.
* * * * *
Ekipo Santa Rosa Royals tin hungadónan manera entre otro Ian Leito, Edmond Martina, Farley Girigori, Hensley Josephina, Shendy Cras, Jair Quant, Orsendo Clemencia, Geronimo Daflaar, Cedric Antonia, Raymy Cicilia, Rolling Eustatius, Curby Brunken, Djuric Pieters, Pon Pon Martina i otronan. Nos a warda espasio pa resumí kon a bai ku Beisbòl Veterano i Liga 60. Ekipo Quality Stars a gana Santa Maria Pirates ku skor di 5-4 i bira kampion di Beisbòl Veterano 2025 di e kategoria 40+. Nos a skibi na komienso di e artikulo ku Quality Stars a gana Santa Maria 9-8 den e promé wega djasabra. Den kurso di dianan nos tin mas detaye i pòtrèt di entrega di premio. Den Liga 60+ ekipo Nos Tambe Por a nòkout Lions i kibra invikto di Lions. E kombinashon di Wim Felicia i Galbou Boekhoudt tabata e pichernan pa Nos Tambe Por. Nos ta keda te aki pa awe i mayan ku Poder di Dios.
