Playoff final Liga 50 ku wega finalisimo i playoff semifinal Beisbol Veterano
Gran final Liga 50 entre Jandoret Raiders i Baranka e djasabra 2'or na Van Engelen Ballpark
WILLEMSTAD — E momento a yega, e wega finalísimo di e kampionato di Liga 50 lo tuma lugá e djasabra aki pa 2'or di atardi na Van Engelen Ballpark, enfrentando e ekiponan Jandoret Raiders i Baranka den un bataya desisivo pa saka e kampion. E seri final ta tremendisimo kaminda e fanátikonana gosa un ból. Den e promé wega hungá djasabra 24 di òktober, Jandoret Raiders a kue e viktoria ku un skor di 15-11. Sin embargo, Baranka a kontesta djasabra 31 di òktober ku skor di 11-4 den e di dos enkuentro, nivelando e seri obligando e wega di finalisimo djasabra. Durante e temporada regular tur dos ekipo a gana un wega kontra otro. Despues di e partido final lo tin e seremonia di entrega di premio i, probablemente, transmishon en bibu via Sport.cw pa tur fanátiko ku no por ta presente na Van Engelen Ballpark.
NUMERITONAN WEGA NO 2.
BARANKA 11, Jandoret Raiders 4
Baranka a bati un total di 10 hit i a kometé 0 eror, miéntras ku Jandoret Raiders a bati 10 hit i a kometé 1 eror. Pa Baranka, Ramiro Balentina a bati di 1-1 ku un homerun, 3 kareda empuhá, 3 base por bola i 3 kareda anotá. Robertico Ramanzan a bati di 3-2 ku un doblete i 4 kareda empuhá, i Gregory Bito a bati di 3-1 ku 1 kareda empuhá i un fly di sakrifisio. Pa Jandoret Raiders, Earl Virginia a bati di 3-3 ku 2 kareda empuhá. Mayron Wijman a bati di 1-1 ku un doblete, 2 base por bola i 2 kareda anotá, miéntras ku Jeffrey Martina a bati di 2-1 ku un kareda empuhá i un base por bola. E picher ganadó tabata Kenrick Hellement di Baranka, kende a picha 7 inning kompletu permitiendo 10 hit i 4 kareda limpi ku 2 ponche. E picher pèrdèdó tabata Gregory Martijn di Jandoret Raiders, kende a picha 3.1 inning permitiendo 3 hit i 6 kareda (5 limpi).
Dos wega di semifinal di Beisbòl Veterano djasabra na VI Jansen Ballpark
WILLEMSTAD - Playoff semifinal di Beisbòl Veterano ta sigui ku dos wega na Vi Jansen Ballpark. E grandinan di Beisbòl Veterano lo topa otro pa 11’or i 2’or. Djasabra 7 di novèmber den e promé wega pa 11’or Santa Rosa lo topa ku Broncos i despues 2’or pm ekipo Santa Maria Pirates lo topa ku Quality Stars. Den e kampionato regular i Round Robin Santa Rosa a gana Broncos 3 biaha (10-0, 9-1, 10-0) i playoff semifinal un biaha (23-0). Santa Rosa tin Broncos fásilmente dominá e aña aki. Pa loke ta e otro seri, ta Santa Maria kontra Quality. Promé buelta Santa Maria a gana Quality 10-3, di dos buelta Santa Maria a gana atrobe 2-1. Den e Round Robin Quality a gana Santa Maria 12-2. Den e promé wega di playoff Santa Maria a gana Quality 9-1.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bonochi i felis fin di siman. Fin di siman kandela pa loke ta trata e playoffnan di Sòftbòl Slowpitch i Beisbòl Veterano. Djasabra pa 2’or tin e gran final, e wega finalísimo entre Baranka i Jandoret Raiders. E ganadó di e wega aki ta kampion di Liga 50 pa aña 2026. Jandoret ta pa promé biaha den un final, miéntras ku e ekipo di Baranka a yega final for di 2021 te ku awor i nan tin 3 título den nan poder. Baranka a bira kampion na 2021 i 2022. Ban Serio na 2023, Baranka na 2024, i Ban Serio atrobe na 2025. Jandoret, ku a drenta Liga 50 na 2025, ta yega final e siguiente aña di nan debút den e liga.
• * * * * *
Último añanan ta e ekiponan di Ban Serio i Baranka tabata komandá den Liga 50. Na 2015 tabata e ekipo di Pitufos ku a bira kampion; despues tabata ekipo Marlins ku a bira kampion na 2016, i seguidamente Ban Serio na 2017, 2018 i 2019. Na 2020 no tabatin final debí na COVID-19. Liga 50 ta un liga ku semper a hala hopi fanátiko, i djasabra último Van Engelen Ballpark tabata kargá di públiko. Mester bisa ku e lugánan pa sinta ta hopi amplio na Van Engelen Ballpark si konta e tribunanan ku ta den left i right field, i mas den profundo di e liñanan di left i right. E torneo ABC&S di Liga 50 2026 a tuma lugá na Kòrsou ku ekipo di Ban Serio komo kampion, i pa 2027 e evento di ABC&S 50 lo ta na Boneiru.
• * * * * * *
Mas playoff e fin di siman aki ta den Beisbòl Veterano djasabra kaminda e ekipo di Santa Rosa Memories lo topa ku Broncos pa 11’or di mainta, i pa 2’or di atardi tin kandela grandi entre Santa Maria Pirates i Quality Stars. Quality Stars lo bai duru pa por logra empata e rèkert di Jandoret Raiders, ku a bira kampion 5 aña sigí di 2014 pa 2018. Quality Stars ta kampion di 2022 te ku 2025. Quality Stars a bira kampion na 2020 tambe den un final históriko kaminda e wega final a tuma lugá na 2021 den Stadion Johnny Vrutaal. E final di 2020 a keda suspendé na e momento ku polis a subi tereno i para e wega den pleno temporada di COVID-19.
• * * * * *
Mas playoff e fin di siman aki ta djadumingu, kaminda e ekipo di Los Amigos lo topa ku Lions den e semifinal di Liga 60. Den e promé buelta di e playoff Page System, e ekipo di Lions a gana Nos Tambe Por ku skor di 16-0 i pasa pa e siguiente buelta, miéntras ku Los Amigos a pèrdè 10-4 kontra Pitufos. Djadumingu awor ta kandela tin, i bin mira hungadónan manera Renato Anasagasti, Deron Clara, Pito Postina, Manolo Gomez, Gibi Henrietta, Richel Baromeo i otronan di Los Amigos kontra e streanan di Lions manera Winston Kirindongo, Gregory Martijn, Pazia Rosario, Pitufos Lourens, Raichel Leitoe, Ronchel Daal i otronan. E ekipo di Los Amigos ta bou di direkshon di Renato Anasagasti, miéntras ku Lions ta keda dirigí pa Hayworth Phelipa.
• * * * * *
E selekshon U-18 di Beisbòl di Kòrsou ta bèk na Kòrsou despues di nan partisipashon na e Kampionato Panamericano U-18 na República Dominicana. Nos selekshon a sali pèrdè kontra República Dominicana ku skor di 13-7 den un wega kaminda a kometé hopi eror. Segun mánager Gionelo Jansen, tabatin chèns di gana e wega ei si e defensa a tene duru. E siguiente wega tabata kontra USA, kaminda nos a kai vensí ku un skor grandísimo di 20-2, kaminda mester bisa ku e ekipo di Merka tabata superior. Nos a logra gana di Brasil i Cuba, pa asina klasifiká na di 9 lugá entre 11 pais. Un aktuashon no bon, pero mester bisa ku hopi di e prospektonan pa firma i otronan ku ta den Dominican Summer League no a haña pèrmit pa hunga.
• * * * * * *
Nos no a bai ku nos mihó hungadónan. E posishon final di e standing tabata: USA, Venezuela, República Dominicana, Nicaragua, Puerto Rico, Panama, Canada, Mexico, Kòrsou, Cuba i Brasil. Picheo ta nos problema grandi, i mester bisa ku nos hoben nan no ta masha interesá den pichamentu. E aktuashon di nos selekshon di fùtbol U-15 pa loke ta trata e fùtbol tambe tabata pober na Azerbaijan den e FIFA U-15 World Cup & Festival. Nos a pèrdè ku skornan grandi, i den e kaso aki a hunga solamente ku hungadónan ku ta biba na Kòrsou. Nos ta keda te aki pa awe, te djaluna ku Poder di Dios.
