WILLEMSTAD- Baranka a dal Marlins 15-5, Ban Serio a gana Jaws pèrtá 13-12 den e promé fecha di play-off semi-final di Liga 50 djadumingu 8 di òktober. Djasabra 7 di òktobr e weganan entre e ekiponan ariba menshoná a keda suspendé pa motibu di awaseru i mal estado di tereno. Playoff ta sigi djasabra 14 di òktober pa 10’or Jaws vs ban Serio i despues pa 12’or Marlins vs Baranka.
Djadumingu 8 di òktober pa 10’or di mainta Baranka a presentá fuerte i a nòkout Marlins den di 6 inning. Baranka a dal 5 homerun, entre otro dos homerun di Shendy Cras i grandslam di Grensley ‘Tutuchi’ La Croes. Gino Valeriaan a tira wega kompletu pa Baranka pa bira e picher ganadó i Marlins a usa 3 picher. E di dos wega di playoff a tuma lugá 2’or di mèrdia despues di un wega di play-off di Liga van Engelen. Den e wega ei Ban Serio a nota 3 kareda den nan último chèns pa bòltu e skor di 12-10 pa Jaws i hasi e wega 13-12. Jaws komo ekipo di kas e embasá un batiadó pa base por bola, pero a keda kòrtiku den nan último chèns.
Baranka 15, Marlins 5
Baranka a dal 15 hit i hasi 1 eror. Picher ganadٕó tabata Curtly ‘Gino’ Valeriaan. Dennis D’Arnault i Edmar Cornelia a bati di 3-3. Edmar Cornelia, Grensley La Croes i Myron Wijman a dal un homerun. Shendy Cras a dal 2 homerun. E homerun di Grensley La Croes tabata un grandslam.
Marlins a bati 8 hit i hasi 1 eror. Gilbert Henrietta tabata e picher pèrdèdó. Randolph ‘Johnny’ Balentina a bati di 4-2. Johnny Balentina a dal dos homerun, Mairon Martinus a dal un homerun.
Ban Serio 13, Jaws 12
Ban Serio a dal 11 hit i hasi 3 eror. Norman de Roon tabata e picher ganadó. Miro Daal i Luigi Yanez di 2-2. Reinaldo Casimiri i Renato Anasagasti di 1-1. Eldred Estanista a bati un homerun.
Jaws a bati 11 hit i a kometé 2 eror. Fernando Rosario tabata e picher pèrdèdó. Xaviero Avastia a bati di 2-2, Carlos Madera di 1-1. Sigbert Juliana i Xaviero Avastia a dal un homerun.
%20copy.jpg)
Fanátikonan di Deporte Kòrsou, bon dia i felis wikènt. Djasabra siman pasá awaseru a kai na varios parti di Kòrsou i pone ku a suspendé algun wega. Awa no a kai duru, pero weganan di playoff di Liga 50 a keda suspendé djasabra na Van Engelen Ballpark. E weganan a sigi djadumingu na Van Engelen Ballpark entre Baranka number 1 i Marlins number 4, despues tabatin Ban Serio number 2 kontra Marlins number 3. Baranka i Ban Serio a pika dilanti den e promé weganan di playoff.
* * * * *
Na Vi Jansen e promé wega di Beisbòl Veterano di djasabra a keda suspendé pa motibu di awaseru. E otro dos weganan si a sigi. Santa Maria Pirates a gana di The Brothers ku skor di 10 pa 3 den e wega di 1’or djasabra. Un wega ku no tabatin eror i Eldred Estanista a gana pa Santa Maria ku relevo di Signald Paz. Cedric Koffy a habri pa ekipo The Brothers. Tin un lucha formal entre The Brothers, Jandoret, Vosama i Yesterday pa terminá number 5 i 6. Ta 6 ekipo ta klasifiká den Beisbòl Veterano. Den e otro wega di djasabra Azucar a gana Otrabanda Veterano ku skor di 10-0. Azucar su rèkòrt a bira 6-12. E wega ku a keda suspendé djasabra tabata entre Yesterday i Vosama, ekiponan ku ta number 7 i 8. Nan ta ainda den lucha pa yega klasifikashon. E wega ei mester tuma lugá na momentu ku e buelta regular terminá. Dia 29 di òktober tin e último weganan pa loke ta trata e buelta regular i mester bisa ku probablemente playoff lo mester move ku un siman.
* * * * *
Nos ta bai un ratu pa MLB kaminda a start ku serinan di divishon. Texas a swip Baltimore 3-0, Houston a gana e seri 3-1 di Minnesota. Arizona a sweep Los Angeles Dodgers i djaweps anochi Phillies a elimna Atlanta Braves ganando e seri 3-1, e último wega a kaba 3-1. Atlanta a defroudá i fanátiko di Kòrsou i tabatin manera miedu di Philadelphia ku a termina 14 wega tras di Atlanta durante kampionato regular. Den e promé wega djasabra den un wega kayente i pèrtá ekipo Texas a gana di Baltimore ku skor di 3-2. Den último inning Baltimore komo ekipo di kas pèrdí ku skor di 3 pa 2 a manda e koredó Gunar Henderson roba. Henderson a habri e inning ku hit pa right. E kècher di Texas Jonah Heim a bula e koredó Henderson na segunda. E batiadó di Baltimore ku tabata na bate tabata e èks Yankees Aaron Hicks. Práktikamente no ta hunga toke mas den MLB, pero segun dianan ta bai den play-off nos lo tin algun toke di sakrifisio. Despues Hicks a poncha pa di dos out i e sigiente batiadó a dal rolling suak pa tersera pa terminá e wega. Awor aki ta gana ta konta sea via toke òf via kualke otro wega chiki. Djasabra tabatin 3 skor pèrtá djasabra i e skor habri den e wega kaminda Arizona Diamond Backs a dal Clayton Kershaw hopi duru. Arizona a dal Los Angeles Dodgers ku skor di 11-2 i gana e 2 otro weganan fasil.
* * * * *
Atlanta Braves ku a bati 307 homerun durante temporada regular a stèns un tiki riba e homerunnan i tabata hopi swing grandi na momentu ku tabatin koredó den posishon di nota i a keda kòrtiku pendiente pa blankeo 3-0 kontra Philadelphia Phillies djasabra. Pa djasabra Atlanta Braves tabata pendiente pa bini ku nan nan estelar Max Fried pero ya ta lat, te 2024.. Houston kargá ku eksperensha di play-off e último 7 añanan a gana Minnesota 3-1 den e seri. MLB divishon series tabata interesante interesante. Play-off di Liga ta start djasabra na Houston i djaluna na Philadelphia. Telecuracao no a skohe e seri ku nan lo transmití ainda.
* * * * *
Play-off Liga van Engelen a sigi djadumingu na Van Engelen Ballpark, weganan di Liga Amstel a keda suspendé djasabra. Ekipo Jaws a swip Clase Aparte i klasifika pa final kontra Swift den Liga van Engelen. Den Liga 40 djaweps siman pasá Swift a dal Jaws duru ku skor di 14-4. Tene kuenta ku Emilio Velarde, e gran picher Venesolano di Swift tei bèk despues ku na 2022 e no a hunga Liga 40 masha. Den e otro wega Baranka a blackout Twister ganando 19-2. Nos ta keda te aki pa awe i te djarason ku Poder di Dios.
