Baranka ta gana Ban Serio i bira kampion Liga 50 di 2024
WILLEMSTAD- Baranka riba doblete ku dos out den di 7 inning di Myron Wijman i bon picheo atrobe den Kenny Hellement ta gana Ban Serio ku skor di 8 pa 7 i bira kampion Liga 50 di 2024. Bon públiko atrobe na Van Engelen Ballpark pa mira e di dos partido di gran final seri mihó di 3. Baranka a swip e seri ganando e promé wega djasabra 16 di novèmber ku skor di 6 pa 5 i djasabra 23 di novèmber ku skor di 8-7.
Tabata un wega ku Ban Serio a sali dilanti 4-0 den promé inning riba grandslam di Kelvin Winklaar i despues nota un kareda mas pa bai dilanti 5-0. Baranka a kontestá ku 3 kareda den di 2 inning pa hasi e wega 5-3 i den bòm di e di 5 inning, Baranka a bai ariba. Ban Serio a empatá e wega na 7 kareda den kabes di e di 6 inning. E wega a keda empatá i den bòm di e di 7 inning ku dos out Baranka ta laga Ban Serio den tereno pa bira kampion. Despues di wega tabatin entrega di premio. Kenny Hellement ku a gana e dos weganan di final a bira MVP di e seri final. Nos tin e numeritonan i entrega di premio ku pòtrèt.
NUMERITONAN
Baranka a nota 8 kareda, dal 12 hit i kometé 1 eror. Kenrick ‘Kenny’ Hellement tabata e picher ganadó. Ela tira wega kompletu pa Baranka. Gregory Bito a bati di 3-2. Kenny Hellement i Sedeney Lourens a bati di 1-1.
Ban Serio a skor 7 kareda, konektá 11 hit i hasi 3 eror. Picher pèrdèdó a resultá Ramon Cabrera ku a relevá Miro Daal ku tabata e habridó. Wim Felicia a tira den último inning pa Ban Serio. Kelvin Winklaar a bati di 3-3 ku un homerun (grandslam) i 5 RBI. Geromino Daflaar i Albert Pieternella a bati di 1-1.
PREMIONAN
Kampion: Baranka.
Supkampion: Ban Serio.
Di tres lugá: Jaws.
Kampion temporada regular: Marlins.
MVP play-off final: Kenny Hellement.
Kampion bate, Jair Josepha (Ban Serio).
Lider di homerun: Jair Josepha (Ban Serio).
Kampion picher: Michelangelo Boekhoudt (Ban Serio).
Kampion temporada regular ekipo Marlins, dirigente Nivillac ta tuma trofeo.
MAS INFORMASHON DI SÒFTÒL I BEISBÒL
Fanátikonan di Deporte Kòrsou, bonatardi. Djasabra último tabatin dos gran final di Sòftbòl Slowpitch na Van Engelen Ballpark. Ekipo Baranka a titulá kampion di 50+ ganando di ekipo Ban Serio ku skor di 8-7. Bon públiko pa wak e wega aki i despues a sigi seri final di Liga Amstel kaminda ekipo Gamers bou di direkshon di Sergei Leon a gana dos wega di Cicoza pa bira kampion atrobe di Liga Amstel. Dimes e públiko grandi di Liga 50 a keda pa wak e hóbennan di Liga Amstel den akshon. Den e promé wega ekipo Gamers a laga Cicoza den tereno ganando 6 pa 5 i e di dos wega a terminá pa nòkout ku skor di 25-13.
* * * * *
Pa loke ta trata e wega final di 50+, e wega tabata pèrtá den e último partinan di e wega. Ban Serio tabata dilanti 5-0 den kabes di e di dos inning, pero poko poko pero sigur Baranka ta bin bèk i hasi e wega 5-3, 5-4 i Baranka komo ekipo di kas a empatá e wega den bòm di e di 4 inning. Baranka ta bai ariba den bòm di e di 5 inning i Ban Serio ta empatá e wega na 7 kareda den kabes di e di 6 inning. Baranka no ta nota den bòm di e di 6 inning i Ban Serio tampoko no ta nota kareda den kabes di e di 7 inning. Den bòm di e di 7 inning Myron Wijman ta konektá doblete di oro ku dos na base pa Baranka bira kampion.
* * * * *
Bòm di e di 7 inning a start kaminda Grensley ‘Tutuchi’ La Croes ta konektá un rolling pa shòrt ku Jair Josepha ta bai den buraku i ku un bon tiru na primera ta saka out. E sigiente batiadó ku ta Gregory Bito ta konektá doblete pa lèft center. Ban Serio ta boliá Ramiro Balentina intenshonal, kambia e picher Ramon Cabrera i trese Wim Felicia. E sigiente batiadó ku ta Shendy Cras ta konektá flai pa right riba konteo di 0-1. Despues tabata Myron Wijman ku ta konektá doblete den muraya pa center pa asina Bito nota kareda di viktoria i Baranka a titulá kampion di Liga 50 di 2024.
* * * * *
Después di e hit fanátikonan a subi tereno pa selebrá huntu ku ekipo Baranka ku a bira kampion pa di 3 biaha den 4 aña. Baranka tabata kampion di añanan 2021 i 2022 i awor ta kampion di 2024 tambe. Un gran ekipo i organisashon ku ta dominando den Liga 50, pabien Baranka!! Mas o ménos un ora despues di e wega tabatin entrega di premionan individual i di ekipo. Ban Serio a dominá den premionan individual ku Jair Josepha ku tabata kampion bate i lider den homerun. Michelangelo ‘Galbou’ Boekhoudt a bira kampion picher. MVP di e seri final tabata Kenny Hellement ku a gana tur dos wega di e final. Marlins a risibí envelòp ku sèn kèsh komo kampion di kampionato regular i Baranka tambe a haña e envelòp ku kontenido huntu e kopa komo kampion.
* * * * *
Pa loke ta trata Liga Amstel manera nos a skibi ariba den e kolumna Gamers a swip Cicoza pa bira kampion di Liga Amstel pa di dos aña sigí. E hungadó Liandry Kirindongo (yu di kolega, Clint Kirindongo) tabata bárbaro atrobe pa Gamers. Den e wega kaminda Gamers a klasifiká pa final siman pasá, ela konektá 4 homerun i ayera ela konektá un homerun den e promé wega di final. MVP di e seri final a resultá e picher Emilio Velarde di Gamers ku ta sumamente difísil pa bati. Ela tira dos wega, 9 ponche den e promé wega i tabata klave den e viktorianan pa Gamers.
* * * * *
Awe nos tin reportahe i entrega di premio di Liga 50 i pa despues nos lo tin mesun detayenan di Liga Amstel. Miéntras tantu ekipo Gamers lo topa Cicoza atrobe, pero den e kaso aki den e wega finalísimo di e semi-final di 40+ djamars 26 di novèmber na Van Engelen Ballpark. Ganadó di e wega aki lo topa ku Baranka den final 40+. Den Beisbòl Veterano ta pendiente di desishon di apelashon di ekipo Yesterday ku a pèrdè e protesta den promé fase kontra di Santa Rosa Memories. Djasabra awor ta dia 30 di novèmber i djadumingu ya nos ta den desèmber i semi-final ta pendiente pa start. Nos ta keda te aki pa awe i te mayan ku Poder di Dios.
