Baranka ta gana Marlins 9 pa 6 den Liga 50
WILLEMSTAD- Baranka a gana Marlins 9 pa 6 djasabra siman pasá den kontinuashon di Liga 50 na Van Engelen Ballpark. Kenny Hellement a bai ruta kompletu i Djuric Pieters ku ta bèk den forma a bati di 3-2 pa Baranka logra un viktoria importante i pone nan rèkòrt na 4-3. Marlins a terminá e promé buelta ku 6 ganá i 3 pèrdí. Den e otro wega di djasabra Catpower/Raiders a gana Artemisia 14-2 ku picheo di Gregory Martijn i bateo di Earl Virginia ku a bati di 3-2 ku 4 kareda empuhá. E promé buelta ta sigi djasabra awor ku weganan ku a keda suspendé den luna di yüni.
Baranka 9, Marlins 6 Baranka a bati di 10 hit i kometé 1 eror. Kenny Hellment tabata e picher ganadó. Gregory Reina a bati di 2-2. Ramiro Balentina i Djuric Pieters a bati di 3-2. Kenny Hellement di 1-1. Marlins a dal 10 hit i hasi 2 eror. Patrick Elisa tabata e picher pèrdèdó. Richenel Candelaria a bati di 2-2 i Irving Sambo tambe di 2-2.
Catpower/Raiders 14, Artemsia 2 Catpower a dal 14 hit i kometé 2 eror. Gregory Martijn tabata e picher ganadó. Earl Virginia, Robertico Castillo, Michelangelo Cijntje i Curtley ‘Gino’ Valeriaan a bati di 3-2. Artemisia a bati 7 hit i hasi 3 eror. Farley Lard tabata e picher pèrdèdó. Ericson ‘Fèfè’ Windster a bati di 2-2 i Ingemar Soerka di 1-1.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou bon dia i felis wikènt. Ya nos ta den ougùstùs 2025. Nos a skibi un artíkulo djabièrnè siman pasá tokante Liga 40 i Liga Amstel i no tabatin masha reakshon i atenshon di esnan den e liganan menshoná. Naturalmente esnan di 50 i 60 si a reakshoná i bisa ku esei ta e situashon ku e hóbennan di awor no tin masha interes den Slowpitch kompará ku e peloteronan di ántes. Tene kuenta ku den añanan 80 i 90 Sòftbòl Fastpitch tambe tabata den gran forma. Segun nos na Aruba tambe Fastpitch a kai formal i einan tambe ta liganan 50 i 60 ta manda.
* * * * *
Nos ta pendiente di resultadonan di semi-final di Liga Mayor (50+) di Sòftbòl di Aruba. Siman pasá mester tabatin e weganan di semi-final i pa 3 di ougùstùs lo tin e weganan final. Despues di e final mesora lo tin entrega di premio. Siman pasá Decos a dal Banbino 14-0 i Stingers a gana Old Tmers 12-5. Djadumingu 3 di ougùstùs tin e gran final na Aruba. Severo Hernandez tabata den gran forma konektanto dos homerun, unu for di parke i e otro den parke. Sòftbòl Veterano (Liga Mayor) ta a la karga na Aruba. Wikènt pasá a hiba tata di nos amigu Joseph Everon na su último lugá di sosiego. Joseph Everon èks hefe na Aqualectra na Kòrsou, hungadó di Jandoret Raiders, Baranka i Santa Rosa Royals.
* * * * *
Djasabra tabatin dos wega di Liga 50 na Van Engelen Ballpark sigí pa un tremendo fiesta djasabra anochi den Hofi Bil. Fiesta den kuadro di selebrashon di 25 aña di Liga 50 ku a bira un éksito rotundo kaminda 50+nan tabata schuif i mustra nan ablidat riba pista di baile. Pa loke ta trata e weganan Catpower/Raiders a dal Artemisia pa medio di nòkout 14-2. Catpower/Jandoret su rèkòrt a bira 5-2 i Artemisia 0-9. Artemisia ta terminá buelta number 1 sin viktoria i nan tabatin masha hopi wega ganá pero ta bai kai vensí despues. Ainda e ekipo tin un chèns hopi chiki pero nan mester gana tur e weganan den di dos buelta pa wak si nan por alkansá puesto number 7. Djasabra 2 di ougùstùs tin 3 wega kandela di Liga 50 na Van Engelen.
* * * * *
Den e otro wega di djasbara ekipo Baranka/Sharks ta gana di Marlins 9-6. Marlins a sali duru den kabes di promé inning notando 4 kareda, Baranka ta kontestá ku 2 kareda den bóm di promé inning i despues dos kareda mas den di dos inning pa empatá e partido. Despues Baranka ta nota 5 kareda den di tres innig pa sea e viktoria. Marlins a nota 1 den di 4 inning i 1 mas den di 6 inning pa keda kòrtiku. Despues di e wgeanan di djasabra último e standing ta lo siguiente: Ban Serio 7-1, Jaws 6-1, Catpower/Raiders 5-2, Marlins 6-3, Baranka Sharks 4-3, Lions 4-3, Pitufos 3-4, Flamboyan Gamers 2-6, Sluggers 1-6, Artemisia 0-9.
* * * * *
Den Beisbòl Veterano Quality Stars a dal Santa Rosa durísimo djasabra ku skor di 11-0. Dayron Puriel a tira no hit no run kontra di Santa Rosa. Dayron Puriel mes a bati di 3-3. Nos a mira Santa Rosa ku algun hungadó nobo ku tempu di nan tempu tabata tremendo den Little League manera entre otro Andy Leer. Ramses Jamanika tabata e picher ku a habri pa Santa Rosa i bira e picher pèrdèdó. Den e otro wega Broncos a zona Azucar 13-0. Broncos ta na di tres lugá i kandidato firme pa klasifiká den e promé 4-nan. Weganan di Liga 50 di djadumingu último a keda suspendé pendiente mas detaye pa start djadumingu awor.
* * * * *
Preparashonnan ta sigi pa ABC di Liga 60 ku lo tuma lugá na Aruba na komienso di òktober. Ekiponan Nos Tambe Por i Lions lo move sigur pa Aruba. Ekipo Nos Tambe Por tin dos aña sigí kampion, 2023 i 2024. Djadumingu mester tabatin wega di Nos Tambe Por kontra Lions na Frank Curiel Ballpark. Ta trata di dos ekipo ku tabata invikto promé ku e wega. Lions a gana e wega aki ku skor di 5-4. Nos ta keda te aki pa awe, te mayan ku Poer di Dios.
