Basta bon komienso pa selekshon di Kòrsou segun Pepi Sulvaran
WILLEMSTAD - Despues di dos wega di selekshon di Kòrsou bou di direkshon di Dick Advocaat nos tin e komentario di analista di futbòl, sr. Eldon 'Pepi' Sulvaran.
Nos ruta pa 2026 a start ku dos bon wega di fogeo
‘Pantera Negra’ a kuminsa e kaminda largu pa mundial 2026 ku dos wega di training na Turkia. Na nos opinión e ekipo a lusi organisá i ku e mihónan kuminsando riba tereno.
Esaki so kaba ta un diferensia grandi ku e era di Bicentini, kaminda hasta hungadó sin ekipo i hasta amateur tabata aparesé regular riba tereno. E ekipo a lusi kompakto kontra dos kontrinkante ku kompará ku e área di CONCACAF, ta di bon nivel. Hull City ta un ekipo ku sa aparesé den Liga Premier i ku aktualmente ta militá den Championship na Inglatera, ku ta komparabel i hasta un nivel un poko mas haltu ku Eredivisie Ulandes i kaminda un di nos mihónan, Bacuna chiki, aktualmente ta gana su sèn.
Sanger nobo ku futuro
Tabata bon pa mira sanger nobo destaká, manera Roemeratoe ku ta konsagrando su mes komo un bolante defensivo di nivel, ku bon toke di bala i ku ta trese trankilidat mei mei di tereno. Jearl Margaritha i Ar’jany Martha tambe a dal paso serio den nan kresementu i tin un arma peligroso ku ta nan velosidat. Apesar ku nos ta leu for di tin ekipo pa yega mundial, nos a presta bon den ambos partido. Paso Alanyaspor ta ekipo ku ta den e liga maksimo di Turkia.
Nos selekshon a mustra organisá
Lokual por a nota ta, ku nos ekipo a duna un impreshon organisá. Apesar ku nos ta keda krítiko riba algun aspekto di nos selekshon, ku por ehèmpel na lugá di skohe un relashonista públiko ku ta dominá Papiamentu pa konsumo lokal di fanátikonan di ‘Pantera Negra i Spaño i Ingles pa e área di CONCACAF, Advocaat a bin ku amigu ansiano penshonadó i meskos tambe ku un dòkter amigu retirá, mester admití ku nos a lusi basta bon i tin hopi tempu ku nos no por a bisa esei. Nos mester ta honesto. Además e realidat ta ku ta Advocaat tei aworaki.
Mas hungadó di nivel
Loke falta ta mas hungadó di nivel ku por yega 2026 den bon forma. Ei tin problema. Veterano manera Janga, Anita, Kuwas, Camelia i esnan ku no ta hungando regular òf riba nivel mas abou, manera Bodak, Markelo, Rosario, Zimmerman, Vicario, van Eijma i Ogenia, no por yuda nos después di yüni otro aña ora nos bai den grandi. Pero tin speransa, paso manera kos ta bai nos ta bai haña mas hungadó ku e resultadonan di e último dos weganan. Den un sigiente artikulo lo mi bin ku e onsena ideal ku según mi lo hiba nos mundial. Ta un trein yen di hungadó di nivel tin para na banda, ku según dianan bai, lo realisá ku ‘Pantera Negra’ ta nan uniko chèns pa yega mundial, e podio máksimo di e deporte rei. Locadia ya a bisa ku e ta regresá. Paso ku Janga ku no a hunga malu, komo úniko sentro delantero nos no por kana e kaminda. Den e grupo ku a bai Turkia, no tin niun otro sentro delantero nato.
%20copy.jpg)
Un base
Floranus, e dos Bacunanan, Margaritha, Room, Roemeratoe, Gorré i Martha si e lastu aki keda, ta forma un base, pero mester mas hungadó di nivel si nos ke sobrebibi después di yüni 2025. Felida no tabata tei e biaha aki pa leshon, pero e tambe ta kresiendo den Eredivisie, maske e no ta estalar ainda, paso Roemeratoe den RKC ta haña prioridat riba dje. Mester probechá tur oportunidat, pa mas wega di fogeo. Futbòl ta wega di konhunto i konosé otro riba tereno ta klave pa úksito. Pero promé ku tur kos mester di hungadó di nivel, sea ku Advocaat of no. E papel di entrenadó no mester wòrdu eksagerá, apesar ku según e reakshon di e hungadónan, nan ta bai bon kune. Esei ta positivo si ta bèrdat, pero sin mas hungadó ta bira un mishon imposibel ora nos topa por ehèmpel Jamaica, ku su 10 hungadónan di Liga Premier, Ligue 1 i Süper Lig. Jamaica tin un di e tres puestonan direkto práktikamente sigurá. Nan hungadónan ta resalta ku kabes i skouder riba sobra den CONCACAF ku ta lucha pa yega mundial. Ku mas hungadó nos por bataya ku Costa Rica, Honduras, Panama pa e sobra dos kuponan direkto i esun di repechage. Den otro edishon lo mi splika esei. Mas hungadó mester. Punto.
