BEVEKO a honra Renato Anasagasti
WILLEMSTAD- Djasabra 28 di novèmber promé ku e wega final entre Jandoret Raiders i Quality Stars, direktiva di Beisbòl Veterano Kòrsou a honra e veteranísimo hungadó Renato Anasagasti di Jandoret Raiders. Renato Anasagasti a haña e honor pa tira e promé lansamentu promé ku e wega start.
Renato Anasagasti na edat di 60 aña ta kuarto bate/primera base i picher di e ekipo Jandoret Raiders. Den 2020 Renato a bati pa averahe di .560, produkto di 14 hit den 25 turno i ela partisipá den tur e 12 weganan di su ekipo Jandoret Raiders. Na 2010 despues ku ela kumpli 50 aña, Renato a djoin e ekipo di Bulldogs den Beisbòl Veterano i na 2012 Renato a djoin su ekipo di bario Jandoret. Renato a bira kampion na 5 okashon ku Jandoret destakando den bateo i den picheo.
Desèmber 2019 Renato a drenta Salon di Fama di FDOK komo promé hungadó aktivo den Beisbòl Veterano ku ta risibí e honor. Nato a bira kampion bate den tur liga ku ela hunga i naturalmente tambe den Beisbòl Veterano algun aña pasá ku ekipo Bulldogs. Pa su esfuerso komo hungadó 60+ i ta ainda destakando den e hóbennan i su entrada den Salon di Fama, BEVEKO a duna Renato Anasagasti e homenahe den presensia di su mama i demas famia ku tabata na wega. Renato a risibí e aplouso tantu di fanátikonan presente komo di Jandoret Raiders i Quality Stars.
