Centro Barber ta gradisí representante di 'INGCO' pa nan aporte
WILLEMSTAD - Despues di mas ku 15 aña ku e organisashon di CSD Barber no tabatin su ala hubenil kompletu, porfin e organisashon di futbòl di Bándabou por broma ku nan ala hubenil atrobe konsistiendo di ekiponan U-9, U-11, U-13, U-15 i U-17.
CSD Barber su dirigentenan a traha ku alma i kurpa pa logra krea e sekshon hubenil di e organisashon i ta sumamente satisfecho di por a logra esaki tambe den un tempu relativamente korto. Pero no ta un sekreto ku pa mantené e struktura aki ta kosta sèn i e situashon finansiero aktual no ta esun di mas mihó.
Pa e motibu aki mes e organisashon di CSD Barber ke gradisí Smart Home Depot, representante ofisial di e tremendo marka 'INGCO', públikamente pa nan aporte. Nos ta sumamente gradesido na gerensia di Smart Home Depot ku a depositá nan konfiansa den CSB Barber i a spònser unifòrm pa henter e ala hubenil di e organisashon.
Durante fin di siman tras di lomba e hóbennan a realisá nan promé enkuentronan i seguidamente miembronan di direktiva, huntu ku miembronan di e kuerpo tékniko i algun hóben futbolista, a realisá un bishita sorpresa na Smart Home Depot.
Aki nan a hasi entrega di un gesto chikí na e representantenan di INGCO komo muestra di gradisimentu i apresio pa e konfiansa i sosten brindá na e organisashon di CSD Barber i na e hóbennan prinsipalmente.
E kapitan di e ekipo U-15, Daveny Iltes, a hasi entrega di e opsekio chikí na e representante di Smart Home Depot. Centro Barber ta gradisí Smart Home Depot, ku ta bende e produktonan di konstrukshon marka 'INGCO', pa su aporte i ta sigur di por keda konta ku e sosten di e prestigioso empresa aki.
Pa mas informashon por tuma kontakto via Whatsapp 560-8776 òf na 510-9292.
