Chris Koeiman di Santa Rosa pa Wild Cats den Beisbòl Dòbel A
WILLEMSTAD- E tremendo picher derecho Christopher ‘Chris’ Koeiman ku ta picha den College na USA, lo pasa pa Wild Cats pa picha den 2021. Chris Koeiman a hunga semper den e organisashon di Santa Rosa i a hunga dos aña den Hubenil ku e ekipo menshoná. Chris na 2012 tabata den e ekipo di Little League di Liga Pariba ku a representá Kòrsou i Karibe na Williamsport. Nos tin informashon ku Chris mester a firma kaba ku e ekipo di Wild Cats. Ekipo Wild Cats a regla tur kos pa loke ta trata Chris su biahenan pa Kòrsou pa asina e por picha pa e ekipo supkampion di Kòrsou Wild Cats. Un sla pa Santa Rosa sigur mirando ku semper Chris a hunga den e ekipo di Santa Rosa. Den 2020 Chris no a mira aktuashon pa ekipo Santa Rosa Indians. Na 2018 i 2019 Chris a tira algun inning pa e ekipo Santa Rosa Indians den Dòbel A.
WILD CATS
Di otro banda Wild Cats lo por pèrdè Levi Carolus ku Santa Maria. E utility player ku hopi poder ta kòmbersando ku dirigentenan di Santa Maria i chèns ta grnadi ku elo move pa Santa Maria Pirates den 2021. Parse ku Wild Cats ta dispuesto pa laga bai numa despues ku Levi a hunga basta aña den ekipo Wild Cats i bira kampion ku e ekipo menshoná na dos okashon na 2016 i 2017. Na 2011 i 2012 Levi a bira kampion ku e kipo Royal Scorpions.
Hopi ekipo tras di e super utility i gran picher Risandro Pastor. Risandro a hasi estrago den play-off i a gana dos wega den semi-final i dos wega den final ku Wild Cats. Hopi sigidó di Beisbòl ta pensa ku si Pastor lo a habri e wega i tira por lo ménos 4 pa 5 inning pa Wild Cats den final, kosnan lo tabata otro.
Mas bara di hak den awa di Wild Cats ta ku ekiponan Santa Maria i Royal Scorpions ta duru riba e hungadó Shurendel ‘Jul’ Mujica. Jul Mujica tin basta aña ku Wild Cats despues ku ela regresá for di Beisbòl profeshonal na USA. Jul ta tremendo infielder ku por hunga den outfield tambe. Bon bate, bon wante, brasa i tremendo spit na base. Un hungadó ku ta trese ánimo den ekipo pa su manera alegre di hunga bala i ‘hustle’ riba tereno.
Wild Cats no ta para ketu i ta moviendo duru riba e dos rumannan Rodriguez di Santa Maria. Ta trata di Alexander Rodriguez, tremendo primera base ku poder i bon picher relevo tambe. E ruman ta Arlyson Rodriguez ku por bira un tremendo picher slengu ku algun aña pasá tabata na bista di varios skout. Tur dos Rodriguez ta picher slengu ku lo por yuda ekipo Wild Cats tremendo. Santa Maria i Santa Rosa tin interes den Sidney Antonia ku ta bon picher derecho ku ta tira sigur 5 inning pa kualke ekipo grandi i kontra kualke ekipo grandi. Keda pendiente pa mas detaye di kambionan ku tin den Beisbòl Dòbel A den dianan benidero.
