Curaçao Baseball Week 2024 ta kuminsá kargá ku aktividat
Beisbòl ta bria e siman aki ku nos profeshonalnan
WILLEMSTAD, 2 di yanüari 2024 - Hensley Meulens ofisialmente a lansa e siman di Curaçao Baseball Week (CBW) durante rueda di prensa ku a tuma lugá dia 2 di yanüari 2024 den Fòrti. Meulens huntu ku tim organisatorio, profeshonalnan den beisbòl, invitadonan spesial manera spònsernan i media, a sera konosí ku otro i yama bon biní na CBW su edishon di 2024. E aña aki CBW atrobe ta kargá ku aktividat dirigí riba peloteronan, coachnan i umpirenan pa di e forma aki beisbòl sigui desaroyá.
Grandinan den beisbòl tei presente
Tur hungadó i coachnan ta na Kòrsou. Nos estreanan di beisbòl pero tambe e leyenda den beisbòl, Dusty Baker a yega Kòrsou i ta presente durante CBW. Baker ta sumamente entusiasmá pa forma parti di CBW i di por bishitá Kòrsou. Meskos Xander Bogaerts tambe ta partisipá pa promé bia na CBW. CBW ta yama danki na Renaissance Wind Creek Curaçao Resort ku lo ta e hotèl ku ta brinda hospedahe. No pèrdè e chèns pa sera konosí ku e grandinan den beisbòl.
Klínikanan di 3 pa 5 di yanüari 2024
E momento supremo a yega den kua un gran kantidat di mucha lo partisipá na klínikanan di beisbòl. E klínikanan ta tuma lugá di dia 3 te ku dia 5 di yanüari 2024. Un kambio remarkabel e aña aki ta ku e klínikanan pa Pre-Minor ta tuma lugá na Didi Deeds Field. Sobrá klínikanan ta na e lokalidat kustumbrá ku ta Tio Daou Ballpark. Tambe e klínikanan pa coachnan i umpirenan ta tuma lugá dianan 4 i 5 di yanüari 2024 na Tio Daou Ballpark. Un gran oportunidat pa sigui amplia nos konosementu di beisbòl na Kòrsou. Durante tur klínika tin oportunidat pa kumpra karchi pa e eventonan di CBW i ‘merch’ esta t-shirt, pèchi, etc di CBW.
Mas aktividat
Banda di e klínikanan tambe ta organisá un Home Run Derby ku lo tuma lugá dia 5 di yanüari 2024. Bam Bam Tech Sports Zone (BBTSZ) na Sambil lo ta esenario pa e Home Run Derby. Entrada ta kosta solamente 10 florin pa persona i ta optenibel na BBTSZ. Pitsmoker lo ta presente pa un i tur por gosa di un dushi Texas style BBQ. Marka e fecha pa bo no pèrdè e Home Run Derby aki!
E torneo di gòlf pa sera e siman di CBW ku ta tuma lugá dia 6 di yanüari 2024 ta soldout. Tin algun karchi disponibel na balor di USD 100,- pa forma parti di Dinner Award Night pa sera e evento. E Dinner Award Night ta e momentu pa saka e ganadónan di e torneo di gòlf. Komo kortesia di Curaçao Tourist Board kuater persona ta biaha pa Miami dia 30 aprel 2024 pa dos anochi pa presensiá un wega di Miami Marlins kontra Colorado Rockies. Despues e ganadónan por disfrutá di un dinner huntu ku Hensley Meulens aya na Miami. Karchinan pa e Dinner Award Night ta optenibel na BBTSZ. Tambe e subasta anual ku un kantidat grandi di ‘collector’s item’ disponibel ta tuma lugá durante e evento aki. Riba e página sosial di CBW por tira un bista riba e artíkulonan di e subasta. Tur e aktividatnan adishonal tin komo meta pa rekoudá fondo pa kumpra material pa tur tim di beisbòl na Kòrsou. Pa mas informashon bishitá www.curacaobaseballweek.com òf CBW riba Facebook i/òf Instagram.
Danki na spònsernan
Tur aña di nobo CBW por konta ku spònsernan di semper ku ta kere den e proyekto. Alabes spònsernan nobo ku ta uni nan mes na e bon kousa. Un danki spesial di kurason na: MVP Foundation, Curaçao Tourist Board, Renaissance Wind Creek Curaçao Resort, PRGV, MCB, Curaçao Airport Holding, Enterprise Rent-A-Car, Atlantic Spine Center, Coca Cola, MLBPAA, MLB, Sandals Royal Curaçao, Profound, Built Different, Brent de Graaf, De Palm, Lovers, Old Quarry Golf Course Curaçao, The Wine Factory, Kyoto, Heineken, The Pit Smoker, Osteria Rosso, Ròm Tambú, La Casa del Habano, 8 The Experience, Bottles, Trupial Inn Hotel & Casino, Kome Restaurant, Ultimate Automobiles (BMW), Blue Maxx, Fresh., Mustashi Barbershop, Venequip, Aqualectra i KTK (Kompania di Tou Kòrsou).
Inskripshon ta posibel ainda
Mas ku 900 mucha ya kaba a inskribí pero tin mas lugá. Ata bo chèns pa bo registrá i partisipá na un evento ku sigur ta bai engrandesé bo konosementu i abilidatnan den beisbòl. Pa mas informashon tokante CBW, registrashon i e programa por bishitá www.curacaobaseballweek.com, yama òf kontaktá nos via Whatsapp + 5999 5254699 òf skèn e QR code pa registrá.
