Curaçao Baseball Week ta bèk!
Beisbol pa hóbennan i coachnan di 7 te ku 12 di novèmber 2022
WILLEMSTAD - Dia 7 te ku 12 di novèmber 2022 ta bai tuma lugá e famoso Curaçao Baseball Week (CBW). E evento den kua nos hóbennan i coachnan ta siña e téknikanan mas resién di beisbòl. Ku partisipashon di nos gran hungadónan di beisbòl den Minor i Major League Baseball ku ta bai tei presente pa forma parti di diferente klinika pa asina brinda e hóbennan un eksperiensha sigur úniko i inolvidabel.
“Pa motibu di pandemia no por a organisá Curaçao Baseball Week aña pasá, pero nos ta kla pa 2022!” Hensley Meulens, e motor tras di e evento aki, ta bisa. Hensley ta e promé hungadó di beisbòl Yu di Kòrsou ku a yega Major League Baseball. E temporada ku a pasa Hensley Meulens tabata ku New York Yankees i e tim a yega final di Liga Merikano.
Hensley ta sigui splika: “E meta prinsipal di Curaçao Baseball Week ta pa duna bèk na nos komunidat." E aña aki Curaçao Baseball Week ta selebrá dies aña di eksistensia, pero no por keda sin menshoná ku pa mas ku trinta aña Hensley ta enkargá ku organisashon di klinika pa nos hóbennan.
Aparte di e klinika pa nos hóbennan, e coachnan di timnan di baseball tambe ta risibí e oportunidat pa siña di profeshonalnan. Kòrsou ta konosí komo e pais na mundu ku ta produsí mas hungadó den Major League Baseball.
Manera kustumber, ta bai tin evento pa rekoudá fondo durante Curaçao Baseball Week. Ta bai tin e famoso Home Run Derby ku ta bai tuma lugá na Bam Bam Tech Sports Zone dia 11 di novémber 2022. Tambe e torneo di gòlf tan gustá ku ta bai tuma lugá dia 12 di novèmber 2022 na Old Quarry Golf Course Curaçao.
Beisbòl no ta un simpel deporte, e ta nos manera di biba i bo por bisa ku e ta den nos sanger. Pa e motibu aki nos lema di 2022 ta “It’s in our DNA”. Nos unifòrm i nos pèchinan tur ta bai karga e lema aki i asina bo miré, bo ta bai kapta su esensia. Esaki a keda diseñá pa Brett Russel.
Un danki spesial na tur spònser ku ta hasi Curaçao Baseball Week posibel: CTB, Corendon, Pinnacle, PGRV, MVP Foundation, MLBPAA, MCIS, Old Quarry, Massive, Osterio Rosso, Deli Nova, Kyoto, Pit Smoker, KDZ, Coca Cola, Heineken, Lovers, Audi, YDK, Mc Donalds, American Airlines, Moustache, Licores Maduro, Heineken, i Kontentu.
Tur mucha ku ta forma parti di timnan di beisbòl i tambe coachnan ku ta interesá pa partisipá na Curaçao Baseball Week, por registrá na:
www.curacaobaseballweek.com
registration@curacaobaseballweek.com òf yama e number xxx
