Jandoret Raiders lo topa Baranka den wega number 2 di e seri final djasabra 31 di òktober
WILLEMSTAD — Jandoret Raiders lo topa ku Baranka den wega númber 2 di e playoff final djasabra 2’or na Van Engelen Ballpark. Jandoret a gana wega númber 1 ku skor di 15-11 i ta dilanti den e séri 1-0. Ta trata di un séri mihó di 3, i un viktoria mas pa Jandoret lo duna nan e kampeonato, miéntras ku si Baranka gana, lo tin un wega desisivo dia 7 di novèmber pa 2’or. Manera ta konosí, Ban Serio a terminá númber 3 ganando di Marlins 15-1 djasabra siman pasá.
Jandoret Raiders 15, Baranka 11 Jandoret Raiders 50 a bati un total di 14 hit i a kometé 4 eror, miéntras ku Baranka 50 a bati 12 hit i a kometé 2 eror. Pa Jandoret Raiders 50, Mayron Wijman a bati di 3-3 ku un tripel i 3 kareda empuhá, Deron Clara di 2-2 ku 2 kareda empuhá, i Chervin Maduro di 3-1 ku un homerun i 3 kareda empuhá. Pa Baranka 50, Charlton Merite a bati di 4-2 ku un homerun i 1 kareda empuhá, i Ramiro Balentina a bati di 3-2 ku un homerun i 2 kareda empuhá. E picher ganadó tabata Gregory Martijn di Jandoret Raiders 50 kende a picha 6.2 inning permitiendo 5 hit i 4 kareda (1 limpi). E picher pèrdèdó tabata Fisel Pereira kende a picha 3.1 inning permitiendo 11 hit i 14 kareda.
Jandoret Raiders dilanti 1-0 den playoff final Liga 50.
Ban Serio 15, Marlins 1 Ban Serio 50 a bati un total di 15 hit i no a kometé eror, miéntras ku Marlins 50 a bati 4 hit i a kometé 3 eror. Pa Ban Serio 50, Shurandy Lourens a bati di 3-3 ku 1 kareda empuhá, Hubert Sakoetoe a bati di 3-2 ku 1 kareda empuhá, i Albert Pieternella a bati di 2-2. Pa Marlins 50, Jurien Martina, Luis Alcantara, Edphrim Cicilia i Axel Gomez a bati di 1 hit kada un. E picher ganadó tabata M. Boekhoudt di Ban Serio 50 kende a picha 5 inning kompletu permitiendo 4 hit i 1 kareda. E picher pèrdèdó tabata Axel Gomez kende a picha 5 inning permitiendo 15 hit i 15 kareda.
MAS INFORMASHON DI SÒFTBÒL I BEISBÒL
Lesadónan di Deporte Kòrsou, bon dia i felis wikènt. Nos ta start un wikènt ku playoff den Liga 50, den Beisbòl Veterano i den Liga 60. Den Liga 60 tin un protesta formal di ekipo Nos Tambe Por ku a terminá empatá ku rèkòrt di 9-3, empatá ku Pitufos (9-3) i Los Amigos (9-3). Den e weganan entre nan tres hungá, Nos Tambe Por a sali 2-1, Pitufos 2-2 i Los Amigos 1-2. Pitufos a bai para na promé lugá, Los Amigos na di dos lugá i Nos Tambe Por na di tres lugá, apesar ku Nos Tambe Por tabatin e mihó rèkòrt entre e tres ekiponan. No por a usa e rèkòrt di ganá i pèrdí entre e tres ekiponan aki.
* * * * *
Segun e rapòrt di esnan ku direktiva a buska, nan a husga ku: A base di e kantidat di weganan hungá entre e tres ekiponan aki, ta parse difísil pa apliká e regla W-25a, mirando e echo ku no por papia di un level playing field pa tur e ekiponan konserní. Tur ekipo no a hunga e mesun kantidat di wega. Parse ku e desishon ta bindend (definitive). Si tur ekipo no hunga dos biaha kontra otro durante temporada regular, e situashon aki por surgi. Ku otro palabra, den 50+ tambe e situashon aki por surgi si hunga un buelta i mei i no dos buelta òf un buelta. Den e kaso aki mester pone ku ta bai mesora den kareda kontra i no pone ku ekiponan ku a gana otro, ets.
* * * * *
Djasabra 2’or, Jandoret Raiders lo topa ku Baranka den wega number 2 di e final di Liga 50. E promé wega Jandoret a gana ku skor di 15-11 i ta dilanti 1-0 den e seri. Baranka no tabatin nan picher estelar ku ta Kenny Hellement, pero tur otro hungadó klave tabata presente. Jandoret tabata kompletu ku su pichernan estelarísimo 1, 2 i 3 na wega. Un bon públiko tabata presente djasabra pasá i ta spera un públiko grandi atrobe pa mira wega number 2 di e seri final mihó di tres, ku ta tuma lugá na Van Engelen Ballpark naturalmente.
* * * * *
Beisbòl Veterano ta djasabra 11’or: Broncos kontra di Volcano den un wega ku mester terminá pa wak kua ekipo ta sali na di 4 lugá. Ekipo Otrobanda probablemente lo keda na di 6 lugá; Broncos òf Volcano lo terminá na di 4 lugá i bai topa e fuerte ekipo Santa Rosa Memories ku a terminá number 1. Djadumingu 11’or tin kandela na momentu ku Santa Maria Pirates ku Quality Stars topa otro den e promé wega di semifinal, dos ekipo fuertísimo ku a hunga e final di temporada 2025. Ekipo Santa Maria tin 2 título den historia di Beisbòl Veterano i Quality Stars tin 5 título, di kual 4 tabata siguí.
* * * * *
Beisbòl Little League Pabou a start awe djabièrnè 6’or na Frank Curiel Ballpark ku partisipashon di ekiponan Santa Maria, Marchena, Jandoret, Sint Michiel, Tera Kòrá, Jongbloed i Jaguar. Liga Pariba ku tin Brievengat, Santa Rosa, Montaña Ariba, Montaña Abou, Trai Seru i Van Engelen ta start djasabra 31 di òktòber. Aminta Sprockel Challenger Little League tambe a start, djabièrnè 30 di òktòber den oranan di mainta pa 8.30 pa 11.30 ku e weganan na Frank Curiel Ballpark. Challenger Little League ta e weganan di Little League kaminda hóbennan ku un kualke desabilidat ta partisipá den e wega di Beisbòl. E weganan aki ta tuma lugá durante e temporada tur fin di luna riba djabièrnè.
* * * * *
Miéntrastantu, nos selekshon U-18 ku a partisipá na e Kampionato Panamericano di Beisbòl U-18 no a logra un bon resultado. E ekipo tabatin un rèkòrt di 1 ganá i 3 pèrdí durante e wikènt ku a pasa i depues tur wega a keda kanselá pa motibu di awasero i mal estado di tereno. Nos a pèrdè e promé wega 13-7 kontra Repúblika Dominikana i 20-2 kontra di USA. Nos a gana Brasil 8-6 i despues nos a pèrdè kontra Méksiko 18-3. Nos no a logra klasifiká pa e Mundial i e weganan pa subi ranking kontra Cuba i Canada a keda suspendé pa motibu di mal estado di tereno i awasero. Nos ta keda te aki pa awe. Te mayan ku Poder di Dios!
