Curaçao Little League ta gradisí Toastmasters Club BNA pa un programa eksepshonal di liderato duná na nos hóbennan
WILLEMSTAD – Curaçao Little League ta ekspresá su mas profundo i sinsero gradisementu na Toastmasters Club BNA pa e forma eksepshonal ku nan a organisá i implementa e kurso asina yama Toastmasters Youth Leadership Program pa nos hóbennan di Little League.
Durante sinku siman inspirativo, nos hóbennan a partisipá na un programa di alto nivel ku a brindá nan e oportunidat pa desaroyá abilidatnan ku lo sirbi nan den henter nan bida. Mediante sekshonnan interaktivo i práktiko, nan a siña e importansha di komunikashon efektivo, konfiansa den nan mes, liderato, trabou den ekipo, asumí responsabilidat i e arte di papia den públiko. Tur e abilidatnan aki ta mesun importante den bida komo riba tereno di beisbòl.
E dedikashon, profesionalismo i pashon ku Toastmasters a mustra pa forma nos hóbennan a laga un impreshon grandi riba tur e partisipantenan. E siguridat i konfiansa ku e hóbennan a demostrá durante e seremonia di graduashon tabata un klaro refleho di e kalidat di e programa i di e kompromiso ku e instruktor i presentadónan a demostrá durante henter e trayekto.
Un gradesementu masha spesial ta bai na Carlnedra (Nedra) Manuel, Erwin Lobato, Jeanthall Obia-Maduro, Signalies Lodowika i Nathaly Lobato-de Windt, kende a kompartí generosamente nan tempu, konosementu i eksperensia ku nos hóbennan. Danki na nan inspirashon i guia, hopi di e muchanan a desaroyá mas konfiansa den nan mes i ta mas prepará pa bira e lidernan di mañan.
District Administrator di Curaçao Little League, Urny Florán, a enfatizá ku e programa ta kuadra perfektamente den e mishon di e organisashon.
Curaçao Little League no ta desaroyá solamente atleta. Little League ta forma hende hoben ku karakter, ku sa komuniká, ku por dirigí i ku ta prepará pa hasi un diferensia positivo den komunidat. Toastmasters a yuda nos hóbennan haña nan bos i desaroyá e konfiansa pa usa esaki."
Curaçao Little League ta konvensí ku e kolaborashon entre deporte i formashon ta un invershon den futuro di nos pais. Huntu ku Toastmasters, nos ta kontribuí na formashon di hóbennan ku no solamente sobresalí den deporte, sino ku tambe ta bira siudadanonan responsabel, komunikadónan fuerte i lidernan ku lo sirbi nan komunidat ku orgullo.
Curaçao Little League ta spera ku e aliansa balioso ku Toastmasters lo sigui fortalese den e añanan benidero, pa asina sigui brinda oportunidatnan úniko di desaroyo personal na nos hóbennan.
Danki, Toastmasters International, pa yuda nos hóbennan haña nan bos i inspirá e lidernan di mañan!
