Curacao Little League ta yama danki na RBC i RBC ta entregá unifórm na selekshonnan
WILLEMSTAD- Curacao Little League Baseball huntu ku direktiva di e liganan den presensia di hungadó- i dirigentenan a honrá spònser number 1 di Little League, RBC Royal Bank. E homenahe na e spònser di 25 aña di Little League a tuma lugá djadumingu 8 di yüni 2025 durante un Santu Sakrifisio di Misa na Misa di Suffisant. Despues di e homenahe RBC a presentá unifòrm di e seleksonnan di Little League ku lo representá Kórsou den kampionatonan Latino-Amerikano i Karibe rumbo pa Mundial den e diferente kategorianan. Tur selekshon di Little League tabata presente i uniformá den Misa i después kada selekshon a saka pòtrèt dilanti Sentro Pariokial na Misa di Suffisant. Tambe tabatin entrega di unifòrm di selekshon di Sòftbòl Little League, divishon Senior di spònser pa Gobièrnu di Kòrsou.
HOMENAHE
Curacao Little league Baseball a gradisí RBC un biaha mas pa e sostén finansiero, moral i inspirativo durante e 25 añanan. District Administrator, sr Urny Floran a yama danki pa e añanan di konfiansa i e sostén ku tabatin un impakto positivo grandi den desaroyo di e hóbennan i di Little League. Floran: “Nos di Curacao Little League Baseball ta hopi agradesido na e kontribushon konsistente durante 25 aña sigi pa e hóbennan i pa Kórsou. Spònser 25 aña sigí ta un rèkòrt sigur i Little League/RBC ta práktikamente inseparabel. Na momentu ku RBC a start ku patrosinio di Little League, a bini éksitonan inkreíbel i inolvidabel, danki na e sostén. Nos ku tin hopi aña den Little League sa ku RBC no a bini pa e éksitonan, pero e sostén konsistente i supstansial a redundá den e éksitonan.
Ku patrosino di RBC a logra 4 título Mundial i kasi 30 título regional. Danki tambe pa e sostén pa organisá kurso, tayer, konferensia, enkuentronan pa dirigentenan tékniko i atministrativo, hungadó, umpire i skorer, mayor i fanátiko. Pesei e Santu Sakrifisio di Misa aki pa gradisí Dios pa tur loke nos a logra tambe i yama danki na RBC.”
UNIFORM/SELEKSHON
Despues di e Sakrifisio di Misa, RBC a presentá e selekshonnan su unifòrm di Little League di Kòrsou. E selekshonnan lo hunga den e kampionatonan di Karibe i Latino Americano. Naturalmente e dos selekshonnan Senior League di Kòrsou, selekshon di Pabou i di Pariba, ku lo representá Kòrsou den e kampionato di Karibe ku lo tuma lugá na Kòrsou di 22 pa 29 yüni 2022 na Tio Daou Ballpark tabata presente bon uniformá. Tambe selekshonnan Little League di Pariba i Pabou ku lo hunga den e kampionato di Karibe ku ta di 6 pa 13 di yüli den Stadion Post 6 na Kòrsou. Selekshonnan Minor Pabou, Intermediate Pabou i Junior Pariba tambe tabatin nan unifòrm. E selekshonan Minor, Intermediate i Junior lo hunga kampionatonan Latino Americano den region.
E presentamentu i sakamentu di pòtrèt di tur hungadó i dirigentenan di selekshon di Liga Pariba i Liga Pabou. Pa loke ta parti aki sr. Pierrot Hurtado, Managing Director di RBC i District Administrator sr. Urny Floran a hiba palabra. Ultimo añanan e entrega a tuma lugá dilanti tur delegashon, esta hungadó di tur selekshonnan di liganan menshoná i nan dirigentenan.
Pierrot Hurtado a bolbe mustra riba e importansia di nos Hubentut pa ku futuro di Kòrsou i ku RBC Royal Bank lo sigui yuda den desaroyo di hóbennan na Kòrsou. Pierrot Hurtado a gradisí pa e homenahe i a bisa ku RBC a spònser Curacao Little League ku hopi plaser i ta mira kon e programa ta, kon e muchanan ta desaroyá i bira lidernan pa futuro i hopi di nan ta duna bèk komo ‘coach’ òf miembro di direktiva den Little League.
District Administrator Urny Floran a gradisí RBC atrobe pa e aporte na Little League, den e kaso aki unifòrm pa nos muchanan. Manera ta konosí RBC ta spònser biahe i unifòrm tambe di delegashonnan di Beisbòl Little League, ku lo biaha pa eksterior. Nos pelotero- i e coachnan ta bon prepará i naturalmente lo ta bon bistí pa representá Kòrsou dignamente aki na Kòrsou i e otro selekshonnan ku lo biaha pronto pa eksterior.
RBC lo ta presente na apertura i durante weganan di e kampionato di Karibe di Senior League pa apoyá nos hóbennan di 14-16 na Tio Daou den yüni i di Little League (11-12 aña) den Stadion Post 6 den luna di yüli.
Na momentu ku e selekshonnan ta biaha, RBC lo tei na aeropuerto pa yama nos hóbennan ayó i deseá nan suerte den e kompetensianan.
SPICH DI PIERROT HURTADO
Ta un honor pa t’akinan awe ku boso, kaminda nos ta bini huntu pa rekonosé i selebrá e relashon i kompromiso di 25 aña entre RBC i nos hóben nan pa bia di Curacao Little League.
Di parti di RBC, mi por kompartí ku nos tambe ta hopi orguyoso i kontentu di por selebrá 25 aña di kompromiso i kontribushon na potensial hubenil pa medio di e deporte maravioso di Beisbòl na Kòrsou.
Ku e patrosinio duradero aki nos ta komprometé na sostené e potensial di nos hubentut i nan desaroyo.
Menshoná e importansia di invertí den hubentut i den deporte komo parti di inisiativa di RBC su kompromiso den komunidat.
E kos mas importante di e 25 añan nan ku a pasa ta, ku pa nos i RBC ku nos por a krea oportunidat pa nos hóbennan.
Nos tin hopi talento na Kòrsou, pero hopi bes esaki nan ta keda skondi paso nos no ta kreando o dunando oportunidat.
Pa nos di RBC nos a kontribuí pa 25 aña i lo sigi hopi aña mas, pa duna oportunidat nan nos hóbennan pa por praktiká deporte.
Deporte ta hopi importante den formashon di karakter, liderazgo i disiplina i no lubidá amistat hopi biaha pa bida!
Nos mester rekonosé esfuerso di coachnan, famia i tur boluntario.
E importansia i apoyo di komunidat pa asina nos hóbennan por hasi bon uso di e oportunidat ku nan ta hanja pa asina desaroyá.
Mayornan i famia nan di e hóbennan aki ta di sumo importansia. E ta kuminsá pa ku mayornan komprondé e inportansia di deporte pa desaroyo di nan yunan i pa dunanan e sostén pa ku esaki.
Nos/RBC kier a hasi uso di e oportinudat aki pa un bes mas reafirmá nos kompromiso kontinuo ku desaroyo di deporte i proyekto komunitario na Kòrsou.
Nos kier a yama pabien na tur nos atletanan pa nan dedikashon i nan logronan.
UNIFORM
Nos por mira awe tambe nos unifòrmnan nobo pa 2025. Nos hóbennan lo desfilá den e unifòrman aki den e próksimo torneonan.
De paso mi kier a deseá tur nos atletanan éksito den e próksimo torneonan di Karibe i Latinoamerikano i den futuro serienan Mundial.
Mi ke yama danki un bes mas, na e organisashon di Litte League, mayornan, boluntarionan, coachnan, trainernan, umpirenan, media di Kòrsou, Gobièrnu di Kòrsou i henter pueblo di Kòrsou pa nan sostén ku ta wòrdu duná na desaroyo di nos hóbennan pa medio di Baseball Little League.
