Curaçao Super Stars ta sorprendé Baranka i Los Amigos a blankiá Lions den Liga 60
WILLEMSTAD — Curaçao Super Stars a gana Baranka ku skor grandi di 15-6 i Los Amigos a blankiá Lions ku skor di 3-0 djadumingu den kontinuashon di Liga 60 na Frank Curiel Ballpark. Tabata den e wega di 3’or di mèrdia ku Curaçao Super Stars, ku tin basta aña sin gana un wega durante buelta regular, ta logra viktoria ku skor grandi riba Baranka.
Den e wega di 1’or ekipo Los Amigos a gana Lions i pone ku Lions a pèrdè e promé lugá riba e standing. Pitufos a gana Mon Repos Sluggers 9-7 den e promé wega di djadumingu i pasa pa promé lugá. E standing despues di e weganan di ayera ta: Pitufos 7-1, Nos Tambe Por 7-2, Lions 7-2, Los Amigos 5-3, Jaws 4-4, Baranka 3-6, Mon Repos Sluggers 4-6, Nos Power 1-8 i Curaçao Super Stars.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou felis wikent. E play-off final di Beisbòl Dòbel A a start Royal Scorpions ganado 3 wega sigi. Royal Scorpions gran faborito. Pero despues Santa Rosa a kue dos viktoria sigi, unu djaweps i otro djabièrnè. Arjun Huerta, kende semper ta duna un show den entrevista promé òf despues di wega, a dal un homerun djasabra. Ekipo Royal Scorpions ta kargá ku èks-profesional den nan alineashon, entre otro Juremi Profar, Urlich Snijders, Raywendel van Gurp, Peson Riviere i Sherten Apostel, kende a hunga algun wega den Major League Baseball na aña 2020.
* * * * *
Den picheo tambe Royal Scorpions tin basta èks-profesional, manera Cerilio Soleana, Kevin Kelly, Franklin Van Gurp, Mikel Manzano i otronan. Lástimamente e fanátikonan ainda no ta yegando Tio Daou Ballpark manera mester ta. Algun gran fanátiko a manda un mensahe pa mi bisando ku bo ta haña vários bon hungadó den torneonan komersial, unda bo por mira nan bati homerunnan kilométriko i bria ku nan defensa. Naturalmente Beisbòl ta otro nivel i esnan ku ke mira un nivel kompetitivo mester bai wak Beisbòl. Ta bèrdat ku ántes masha poko hungadó bon di Dòbel A tabata hunga Slowpitch i no tabatin masha torneo komersial estilo di pone bala. Liganan tabata permití pa usa solamente dos hungadó di Dòbel A. En todo kaso Santa Rosa kandela e ultimo dos weganan aki.
* * * * *
Aworaki e hungadónan ta stòp di hunga Dòbel A òf Klase A pa nan dediká nan mes solamente na torneonan. Pa kolmo, liganan manera Amstel, Van Engelen, Un i Tur, Trai Seru, Liga Sabana, Liga Divi Divi i otronan tur a stòp di eksistí. En todo kaso, aworaki tin Beisbòl Veterano Liga 40 i Liga 50, unda por mira un basta bon nivel. Skibiendo di Beisbòl Veterano, e ekipo di Santa Maria Pirates a kibra e invikto di Santa Rosa Indians ganando di nan ku skor di 7-3 djasabra na Vi Jansen Ballpark. Esaki tabata e último weganan di e buelta regular di Beisbòl 40+ i 50+. Wikènt benidero (wikèt 26 I 27 di sèptèmber) lo stàrt ku e Round Robin di 40+ i Liga 50 ta start ku semifinal.
* * * * *
E buelta regular di Liga 50 a tèrminá djasabra último ku 4 partido na Van Engelen Ballpark. Liga 50 a tuma lugá pareu ku e Torneo Hechuchu i tabatin basta fanátiko na Van Engelen Ballpark. Den e promé partido, Jaws a pasa fásil riba Sluggers ganando ku skor di 13-3. Den e siguiente wega, Jandoret Raiders a ratifiká su promé lugá di e buelta regular ganando di Lions 13-3. Ban Serio a bini bèk anotando 5 kareda den nan último turno na bate pa laga e ekipo di Flamboyan/Gamers den tereno ku skor di 11-10. Dado momento Flamboyan tabata ganá 10-3 bayendo e di 4 inning. Ban Serio a anotá 3 kareda den bòm di e di 4 inning i 5 kareda mas den e di 5 inning pa bai ku e viktoria.
Den e último wega, e ekipo di Baranka a duna Marlins un palisa di 19-5. Marlins tabata dilanti 5-1 den di dos inning, pero despues Baranka a tuma e kontròl di e partido i pasa fásil ku un ofensiva di 21 hit i sin ningun eror. Djasabra awor e play-off ta stàrt na Van Engelen Ballpark, unda lo tin weganan di wild card entre e ekiponan ku a terminá di puestonan 4 te ku 7 riba e tabla di posishon. E posishon final di e buelta regular di Liga 50 ta: Jandoret Raiders 11-2, Ban Serio 11-2, Baranka 10-3, Flamboyan 8-5, Jaws 8-5, Marlins 7-6, Pitufos 4-9, Lions 3-10, Sluggers 3-10 i Artemisia 0-13.
* * * * *
E weganan pa djasabra 19 di sèptèmber ta: pa 12’or di mèrdia e di 7 lugá Pitufos kontra e di 4 lugá Flamboyan. Despues, pa 2’or di mèrdia, e di 5 lugá Jaws kontra e di 6 lugá Marlins. Djadumingu 20 di sèptèmber pa 2’or di mèrdia lo tin e wega krusial entre e ganadónan di e partidonan di djasabra. E siguiente djasabra, ku ta 26 di sèptèmber, pa 12’or di mèrdia e di 4 lugá lo topa ku e promé lugá Jandoret Raiders i pa 2’or di atardi e di 2 lugá Ban Serio kontra e di 3 lugá Baranka, den e serinan semifinal ku ta mihó di 3. Nos ta keda te aki pa awe i te mayan ku Poder di Dios.
