Dave Kirindongo no a firma ku niun ekipo ainda
WILLEMSTAD- Parse ku e èks profeshonal di Beisbòl, Dave Kirindongo ku a kumpli 40 aña den luna di mei 2021 no a firma ku niun ekipo ainda pa kampionato di Beisbòl Veterano. Rumornan tabata indiká ku Santa Maria Pirates lo a firma Dave Kirindongo despues ku ekiponan manera Isla Crackers, Bulldogs i Quality Stars tabata duru tras di e picher, kètcher, primera i tersera base. Dave Kirindongo a hala hopi atenshon djadumingu despues ku ela picha 2 inning kontra e ekipo Firebirds, poncha 2 batiadó, sin tuma hit i apénas un koredó a yega base riba eror di primera. Dave tabata hermétiko i sin duda e tabata e veterano mas destaká riba tereno.
Na bate Dave a bai di 2-1 ku un hit pa center. Rumornan fuerte ta indiká ku e ekipo kampion di Beisbòl Veterano ta fuerte despues ku Santa Maria a drumi un ratu. Isla Crackers tambe ta yegando serka bèk i Bulldogs ta den bulpen pa wak kiko ta bai pasa. Interesante e lucha pa haña Dave Kirindongo den Beisbòl Veterano.
