Dennis Gustina a firma ku Marchena Braves
WILLEMSTAD – E velos centerfielder di Beisbòl Dòbel A Dennis Gustina a firma djabièrnè último ku Marchena Braves. Dennis tabata práktikamente klá pa bai 3 aña mas ku Royal Scorpions, pero negosashonnan a pega i Dennis a bai Marchena Braves. Dennis a firma serka manager Gilmar Velder djabièrnè 18 di mart den Hokaah Boss na Salinja. Dennis ta un tremendo centerfielder for di den Little League i a hunga dos kampionato Mundial na Williamsport. Dennis a subi ku Santa Maria na 2016 i a keda 3 aña ku e ekipo i bira kampion ku Santa Maria na 2018.
Mesun aña Dennis a hunga tremendo ku selekshon di Kòrsou na Hulanda i por poko a keda Hulanda i hunga Beisbòl aya. Dennis a hunga ku selekshon di Hubenil (U-23) di Hulanda i tambe U-21 na Taiwan. Ku U-23 na Chekoslowakia Dennis a bira kampion. Un tremendo hungadó ku a bati .276 na 2021. Pa kolmo .276 na 2020 tambe i .289 na 2019. Tremendo averahe pa e defensa i e spit na base. Marchena Braves fuerte den 2022 rumbo pa e promé 4-nan den Beisbòl Dòbel A.
INFORMASHON DI BEISBÒL I SÒFTBÒL
Fanatikonan di Deporte Kòrsou , bon dia i felis siman. Hopi moveshon den fin di siman den Torneo Amstel Bright (Biright Premier Cup), Torneo The Brothers di Beisbòl Veterano i kampionato di Sòftbòl Femenino Veterano, Diamond Stars League. Den Torneo The Brothers ku a tuma lugá na Tata Beaumont Ballpark na Bonnam, The Brothers a sali gana Marlins ku skor di 14 pa 2. Den e otro wega, e parti di dia, Quality Stars a laga Santa Rosa den tereno riba hit di Dayron Puriel. E wega a terminá ku skor di 6 pa 5. Eduard Lovera a habri pa Quality. Rodney Michel a konektá homerun pa senter pa ekipo Quality.
* * * * *
Isla a gana Azucar. Nos ta pendiente pa resultado di e weganan di djadumingu. Azucar, Marlins, Isla i Quality a bolbe hunga djadumingu, miéntras ekiponan Vosama i Marchena a hunga nan promé wega. Weganan tabata Quality/Santa Maria, The Brothers/Vosama i Santa Rosa vs Marchena. Den dianan benidero nos tin mas komentario pendiente pa e weganan di wikènt 26 i 27 di mart. E torneo lo terminá 10 di aprel. Kampionato ta start 16 di aprel.
* * * * *
Bèk pa Bright Premier Cup. Ekiponan Jaws, Baranka, Ban Serio i Jandoret Raiders a klasifiká pa semi-final. Djasabra Baranka a gana Marlins 8 pa 1 i Jandoret a dal Lions 11 pa 1. Nos a traha e kolumna promé ku e weganan di djadumingu entre Jaws i Baranka sigí pa Ban Serio i Jandoret Raiders. Play-off di Amstel Bright a start djadumingu 20 di mart i e torneo ta planiá pa terminá djasabra 26 òf djadumingu 27 di mart. Bon públiko tantu riba djasabra komo djadumingu na Van Engelen Ballpark. Manera Torneo Amstel Bright terminá Torneo Hope ta start.
* * * * *
Saludo pa Kenneth Obispo di ekipo Lions di Liga 60. Kenneth Obispo despues di basta aña den Lions ta agente liber. Un bon hungadó i lo no dura hopi ku Obispo lo haña un ekipo pa aserké. Ekiponan ta preparando pa start kampionato i dianan 1, 2 i 3 di yüli lo tin torneo internashonal Wim Felicia ku partisipashon di ekiponan di Liga 60 i Liga 50. Fin di luna di aprel tin torneo ABC 50+ organisá pa ekipo Marlins na Van Engelen Ballpark. Torneo Hope lo wanta un wikènt pa despues sigí i terminá na komienso di luna di mei.
* * * * *
Dennis Gustina ku tabatin algun aña den ekipo Royal Scorpions a firma ku ekipo Marchena Braves djabièrnè último den Hokaah Boss. Dennis Gustina no por a yega na un akuerdo ku ekipo Royal Scorpions i a firma djabièrnè último. For di den luna di yanüari tabatin hopi interes entre ekiponan Santa Maria, Wild Cats i Royal Scorpions pa firma Dennis Gustina. Dennis Gustina a bai Royal Scorpions na aña 2019 serka su manager for di den komienso di su karera den Dòbel A, Raymond van Gurp.
* * * * *
Dennis tabata komo estelar centerfielder di Santa Maria te ku 2018 te na momentu ku Mompy a bai Royal Scorpions. Dennis tin apénas 26 aña i ta wòrdu konsiderá un dje mihó centerfieldernan defensivo di Beisbòl Dòbel A. Ta un dje varios hungadónan ku a bai Williamsport na dos okashon. Dennis a bai Williamsport na 2007 i 2008. Ela subi ku Santa Maria na 2016 i a keda 3 aña ku e ekipo i bira kampion ku Santa Maria na 2018. Ekipo Marchena dirigí pa general manager Quincy Virginie i manager Gilmar Velder tin intenshon serio pa terminá entre e promé kuaternan manera tabata e kaso na aña 2018.
* * * * *
Kedando den Beisbòl Dòbel A siman pasá Raysheandall Michel a firma ku Wild Cats. Sigidónan di Beisbòl Dòbel A i di Beisbòl Profeshonal engeneral ta pensa ku Raysheandall tin hopi adén ainda i por move pa Europa, (Hulanda òf Italia). Hopi ta pensa ku Raysheandall Michel mester bai USA i hunga den Independent Leeague i asina keda den bista di organisashonnan di Major League Baseball. Raysheandal a firma profeshonal ku Atlanta Braves i a kuminsá su karera profeshonal for di 2015. Na 2017 ela bati pa .312 i e tabata konsiderá gran prospekto. By the way, spònser mayo di Wild Cats, Kenley Jansen, a firma un kontrakt di un aña pa 16 mion dollar. Por spera mas moveshon den Wild Cats den e siman i lunanan benidero, pendiente kampionato di Beisbòl Dòbel A. Nos ta keda te aki pa awe.
