Di 11 edishon ‘Schotborgh Cup’ dediká na señora Meredith Trinidat*
WILLEMSTAD – Federashon Biyar Kòrsou ta kla pa inisiá 2026 ku un gran evento. Manera tabata kustumber pa último añanan, ta sera aña ku e aktividat konosí bou di nòmber di Schotborgh Cup.
Esaki ta un kompetensia entre islanan ruman Boneiru i Kòrsou, ku ta keda organisá semper durante e promé wikènt di desèmber. Pa motibunan fuera di nos boluntat mester a kambia fecha di e evento I ku plaser nos ta kuminsá e aña nobo aki ku e di diesun edishon ‘Schotborgh Cup’.
E biaha aki ta dediká e gran evento aki na Sra. Meredith Trinidat, kende ta e promé biardista ku a gana medaya den weganan panamerikano. Tambe nos lo duna rekonosementu na Sr. Bryan Farah, pa su kolaborashon i aporte balioso di mas ku trinta aña na deporte di biar.
E tremendo evento aki a inisiá djabièrnè dia 9 di yanüari pa 7’or di anochi ku e parti ofishal i seguidamente ta start ku e kompetensia. Ta bon pa menshoná ku ambos isla a gana e evento na sinku okashon, pues pues e aña aki ta kandela ta bai tin I asina wak ken ta tuma bentaha.
Boneiru su ekipo ta formá pa e hungadónan di biar Janiro Chatlein, kende ta kapitan di ekipo, Marvin Abdul, Yamir Jimenez, Garino Molina I Steve Simmons. Kòrsou su ekipo ta formá pa su kapitan Raymond Magdalena, Barath Ibrahim, Richinello Fransisca, David Prins, Salim Kuzi I Gemajel Rol.
Michael Arvelo lo ta e direktor deportivo I alabes e lo fungi komo árbitro prinsipal pa e di 11 edishon ‘Schotborgh Cup’. Federashon Biyar Kòrsou ta invitá tur amante di deporte, I prinsipalmente esnan di biar, pa bin apoyá nos representantenan.
E evento ta tuma lugá den Poolarena situá riba Gosieweg, skùin dilanti Las Vegas Shopping Center. Djabièrnè e evento ta ranka Sali 7’or di anochi, miéntras ku tantu riba djasabra komo djadumingu e evento ta kontinuá inisiando 2’or di mèrdia ku e respektivo enkuentronan. Un invitashon speshal ta bai na tur mayor pa bini ku nan yunan I di e forma aki sera konosí ku e deporte di biar.
DEPARTAMENTU DI ARBITRAHE KU OTRO TREMENDO KURSO DI ARBITRAHE!
INISIO DI E KURSO LO TA 12 YANÜARI 2026!
Departamentu di arbitrahe di FFK ta bai organisá e promé kurso di arbitrahe pa aña 2026.
Despues ku e otro kursonan básiko di añanan anterior a resultá di ta un éksito, e aña aki tambe ta bai organisá un kurso básiko pa tur hende muhé i hòmber di 15 aña òf mas, pa dirigí entre otro weganan di Kampionato Hubenil ku ta e kategorianan di U-9 te ku U-21, Kampionato femenino i maskulino di FFK.
Departamentu di arbitrahe ta enkurashá spesialmente nos hende muhénan pa partisipá na e kurso aki debí ku no tin asina tantu hende muhé ku ta arbitro. FIFA ta stipulá ku partidonan di dama mester keda dirihí pa rèfrinan femenino. Pues un yamada ta bai na tur dama pa bin duna un man i amplia nos kuerpo di arbitrahe.
E aña aki Departamentu di Arbitrahe ta enfoká riba kantidatonan ku dentro di 3 aña por subi lista di FIFA. Pa bin na remarke pa subi lista mester kumpli ku sierto eksigensianan; mester ta físikamente ‘fit’ i den bon kondishon i mas ku klaro un bon konosementu di reglanan di futbòl.
E kurso lo inisiá djaluna, 12 yanüari próksimo di 6’or di atardi pa 8’or di anochi i lo finalisá djaluna 26 yanüari 2026 ku un èksamen di 6or’or di atardi pa 9’or di anochi.
Ora kompletá e kurso ku éksito lo tin un periodo di ‘stage’ di 6 luna promé ku risibí e diploma.
Pa inskripshon por tuma kontakto ku departamentu di arbitrahe na referee@ffk.cw òf por manda un ‘app’ na 5482310. Inskripshon ta kosta fl.10,- i e kurso mes ta grátis, ku tur material inkluí. Por inskribí te ku 12 di yanüari 2026.
Pa abo ku ta un hóben dinámiko ku outoridat i ku ambishon, esaki ta bo oportunidat pa bira rèfri.
Inskribí awe mes, Departamentu di arbitrahe i FFK ta warda bo!
FTMK a tene su promé reunion di 2026
Diadumingu 4 yanüari direktiva di (Federashon Tenis di Mesa Kòrsou) FTMK a tene su promé reunion di 2026 pa papia riba su programa di aktividat di temporada 2026 esaki den kuadro di selebrashon di 70 anya di eksistensia di Federashon Tenis di Mesa Kòrsou.
Diadumingu tambe direktiva a organisa Un aktividat pa habri anya ku su miembronan ku por a diberti ku pin pon, mahjong idomino den Sala Irene Moreno.
Direktiva ta informá ku lo kuminsá ku treining pa hobennan riba 5 aña di edat riba tur dialuna i djarason di 6or pa 7.30 bou di guia di profe Joaquin I Pel Hernandez kuminsando dialuna 12 di yanüari den Sala di rekreo Irene Moreno situa na Muizenberg banda di Little League Ballpark.
E prome kompetensia den yanüari ta dia 29 yanüari ora ku e promé 10 hungadónan riba ranking kompetí den dos grupo di 5 pa determiná e puestonan di 1 te 10.
E hungadonan aki ta:
Dimitri Leon, Juan Carlos Sanchez, Ravi, Sigmar Carmelia, Peter Wong, Hensley Wentwoord, Jaysron Mathilda, Bennett Isebia, Henny Metry I Lucien Alberg.
Direktiva ta desea tur miembro hopi eksito den 2026.
