Direktiva nobo pa Aspafiko 2023 2026
WILLEMSTAD - E asosashon di paso fino Kòrsou, Aspafiko, tin un direktiva nobo pa e periodo di 2023 pa 2026.
Djasabra 21 di yanüari, a tuma lugá un reunion ekstraordinario den kua miembronan a keda invitá pa elekshon pa un direktiva nobo pa e asosashon.
Ta asina ku e asosashon tin algun luna ketu pará pa motibu ku no tabata tin un direktiva aktivo for di komienso di yüli 2022.
Miembronan a asistí di un manera positivo i durante di reunion e direktiva nobo a keda aseptá i instalá ku voto di gran mayoría di e miembronan presente.
E direktiva nobo ta konsistí di presidente Alfonso Zinhagel, sekretario general Reugene Provence i tesorero Angelique Dupree.
Direktiva diario lo keda sostené pa 6 komisario formando un direktiva di 9 persona. E direktiva nobo tin komo vishon pa engrandesé tur aktividat relatá na e asosashon, huntu ku tur kabaista sin importá status òf rasa. “Aspafiko pa Tur” ta e lema kual e direktiva aki ta para p’e. Direktiva ta gradisí tur miembro pa nan asistensia i tambe sosten. Pueblo di Kòrsou i tur kabaista ta keda invitá for di awor pa bin sera konosí ku e direktiva nobo durante nan promé aktividat. E ban topa aki lo tuma lugá djasabra 4 di mart próksimo na pista di Aspafiko. Mas informashon lo ta optenibel pronto riba página di facebook: Aspafiko Curacao i otro medianan di komunikashon.
ASPAFIKOpa TUR!
