Domi kampion di Torneo Dimi dediká na Oscar Bolivar
Willemstad – Manera grandinan sa bisa, ku Penadό no ta Pena largu. Esei ta loke e Bario di Domi a sinti despues ku lastu out a kai den torneo dediká na Señor Oscar Bolivar i Domi a gana di Los Renegados 5-4. SBC DIMI a organisá i dirigí un torneo di sòftbòl siman pasá na honor di nan mihó spònser den historia di e klup ku ta señor Oscar Bolivar.
SBC DIMI tabatin 3 spònser, Johnny Isabella, Walle Constructions i Drukkerij Scherpenheuvel di Oscar Bolivar. E torneo aki ta e promé ku un seri di 3 ku e klup ta organisá pa dediká na personanan ku a yega di hasi hopi pa e ekipo. Den luna di aprel 2026 lo bai tin e di dos torneo i ku pronto lo anunsiá na ken e ta wòrdu dediká. E otro ta bai ta na Hulanda fin di yüli, pa asina e klup selebrá su 40 aniversario. Ekiponan ku a partisipá na e torneo siman pasá: Bala Brothers, Santa Maria City, Roy Boys, Domi, DIMI Bario i Los Renegados. A klasifiká pa djadumingu ekiponan : Los Renegados, Domi, Santa Maria City i Domi.
Djadumingu e ekipo di Bala Brothers ta gana Santa Maria City i Los Renegados ta gana Domi.
Domi ta gana Bala Brothers i Santa Maria City, pa pasa pa e gran final kontra Los Renegados ku a bai drumi warda kua ekipo e ta bai haña.
Den un final ku a terminá pa un kareda, e ekipo di Domi ku Glenn Matrona komo pitcher estelar ta gana Los Renegados kontra tur pronóstiko ku sore di 5-4. E ekipo di Rafa tabata ganά henter e partido. Tabata den bòm di e di 6 inning ku Domi ta rally pa tres kareda riba un bala ku outfield ta trata na para, pero esaki ta bai te den waya i aki Domi ta kue un ventaha di 5-4. Den último turno di Renegados, nan ta bati dos fly, despues hit pa center. Ultimo batiadó tambe ta lanta flai pa asina Domi bira kampion di torneo organisá pa Dimi.
Tabata un euforia grandi pa Domi ya ku ta promé biaha ku nan ta bira kampion den torneo organisá pa Johnny Isabella. Na sinku okashon Domi Lions a bai final den liga Koktel i tur biaha keda kòrtiku. E hóbennan di Domi a bin saka kara di July i Eugene Ignacio, Loloy Maria i sobranan. Loke esnan di edat di Betesda no por a hasi durante tempu, e muchanan a yega pone kos pasa ku Farley Ignacio na kabes. Boysi ku semper tabata tras di Domi a sinta mira e partido kompletu. Tabatin selebrashon grandi te den oranan di mardugá. Mester duna Cesar, loke ta di Cesar.
Un danki na Eugene Ignacio ku a bin for di Sint Maarten i paga partisipashon di Domi pa nan por a partisipá.
Despues di wega tabatin entrega di premio i tambe un homenage na e gran persona di Oscar Bolivar na kende e torneo a wòrdu dediká. Un danki na miembronan di SBC DIMI, Jozef Martina, Taffy de Jongh, Junny di Westpunt, famia Lodewijks i Bolivar ku a kompania Oscar. Nos di Dimi ta gradesido pa esaki.
Mas resumen 2025
The Greatest ta gana Legends di Aruba i bira kampion Kopa ABC40+
ORANJESTAD – Awe nos ta sigi ku mas resumen di Sòftbòl Slwpitch I Beisbòl den 2025. Nos tin detaye di loke a pasa na Aruba tambe naturalmente. The Greatest di Kòrsou a gana Legends di Aruba ku skor di 8 pa 7 i bira kampion Kopa ABC 40+. E torneo a tuma lugá di 30 di aprel pa 4 di mei na hermana isla Aruba. Den e wega final Randy Kirindongo a bati di 3-3, Jair Josepha di 4-3, Ryan Ogenia di 4-2 i Dave Kirindongo di 2-1. Fernando ‘Paisa’ Rosario tabata e picher ganadó. Lorenzo Dirksz tabata e picher pèrdèdó pa Legends di Aruba i Edgar Flanegin a bai di 4-2. Anthony Thompson i Revelino Sille di 1-1. The Greatest a gana Pirates 7-2 dia 1 di mei. Dia 2 di mei The Greatest a gana Union Dominicano 11-8. Djasabra 3 di mei The Greatest a gana Quisqueya 12-10 i gana Leftovers riba mesun fecha 11-1. Den play-off The Greatest a gana Survival 9-0 i pasa pa final pa gana Legends 8-7. Despues di wega tabatin entrega di premio.
Ryan ‘Djaka’ Ogenia, (The Greatest), MVP di e torneo.
MAS INFORMASHON DI S0FTBÒL BEISBÒL
Fanátikonan di Deporte Korsou bontardi i felis wikent. Den di dos parti di desèmber 2025 aki i nos ta sigi ku resumen di Sòftbòl/Beisbòl di 2025 i naturalmente e notisianan fresku ku ta drenta serka nos. Awe nos tin un komunikado di Torneo Dimi ku a tuma lugá dianan 6 i 7 di desèmber den Stadion Post 6. Djadumingu nos a kombersá ku presidente di BEVEKO, sr. Ruisandro Cijntje tokante Beisbòl Veterano. Dia 4 di desèmber tabatin un reunion di Beisbòl Veterano kaminda un rèkert a keda kibrá. Di tur e 13 ekiponan di Beisbòl Veterano, sero (0) ekipo a presentá na e reunion general ku a tuma lugá riba e fecha menshoná. Si sigi asina si ta bira difísil pa Beisbòl Veterano yega na e nivel ku tabatin den añanan 2005 pa 2020. Den di dos alinea nos lo sigi amplia.
* * * * *
A bini timnan nobo den e añanan ariba menshoná manera, Santa Mara Food Center, Vosama, Santa Rosa Memories, The Bears, Jandoret Raiders, Santa Maria, Quality Stars den e temporada ei. Timnan ku a trese hopi fanátiko tabata The Bears, Jandoret, Santa Maria, Santa Rosa, Quality ets. En todo kaso e reunion tabata pa presentá relato finansiero i buska kandidato nobo pa forma direktiva nobo, pero niun tim no a bini. Ban wak kiko lo bai pasa den Beisbòl Veterano i timnan mester mobilisá formal pa yega na un direktiva pa asina e Beisbòl Veterano por sigi. Mester tene kuenta ku ta basta liga a para kaba na nada i no a organisá niun kampionato. Den 2025 pa promé biaha despues di kasi 40 aña di eksistensia ku Liga 40 Sòftbòl no por a organisá un kampionato. Ke mèn ekiponan ku ta komandá, mobilisá i organisá mesora promé ku ta lat. E direktiva interino a traha i hasta a laga algu atras pa esnan ku lo bini pasa tuma over.
* * * * *
Djadumingu nos a kombersá ku Johnny Isabella di ekipo DIMI. Ekipo DIMI lo kumpli 40 aña den 2026 i tin basta aktividat na kaminda, entre otro torneonan ku lo tuma lugá tantu na Kòrsou komo na Hulanda. E torneo ku a tuma luga dianan 6 i 7 di desèmber a move bon, apesar ku kosnan no ta manera ántes tempu ku Johnny Isabella tabata pone torneonan ku partisipashon di mas ku 35 tim. Johnny Isabella a bai bèk den historia di e ekipo Domi Lions. Nos gusta bai bèk den historia di Sòftbòl Slowpitch/Beisbòl ets. E grandinan, esnan ku ta kumpra korant ta gusta e kos aki mes i nos ta risibí reakshon konstant. Nos ta bai 2025 òf mas den historia i tene kuenta ku ta e grandinan ei ta destakando den Liga 50 i 60 ku ta dos liga bibu bibu. Hopi komentá e entrada di Baranka den Liga 60. Baranka a start na 1987 ku un ekipo di hóbennan despues bai 40, bai 50 i awor ta den 60. Saludo pa nos amigunan di Jaws ku ta úniko organisashon ku tabatin ekipo den tur Liga, Liga Van Engelen, Liga 40, Liga 50 i Liga 60.
* * * * *
Nos a dal den algun artíkulo di Liga 50 di 2004, ke mèn 21 aña pasá. Hungadónan di Jaws ku tabata komandá Liga e tempu Riley Toppenberg ku ketu bai ta den gran forma tabata e picher ganado. Riley tin segun 73 aña i ketu bai ta un dje pichernan mas destaká di e lIga. Jaws ku batiadónan manera Vanchi Toppenberg, Fety Curie ets. tabata destaká e tempu ei. Dos gran batiadó di tempu di Jaws su tempu den Liga 50. E toronan aki a yuda Jaws ku hopi título den Liga 60 tambe. Caterpillar tabatin Jozef Martina i Mirto Martina nan aki destakando. Marlins 50+ Randy Bernardus (QEPD), Donald ‘Donnyu’ Balentina i Melvin Alexander ainda aktivo den ekipo Los Amigos den 60+. Ronald Mingeli tabata picher pa ekipo Marlins. Richenel “Rich” Bonifacio picher pa ekipo Los Amigos. Los Amigos tabatin Ulvic Kirindongo i Richard Moesker komo mihó batiadónan. Saludo pa Ulvic Kiridongo ruman di Cedric Kirindongo. Dia 12 di desèmber Cedric Kirindongo a kumpli un edat respetá (70 i hopi). Tremendísimo redaktor i lokutor deportivo, master den MLB. Tata di amigu Clint Kirindongo. Nos ta keda te aki pa awe i te djarason ku Poder di Dios.
