Dylan Harms a firma ku Wild Cats
WILLEMSTAD- Dylan Harms ku na 2021 a hunga ku Santa Rosa Indians, a firma ku Wild Cats djarason último. Dylan Harms lo bai hunga segunda base i shortstop pa Wild Cats. Harms ku tabata den gran forma den 2021 ku Santa Rosa a bati .270 durante temporada regular. Den play-off Dylan a bati .333 den 4 wega kontra di Royal Scorpions.
Un refuerso formal pa Wild Cats i probablemente Dylan Harms lo hunga segunda base regular den 2022. Un hungadó ku no muchu fama di selekshon, pero ku ta hasi e trabou. Promé ku 2021 Dylan Harms a hunga 3 temporada ku Royals Scorpions. Ta un hungadó ku a kuminsá for di 4 aña den organisashon DABA di Hensley Meulens, sigi pa Montab serka Darcy Martinus i despues Santa Rosa. Djarason siman pasá nos a mira Dylan Harms den akshon den tunnel di Bam Bam Tech na Sambil ku ekipo Wild Cats. Dylan Harms di 22 aña a filea tremendo ku solamente 3 eror den 54 chèns pa un bon averahe di fildeo di .944.
Fanátikonan di Deporte Korsou, felis siman. Torneo Hope 2022 a start, djasabra i djadumingu tin masha hopi wega tantu riba tereno A komo tereno B. Hopi ekipo tin problema pa hunga den dia i mayoría ekipo ke hunga anochi anto den oranan lat di anochi. Organisadónan ta man na kabes i mester wak kon ta bin ku un Liga Hope di mardugá manera tempu di Liga Dok di mardugá aya na Dominguito.
* * * * *
Ekipo Marlins a tene un reunion entre hungadónan pa organisá e torneo Kopa ABC 50+ ku lo tuma lugá dia 27 di aprel pa 2 di mei na Van Engelen Ballpark. 9 ekipo di Kòrsou, 2 di Aruba i 1 di Boneiru lo partisipá na e Kopa ABC. Marlins kompletu lo hinka nan skouder bou di e evento ku ta primintí di bira un éksito kompletu. Ta for di 2018 tabatin Kopa ABC kaminda ekipo Ban Serio a titulá kampion aya na Aruba. E torneo ta dediká na Johnny Martina (QPED) ku tabata centerfielder estelar i tesorero di ekipo Marlins 50+.
* * * * *
Pa loke ta Beisbòl Dòbel A, ekipo Wild Cats a firma Dylan Harms di Santa Rosa ku ta segunda base i por hunga shortstop tambe riba nivel haltu. Ku baimentu di Calten Daal di Wild Cats pa Santa Rosa, a mira nesesidat di profundidat den Wild Cats i mesora a aserká Dylan Harms pa e bini e ekipo kampion. Dylan Harms tabata regular na segunda base pa Santa Rosa temporada 2021 i a hasi un gran trabou. Tremendo atkisishon di Wild Cats ku ke bai pa un dinastía loke a bira hopi difísil den e Beisbòl di awendia aki na Kòrsou. Ta Wild Cats a yega di bira kampion 8 biaha sigí, Santa Rosa, Santa Maria i Alpha Zelbo 3 biaha sigí den pasado.
* * * * *
Santa Maria ta pendiente pa firma e 3 hungadónan ku nos a menshoná un ora pa otro. Ta trata aki di Curtje Doran, Kevin Moesquit i Yurendell De Caster. Resientemente Yurendell de Caster a bisa nos ku e ta rumbo pa Santa Maria i ku ta algún detaye falta pa e firma ku e ekipo di bario kaminda ela kuminsá ku su karera. Santa Maria lo trata di drecha nan picheo pa nan ta mas kompetitivo pa bai bèk final. Santa Maria ta e ekipo ku a hunga den mas final último 20 añanan. Di 2003 pa 2018 Santa Maria tabata sólido i den kasi tur final.
* * * * *
Pitufos lo ta na Aruba fin di mei. E otro ekiponan di 50+ ku mester a bai Aruba a wanta un ratu i Pitufos lo bai ku algún refuerso tremendo di otro ekiponan. Pitufos lo bai ku dos outfielder di Marlins pa Aruba den e torneo internashonal ku ta dediká na Lionel Sambo. E torneo ta konta ku partisipashon di ekiponan di Kòrsou, Aruba, Boneiru, República Dominicana i Puerto Rico. Ta un torneo ku lo sigi den e añanan benidero. Nos ta pendiente di mas detaye di e organisadónan.
* * * * *
Nos tin skèdjel di Torneo The Brothers ku lo sigi e wikènt aki na Tata Beaumont Ballpark. Djasabra pa 10.30’or lo tin un wega amistoso. Den e di dos wega pa 13.00’or ekipo The Brothers ta hunga kontra Isla Crackers i despues pa 15.30’or ta sigi Santa Maria kontra Marchena. Djadumingu 3 di aprel pa 10.30’or tin wega amistoso atrobe i pa 13.00’or Marlins lo hunga kontra Azucar i despues Isla Crackers vs Vosama. Wikènt 9 i 10 lo tin semi-final i final. Pa loke ta Little League, djasabra) tabatin anunsio importante di play-off i mas detaye riba Facebook page di Curacao little League.
