Earl Virginia di ekipo Nos Power pa Nos Tambe Por
WILLEMSTAD- Earl Virignia tremendo tersera base di Nos Power a pasa pa Nos Tambe Por den Liga 60 di Sòftbòl. Earl a hunga for di 58 aña den torneonan ku Nos Power i despues 59, 60 i 61 aña den e kampionato ofishal. Earl Virignia a reforsá ekipo Nos Tambe Por den Dutch Cairbbean Master 60+ na Kòrsou, Boneiru i Aruba e último 3 añanan i a skohe pa bin hunga ku e ekipo Nos Tambe pa 2026. Nos Tambe Por ta pendiente di mas hungadó, entre otro algun ku lo kumpli 60 den 2026 manera Sedeney Lourens, Sharlon Hanst i Stanley Palm. Nos Tambe Por lo tin un dream team pa 2026 i ta rumbo pa mas titulo den 2026 i pendiente bèk e dinastia ku Nos Tambe Por tabatin durante añanan 2019, 2020 i 2021. Keda pendiente pa mas informashon di Liga 60 di 2026.
MAS INFOMRASHON DI SÒFTBÒL I BEISBÒL.
Fanátikonan di Deporte Kòrsou, bon dia i felis siman. Nos tabatin un fin di siman trankil pa loke ta trata Slowpitch i Béisbol. Djabièrnè start e Torneo FABB, organisá pa Fundashon Akademia di Beisbòl Brievengat. E torneo aki ta dediká na Ceddanne Rafaela i Fai Sille. E apertura ofisial a start 6’ot pm na Van Engelen Ballpark, kaminda e ekiponan lo desfilá drenta den e parke a siguí pa orashon, himno i diskursonan, honor na e personanan na ken e torneo ta dediká i despues tabata playball pa start ku e promé partido. Manera ya a bira un tradishon, tabatin masha hopi fanátiko mes riba e promé fecha aki. Aña pasá Santa Maria a gana den kategoria Minor i Aruba a bai ku e título den Little League. Béisbol Little League ta sigi "a la karga" den e aña 2026 aki.
* * * * *
Nos a topa ku un artíkulo kaminda e ekipo Cicoza a parti renchi pa tur hungadó komo parti di e kampionato ku nan a gana den Kopa ABC&S 2015. E selebrashon tabata na WTC. Cicoza lo kumpli 50 aña di eksistensia den 2026 i lo organisá e Amstel Bright Premier Cup. Tambe nan lo t’ei presente den Kopa ABC&S ku lo tuma lugá na Sint Maarten e aña aki. Den Liga 50, e moveshonnan i lòbimentu ta sigi pa eligí un presidente nobo. Nos a risibí un ñapa ku e kandidato ku ta aktualmente bezig ta lòbi tin hopi chèns di sali ganadó. Pa loke ta Liga 60, nos a haña informashon ku Earl Virginia lo pasa pa hunga den e ekipo Nos Tambe Por. Despues di kasi 4 aña ku Nos Power, Earl ta move pa e ekipo super kampion. Earl tin algun aña kaba ta reforsá Nos Tambe Por ora ta trata di e Dutch Caribbean Tournament Master 60+.
* * * * *
E ekipo di Baranka ta moviendo duru den Liga 60 pa trata di yega den e promé kuaternan. Nan ta masha aktivo tambe den Liga 60 ku hungadónan manera Richenel i Sendley Reina, Elvin Regina, Robertico Ramazan, Urvin Martina, Inac Jonis, Siegfried Lopez i otronan. Baranka lo bira e ekipo number 9 i tin tur indikashon ku lo hunga un buèlta i mei en bes di dos. Probablemente e timnan lo hunga mas o ménos 12 pa 13 wega pa asina terminá e kampionato den luna di òktober òf novèmber. Na vários okashon Liga 60 a yega di terminá den desèmber, pero na 2025 nan a kaba nèt dia 30 di novèmber.
* * * * *
Tokante Curaçao Professional Baseball, nada no ta konfirmá ainda. E situashon na Venezuela ta keda un preokupashon i e Serie de las Américas tambe ta den duda. Major League Baseball (MLB) a konsehá su hungadónan pa para nan partisipashon den e kampionato Venezolano. Maske no tin un komunikado ofisial i tin masha hopi rumor, e inseguridat ta keda. Pa loke ta MLB, kambionan importante ta sigi i ainda no tin hopi informashon nobo tokante e World Baseball Classic. Nos ta keda te aki pa awe. Te mayan ku Poder di Dios!
