Ekipo Los Amigos a selebrá 20 aña i presentá unifòrm nobo
WILLEMSTAD- Ekipo Los Amigos di Liga 60 a bini huntu pa rekordá e echo ku 20 aña pasá nan a keda fundá. Djadumingu 27 di febrüari den oranan di mainta tabatin un Santu Sakrifisio di Misa na Misa di Koraal Specht. Despues di Misa a bai na kas di Ingemar 'Maal' Jonis kaminda tabatin selebrashon. Tabatin palabra di fundadó Boy Evertsz i palabra di miembro di ekipo Ingemar Jonis. A entregá sertifikado na Boy Evertsz i despues presentá unifòrm nobo.
Veterano Otrabanda a premia MVP Giovanni Maduro
WILLEMSTAD- Djasabra 26 di febrü0ari 2022, ekipo Otrabanda di Beisbòl Veterano a habri aña na nan station na Vi Jansen Ballpark. E evento a tuma lugá den presensia di dirigente, hungadó i fanátikonan. Direktiva a premia e hungadó Giovanni Maduro ku tabata e MVP di temporada 2020 i 2021. A duna bon biní tambe na hungadónan nobo ku ta Bertyson Ignacia, Dangelo Moesker, Alcides Juliana i Roderick Martina. Tabatin kos di kome i bebe na granèl stail di Veteranos Otrabanda.
E wikènt aki moveshonann a start den Sòftbòl Slowpitch. Djabièrnè 4 di mart a start ku Amstel Bright Premier Cup na Van Engelen Ballpark. For djarason 2 di mart tur lista mester tabata aden pa start ku e kompetensia. Tur ekipo mester manda nan lista adén riba un dokumentu di Xcell, p’asina e organisadónan por hinka e nòmbernan den ‘Game Changer’ mesora, pa weganan por bai online. Durante i despues di wega por haña e resultadonan mesora. Nos lo ta up to date ku e resultadonan durante e 3 simannan benidero.
* * * * *
Djaluna tabatin selebrashon di 40 aña di ekipo Pitufos. E aña aki e ekipo PItufos lo debutá den Liga 60 na Frank Curiel Ballpark i e ekipo lo ta den gran forma atrobe den 50+ na Van Engelen Ballpark. Vários moveshon den Liga 50 di SòftbòI na tereno e wikènt aki. Nos lo risibí mas informashon di kambionan ku ta bai tin e aña aki. No ta konosí kiko ta bai pasa ku LIga 40 di Sòftbòl e aña aki. Un gran dirigente a bisa nos ku e no sa kiko ta bai pasa. Na 2021 a drei ku 5 ekipo. 35 aña pasá ora a ku a start ku e liga tabata kuestion di mas ku 8 ekipo. Tur e veteranonan di e tempu ei ta den Liga 60 i mayoría a bula 70. Te ainda e intenshon ta pa lanta un liga 70 di maske ta 4 ekipo òf sikiera hunga un all star di 70nan kontra di otro riba tereno. E aña aki grandinan manera Riley Toppenberg lo yega 70, miéntras Vanchi Toppenberg lo kumpli 69 den kurso di aña. Dos ruman hopi aktivo pa hopi tempu den Slowpitch.
* * * * *
Ekipo Otrabanda di Beisbòl Veterano a habri aña djasabra na nan station aya na Vi Jansen Ballpark. Na e okashon ei a premia e MVP di 2021 ku tabata Maduro. Hungadónan nobo manera Roderick Martina a bini bek. Alcides Juliana tremendo hungadó ku den 2021 a hunga den Santa Rosa Memories, tei bèk ku Otrabanda. Dirigentenan di Otrabanda ta sigur ku nan lo sali for di sótano i bai den e grupo di mei mei huntu ku Azucar ku Marchena ets. Nan no ta papia di klasifiká den e promé 6-nan ainda, pero esei ta na kaminda.
* * * * *
Beisbòl Little League a sigi den fin di siman na e parkenan na Kòrsou. District Administrator lo reuní ku direktiva di Liganan pa pone fecha pa play-off. Weganan Regional riba nivel di Karibe i Latino Americano tur fecha i sede ta skohí kaba. Intermediate lo ta na Kòrsou manera nos a anunsiá resientemente. By the way, djabièrnè 4 di mart a start Liga Soraida Juliana, Curacao Little League Sòftbòl. E apertura tabata den Buena Vista Ballpark. Kòrsou lo tin dos selekshon di Sòftbòl den eksterior, den e kaso aki na Puerto Rico. Kòrsou lo tin selekshon Junior i selekshon Senior na Puerto Rico.
* * * * *
Miéntras tantu nos a risibí resultadonan di the Diamond Stars League. Den e klèsh di e liga ku a tuma lugá djadumingu atardi, e ekipo Nos Goso a gana Treasure New Era ku skor di 5 pa 4. Bastante eror si den e wega, 10 total. 7 pa Nos Goso i 3 pa Treasure New Era. Apesar di e 7 erornan di Nos Goso, nan a gana tòg ku dos homerun konektá pa Emily Jonis ku awor tin 3 homerun konektá den apénas 2 wega. Nos tin resultado di e otro weganan. Djabièrnè Nos Goso a gana Eureka 7 pa 0 (e wega no tin sifras ké mèn pa defolt). Treasure 20,The New Warriors 0. Djasabra Rising Trotters 9, Mas Goso 3. The Fighters 24, Lady G 2. Weganan a sigi djadumingu Mas Goso 6, Lady G 2. Rising Trotters 9, The Fighters 2. Nos Goso 5, Treasure 4.
