Sòftbòl i Beisbòl - Ekipo Petro Amigos den final djadumingu 28 di aprel na Boneiru i semifinal torneo Hope

Ekipo Petro Amigos den final djadumingu 28 di aprel na Boneiru

WILLEMSTAD – Petro Amigos lo topa ku Hulanda (Good Vibes) den final 50+ di Torneo Ekipo. Petro Amigos a gana dos wega kaba, Asodobo 5-3 i The Brohters 4-2. E ekipo ku tin vários hungadó di 50+ di Jaws lo kompetí kontra ekiponan di Hulanda i Aruba. Ta trata aki di Torneo Russel ‘Chino’ Hellement. Petro Amigos ta bai fuerte pa e título ku hungadónan manera Deron Clara, Fransje Lambertina, Victor Caldera, Nelly Jakoba, Juny Marselia, Tico Rafaela, Cedrix Valies, Arlyson Sommer, Eddie Thielman, Fernando Rosario, Enrique Madera i naturalmente Edison Sambo. E ekipo a move djabièrnè 26 di aprel pa Boneiru.

Ekipo Petro Amigos, ekipo dirigí pa Edison Sambo ku ta biaha tur aña pa eksterior. nan ta den final atrobe.

‍

Eksito na ekipo Petro Amigos ku ta un ekipo ganadó tur tempu. Den e ekipo di Hulanda tin entre otro Angelo Clementina, Isho Dunlop, reforsá ku hungadonan Jolly Juliana i rumanan Ram i Clinton Kirindongo.

‍

Play-off Torneo Hope ta sigi awe 28 di aprel i terminá 1 di mei

‍
WILLEMSTAD – Torneo Hope 2024 a start ku play-off djabièrnè i e torneo lo terminá djarason 1 di mei na Van Engelen Ballpark. Tantu riba djabièrnè 26 i djasabra 27 di aprel tabatin varios wega di playoff riba e karke menshona. Organisadónan ta pidi pa tur ekipo tene kuenta, debí ku a bini ahuste na e skema pa terminá dia 1 di mei. Nos a risibí un mensahe kòrtiku di e organisadónan ku a bai pa ekiponan.
“Please tuma nota di e skema di siman 6 i standingnan. Eksito na tur ekipo ku a krusa. Tene kwenta ku nos lo hunga 26 - 27 - 28 aprel i dia 1 di mei (Dia di Obrero). Finalnan lo ta 1 di mei 2024. Nos ta klousurá HOPE i selebrá ku e kampionnan i tur partisipante i fanátikonan di HOPE 2024 ku Grupo Oriri.”

Play-off Torneo Hope ta sigi awe djadumingu ku varios wega di kuart final i semifinal.
Final di Torneo Hope ta djarason 1 di mei.

‍

Chilling Jaguar na Boneiru pa Torneo Russel ‘Chino’ Hellement

WILLEMSTAD- Chilling Jaguar ta partisipando den e Torneo “Russel ‘Chino’ Hellement” na Boneiru. E ekipo di Chilling Jaguar a biaha dia 25 di aprel ku 19 hungadó pa asina representá Kòrsou na e torneo internashonal di Sòftbòl Femenino 35+. Lo tei Aruba, Boneiru, Kòrsou i Hulanda. Fuera di e miembronan di Chilling tin diferente refuerso pa asina yuda e ekipo.
Komo manager lo bai Ruwel Matrona i dos coach ku ta Yerson Rosalina i Sherlon Martis.

‍

Na yegada e ekipo di Chilling a wòrdu risibí pa sr. Angelo Domacasse di ofisina di turismo di Boneiru i tambe dor di sr. Segni Bernadina di e organisashon ACE ku ta enkargá ku e parti di aktividatnan sosial. E ekipo ta kedando na Resort Bonaire. Hungadónan ku ta bai lo ta: Remienne Ambrosina, Suyenne Apostel, Svenska Bazur, Maria Bentura, Dientje Carolina, Valeria Christina, Angelique Fransina, Richenella Jamanika, Loeshemains Kook, Grace Leitoe, Esterline Lindeborg, Esmeralda Mutueel, Shunesca Martina, Jandely Ricardo, Mellissa Rosalina, Loeyendra Valentijn, Candida Girigorius i Miosotis Yearwood Ricardo. E ekipo a bula djaweps 25 di aprel pa Boneiru.

Torneo ta dediká na Russel ‘Chino’ Hellement.

‍

MAS INFORMASHON DI SÒFTBÒL I BEISBÒL

Lesadónan di Deporte Kòrsou, bon dia i bon siman . Torneo Hope ta terminá dia 1 di mei na Van Engelen Ballpark. Na promé instante tabata programá pa kaba 5 di mei, pero kosnan a kambia. Tin algun ekipo na kareda si, pero a anunsiá for di siman pasá ku lo bini kambio den skema. Djabièrnè aa start ku e promé weganan di play-off. Djabièrnè tabatin tres wega riba tereno A i 3 wega riba tereno B. Pa promé biaha den oranan di anochi lo tin dos wega pareu riba vèlt A i B. Djabièrnè lo tin weganan di Soshal i di COED. Djasabra tabatin tin weganan te den oranan di anochi riba tereno A i B.

Aqualectra ta sigi den playoff tantu den 40+ komo Soshal Maskulino.

‍
* * * * *
Djasabra tin weganan di Liga 40, Femenino i otro kategoríanan di Torneo Hope. Ekiponan ku a klasifiká invikto den Torneo Hope ta Brandweer, EWT/ Centrum, Aqualectra, KPC Polis, Corendon, GGZ, The Living Legends, The New Radiator, Bala Brothers/Kunuku Aqua Resort, Chonchies, CMC, Onderwijs GSH/HICC, MCB. ADC/CMC. KPC ta úniko ekipo ku a klasifiká invikto den e kategoría 40+. Tur otro ekipo a terminá ku rèkòrt di 1-1 i rèkòrt di 0-2 den 40+. Tur e 6 ekiponan a klasifiká i awor e kos ta bai sinta. Ta spera un públiko grandísimo den e último wikènt di Torneo Hope. Ayera ekiponan Polis 40+, Flow, Aqualectra Soshal, Friday’s ets a gana. Nos no a risibí e otro resultadonan.

Hopi akshon na Van Engelen i dia 1 di mei ta terminá.

‍
* * * * *
Na e momentunan aki tin torneo grandi na Boneiru ku partisipashon di dos ekipo di Kòrsou. Ekipo Chilling lo ta na Boneiru den kategoría 35+ Femenino, miéntras Petro Amigos lo tei pa defendé Kòrsou den 50+. Tin e kategoría Maskulino Open tambe, kaminda ekiponan di Aruba i Boneiru lo topa otro. Ekiponan di Boneiru ta The Energizer, La Sonrisa i The Crushers, ekiponan konosí den Torneo Kopa ABC&S. Den dama 35+ tin New Angels, Yellow Birds, Sweet Devils (Aruba) i Chilling Jaguar di Kòrsou. E dos proménan ta ekipo di Kòrsou. Pa loke ta trata Maskulino 40+ tin Criollo Reds di Aruba, Union Dominicano i Braves Legends di Boneiru. E kategoría ku mas partisipante ta Petro Amigos di Kòrsou, Good Vipes (Hulanda), The Brothers, Asodobo i Dragons di Boneiru. Den 50+ Petro Amigos lo topa ku Good Vibes di Hulanda. Nos ta pendiente pa mas informashon di e torneo.

‍
* * * * *
Djarason anochi vários grandi di Sòftbòl i Beisbòl a drenta Salon di Fama di FDOK. Grandinan manera Frank Curiel, Bencho Imperator, Jozef Martina, Kenneth Gijsbertha, Leonise Avastia, Xiomara de Lanooy a drenta Salon di Fama di FDOK durante un seremonia impreshonante. Huntu ku esnan di Beisbòl i Sòftbòl tin Hensley Rondei di Dam, Nooi Girigorie (Futbòl) i Ramiro Hart di Vòli i Ruthsel Martina di Atletismo. Pa promé biaha dos ruman a drenta Salon di Fama pareu ku ta Jozef Martina i Ruthsel Martina. Nos tabata presente pa biba e momentu ku nos amigunan di deporte.

‍

Nos Deportistanan ku a drenta Salon di Fama.

‍
* * * * *
Nos a risibí informashon ku Baranka lo no partisipá na Classico ABC 40+ ku lo tuma lugá na Boneiru den luna di mei. Tin indikashon ku Baranka lo legumai e Classico 40+ kompletu. Parse ku e asuntu a pega kaminda Baranka i otro ekiponan lo bai hunga double header tur dia. Esei lo bira ferfelu pa ekipo Baranku. Ku 7 ekipo partisipando por parti e ekiponan den dos pul i hunga 3 wega i e otro tim por hunga dos wega. Por hunga krusa tambe di manera ku ekiponan ta hunga dos òf tres wega den e buelta regular. Manera e skema ta ekiponan lo hunga 6 wega den e buelta regular i dos wega mas ku ta 8 wega den 4 dia ku ta muchu naturalmente. Miéntras tantu Marlins di Kòrsou i Ban Serio ta preparando fuerte pa Kopa ABC&S ku lo tuma lugá na Aruba. ABC&S di e hóbennan lo tuma lugá na Sint Maarten alrededor di Dia di Ascencion.
* * * * *

Baranka no ta partisipa na Classico 40+ na Boneiru.

‍
Pariba a gana Pabou fasil 1,2,3 den e play-off di Junior League i klasifika pa hunga hunga den e kampionato Latino America na Nicaragua di 4 pa 15 di yuli 2024. Tabata spera kandela ku habridónan manera Davey Jay Rijke pa Pabou i Jayden Elizabeth pa Pariba. Davey Jay Rijke a tira 97 bala djabièrnè dia 19 di aprel i resultá e picher pèrdèdó. Davey Jay Rijke tabata tira lansamentunan di 87 mia, miéntras Elizabeth tabata tira entre 78 i 80 mia, pero ku hopi kontròl. Elizabeth a sali picher ganadó di e wega. Djabbèrnè Elizabeth a bolbe gana tirando un no hitter faltando un out pa e wega terminá. Nos ta keda te aki pa awe den nomber di Dios.