Ekipo Unidos a entregá unifòrm na kas di spònser Geradel Rental
WILLEMSTAD- Djarason, 25 di mart 2026 ekipo di 50+ di Liga Streanan Dj’Ayera, Unidos a entregá unifòrm na kas di spònser Geradel Rental. Tabata un anochi masha spesial ku a bai kombiná ku kues kaminda spònser repartí premionan lukrativo manera rice cooker i otro premionan. Sra. Ada, hungadó i spònser di e ekipo a hiba palabra pa despues entregá unfòrm na e ekipo Unidos ku tin hopi aña di eksistensia. Ta trata di un ekipo ku pa hopi aña ta kompetí den e Liga Streanan Dj’Ayera. E ekipo lo ta den akshon djadumingu awor na Jaguar Ballpark na Muizenberg. Riba pòtrèt por mira e hungadónan ta pose durante entrega di premio.
Baranka kontra Nos tambe Por djadumingu awor den Torneo Amistoso
WILLEMSTAD- Baranka, un ekipo super eksitoso den historia, lo debutá den 60+ den un torneo amistoso ku lo tuma lugá djadumingu awor na Frank Curiel Ballpark. Baranka lo topa ku ekipo Nos Tambe Por pa 3.30’or i for di den oranan di mainta lo tin weganan kandela entre e mihó tim nan di 60+. Baranka lo presentá ku su estreanan enkabesá pa e picher di Siegfried Lopez. Baranka lo tin debutantenan manera Mompy van Gurp, Frensel ‘Fencho’ Lard, Robertico Ramazan, Uchi Reina, huntu ku otronan ku ya tin eksperensia den 60+ manera Sendley Reina, Jerson Beaumont, Jo Martina i otronan. Tin tur indikashon ku Baranka a drenta Liga 60 den 2026 pa klasifiká mesora i bai final. Siegfried Lopez ta eks picher pa hopi aña ku ekipo Nos Tambe Por i a anunsiá ku Siegfried Lopez ku awor ta ku Baranka, lo habri e wega ei. Hopi interes naturalmente pa e torneo i e otro weganan. E otro weganan ta 11’or Los Amigos – Curacao Super Stars, 12.30’or Pitufos – Lions, 2’or Jaws – Sluggers i 3.30’or Nos tambe Por vs Baranka.
Lesadonan di Deporte Kòrsou bondia i felis wikènt. Mayan ta start ku Torneo Hope 2026 na Van Engelen Ballpark ku partisipashon di masha hopi ekipo di Sòftbòl Soshal/Komersial. Djarason tabatin entrega di unifòrm di ekipo Unidos ku ta hunga den Liga 50 di Liga Streanan di Ayera i nos tin tambe algun detaye di Kopa ABC&S di 50+. Miéntras tantu playoff di Senior League a start ayera nochi den Tio Daou Ballpark. Ayera mester tabatin wega number 3 den e kategoria di Junior. Pabou a gana e promé ku skor pèrtá 8-7 i despues Pariba a gana ku skor di grandi 13-5.
* * * * *
Nos lo tin e resultado di wega number 3 den e artíkulo di awe. Nos tabata presente den Tio Daou Ballpark djarason i tabatin mas ku 15 skout pa mira nos Junior Leaguernan den akshon. Ayera tabatin mas skout debí ku ta e hóbennan di Senior League di kual mayoría ta den nan último aña. Djabierne anochi por a mira Davey Jay Rijke den akshon ku ta un picher ku sin muchu esfuerso ta tira 95 mia. Hopi no ta kere, pero nos mes a midi e picher aki den e kampionato di Karibe aña pasá i e tabata tira 92 pa 93 mia. Un aña despues tin tur indikashon ku lo e ta tira 95 mia. Naturalmente Tio Daou lo ta kargá ku skout i fanátiko pa mira e hóben Davey Jay Rijke den akshon. Davey Jay Rijke lo firma komo shortstop den 2027 i hopi chèns ku aya na República Dominicana of USA nan lo konvertié den picher.
* * * * *
E seri mihó di 3 di Senior League a hunga promé wega djabierne i e otro weganan lo ta 2’or di mèrdia. Pabou a gana Pariba 6-2 deespues ku nan tabta pèrdí 2-1 te den di 6 inning. Extra Inning tur tur ku Little League i nos lo tei naturalmente di 7 pa 12 di aprel ku tansmishon bibu en kadena ku Telecuracao direktamente for di Stadion Post 6. Lo no tin kaminda pa pone hende den Stadion Post 6 den e dianan ei. Kòrsou ta realmente grandi den Little League i kòrda ku nos tin kampionato di Karibe di Senior atrobe ku lo ta di 29 di yüni pa 5 di yüli den Tio Daou Ballpark. Ta basta hóben di selekshon aki ta pendiente pa firma na 2027 i algun 2028. Ta hungadónan ku a hunga na Williamsport den Mundial di Little League añanan 2022 i 2023. Algun di nan naturalmente falta algun aña mas den Senior i lo firma na 2028.
* * * * *
Bèk pa Slowpitch. Kopa ABC&S organisá pa Marlins lo tuma lugá di 14 pa 19 di mei na Van Engelen Ballpark lo tin 4 ekipo di Kòrsou, 4 tim di Aruba, 2 di Sint Maarten, 1 di Boneiru i 1 di Sint Eustatius. Lo hunga den 3 pul, ganadónan di pul i e mihó di dos lugá lo klasifiká pa playoff semifinal i despues lo hunga final . Keda pendiente pa mas informashon den e dianan benidero ku nòmber di e ekiponan ku lo partisipá na e tremendo ABC&S ku segun nos tin kasi 25 aña ta drei entre e 50+ di Aruba, Boneiru i Kòrsou. Despues Sint Maarten a djoin i den mei aki Sint Eustatius lo partisipá pa promé biaha den e kopa ABC&S 50+. Ta bon pa nan reforsá ku algun hungadó di Saba pa asina forma un tim kompletu pa kompetí den e kopa ABC&Sku lo bira fuertísimo.
* * * * *
Djadumingu 29 di mart tin e gran torneo organisá pa ekipo Nos Tambe Por. E torneo aki ta konta ku partisipashon di kasi tur ekipo di Liga 60 i tuma lugá na Frank Curiel Ballpark. Ekipo Baranka lo debutá ku un aliniashon fuerte ku hungadónan manera Sendley Reina, Mompy Van Gurp, Fenchi Lard, Tico Ramazan, Uchi Reina, Elvin Regina, Jerson Beaumont, Siegfried Lopez, Jo Martina ets. Siegfried Lopez lo ta e picher habridó kontra di Nos Tambe Por ku ta su èks ekipo. E otro weganan ta 11’or Los Amigos – Curacao Super Stars, 12.30 Pitufos – Lions, 2’or Jaws – Sluggers i 3.30’or Nos Tambe Por vs Baranka. Bar i kushina lo ta bon surtí. Kòrda ku ta trata di un torneo fundraising pa Nos Tambe Por haña fondo. Nos ta keda te aki pa awe. Te mayan ku Poder di Dios.
