The Champs di Glenn Pieternella a stòp ku Beisbòl Klase A
WILLEMSTAD- Notisia a kore e siman aki ku The Champs lo no partisipá na kampionato Klase A di Beisbòl. Deporte Kòrsou a tuma kontakto ku Glenn Pieternella ku ta doño i fundadó di e ekipo The Champs. Glenn a bisa nos ku e parti finansiero a hunga un ròl i dimes for di aña pasá ku FEBEKO a bisa ku ta 10 hungadó so di Klase A por subi, tambe a pisa. Glenn Pieternella: “ Mi a funda e ekipo The Champs den Klase A 7 aña pasá i despues nos a bini ku Hubenil tambe.
Mi a stòp ku partisipashon den Beisbòl na nivel di FEBEKO, debí ku mi no por sigi hinka mi sèn den e ekipo. Nos ta organisá fundraising aki i aya, pero esei no ta sufisiente pa kubri gastunan di e organisashon manera bala, bate di palu ku ta kibra ets. Simplemente nos no por mas, spònser a bira sumamente difísl pa haña. Mi ta bai purba si ku muchanan di 4 pa 12 aña. Na 2020 nos a gana Royals Magic den un promoshon di ekiponan di Klase A pa subi Dòbel A. Nos por a subi ku 10 hungadó so manera ma bisa kaba. The Champs no tabata na altura. E 20 otro hungadónan mester ta hungadó den Dòbel A kaba. E hungadónan no ta bini pornada. Ta kon nos ta hasi. The Champs ta wanta un ratu den Beisbòl Klase A i Hubenil.
Algun hungadó di ekipo The Champs Hubenil despues di wega na Tata Beamont Ballpark na Bonnam.
Rivelino Moesker: " Ami a bai laga Royals Magic promé ku temporada 2021 a terminá"
Willemstad- Deporte a papia ku èks dirigente di Royals Magic ku ta Rivelino Moesker. Royals Magic lo no partisipá na kampionato 2022 segun informashon ofishal di FEBEKO. Rivelino tabata manager algún aña di e ekipo Royals Magic. "E ekipo a kuminsá bon na 2019 i nos a haña Top Professional Cleaning komo spònser. Ami tabata manager i no doño di e ekipo. Despues di 2019 nos a laga algún hungadó bai pa drecha e tim pa e por kompetí mas mihó i tambe traha riba e komportashon pa e tim por tin un esfera bon.
Tim a drai bon den 2020 kual ku nos a klasifiká pa semi-final i despues kai vensi. Despues nos a bai hunga un seri di 7 kontra di The Champs i di un manera sorpresivo nos a kai vensí kontra di nan pa subi Dòbel A. 2021 tabata bayendo bon ku ami komo manager i e tim, pero despues mi a disidí di bandoná e tim dor di kosnan ku tabata tumando lugá. Mi a laga Roberly Puriel siqui ku e ekipo komo manager ora ku mi a bandoná e ekipo. Mi a komprondé ku despues di e kampionato sierto hungadó nan a bai otro organisashon. I esnan ku ta doño di e ekipo a skohe pa no siqui partisipá mas na kampionato 2022. Esei ta e parti dimi, pa mas detaye por buska kontakto ku Mel Francisca," Rivelino Moesker a bisa Deporte Korsou.
Fanátikonan di Deporte Korsou, bon dia. Awe nos tin varios informashon di Beisbòl Dòbel A òf mihó bisá Beisbòl riba nivel di FEBEKO. Djaluna riba nan pagina di Facebook, FEBEKO a publiká e lista di hungadónan ku ta liber. E lista tin 59 hungadó ku ta liber pa temporada 2022. Tin hungadó ku no a mira akshon at all i dimes nan lo ta liber. Nos a mira basta hungadó di kaliber manera Issachar Pereira (Firebirds) , Alex i Alexander Henrietta (Marchena Braves), Jonaikel Castro Arias (Groot Kwartier), Terrence Josephina (Wild Cats) i Geedion Jakob (Wild Cats). Risandro Pastor (Wild Cats), Jerryson Beaumont (Santa Rosa), Edmerson Cathalina (Santa Rosa), Ayrton Gijsbertha (Santa Rosa), Jordan Lucas (Santa Rosa), Marvin Ludowika i Quincy Ascencion (Santa Rosa). Den e sigiente alinea nos lo sigi ku mas hungadó di nòmber ku ta liber temporada 2022.
* * * * *
Mas hungadó estrea ku ta liber Roderick Bernadina, Curtney Doran, Terrence Goeloe, Dennis Gustina, Geriyon Jakob, Ramses Jamanika, Kevin Moesquit, Juruengelo Thielman, Gavanee Virginie, Shurandy Valeriano, tur di Royal Scorpions. Sherwenne Antersijn i Ruendy Carolina di Santa Maria. Ya varios di e hungadónan aki a firma, entre otro Geriyon Jakob di Wild Cats ku a djoin su ruman (Geedion) den Wild Cats. Tin vershon ku Ruderly Manuel a firma ku Wild Cats i ku Royal Scorpions a duna Ruderly su retiro pendiente algun kos mas ku mester keda reglá. Esei ta simplemente rumor naturalmente, pero nos ta pendiente pa kontakto ku dirigentenan di Royal Scorpions.
* * * * *
Ekiponan The Champs i Royals Magic (Suffisant) no ta bai partisipá na kampionato di Beisbòl Klase A. Ta trata di dos ekipo ku tin algun aña den e liga i ku a lanta ku intenshon di subi pa Dòbel A. Na 2020 The Champs a gana di Royals Magic den un semi promoshon i degradashon entre ekiponan di Klase A. Na momentu ku The Champs mester a subi, FEBEKO a rekordá nan ku mester reforsá ku 2/3 parti di hungadónan ku ya ta den Dòbel A. Dirigentenan di The Champs a opta pa legumai e asuntu di Dòbel A i a keda den Klase A. Nan no a logra bira kampion i den 2021 no tabatin e ‘dil’ di promoshon i degradashon pa ekiponan di Klase A subi. Dirigente mayo i fundadó di The Champs, sr. Glenn Pieternella ta un tiki desgustá ku FEBEKO i otro punto ta ku difísil pa haña spònser.
* * * * *
Wild Cats tin basta hungadó di kaliber ku ta bai bira liber, hungadónan manera Yurendell de Caster i Randy Kirindongo. Yurendell tei ku Wild Cats segun nos for di 2018. Na 2017, aña ku Wild Cats a sali kampion Yurendell tabata den Santa Maria Pirates. Na 2018 sorprendentemente Yurendell a bai Wild Cats i keda den Wild Cats te ku 2021. Dirigentenan di Wild Cats lo bai reuní ku Yurendell den e dianan benidero. Yurendell a drenta Wild Cats na 2018 i bira kampion bate. Randy Kirindongo ta un piesa klave di Wild Cats ku tin mas ku 10 aña den e ekipo. Randy Kirindongo lo keda ku Wild Cats sigur komo kètcher, batiadó designá i primera base. Yurendell por defendé tersera riba nivel haltu ainda, primera dimes i batiadó designá. Alexander Rodriguez ta stabil na primera pa Wild Cats, pero Alexander ta den plan di picheo tambe.
* * * * *
Varios hungadó ku a kaba Senior League i ta den Hubenil ta firmando e dianan aki. Mairoshendrik Martinus mester a firma e siman aki i ta pendiente pa firma entre otro Joshua leito. Den dianan benidero nos tin mas detaye di mas prospekto ku ta pendiente pa firma ku organisashon di Major League Baseball. Bèk pa Beisbòl Dòbel A, e lista di kaso 60 hungadó ku a sali e siman aki ta trata di hungadónan di Beisbòl Dòbel A i di Klase A. Tene kuenta ku tur hungadó di ekiponan The Champs i Royals Magic (Suffisant) ta liber. Dos ekipo ku tabata na rant di subi Dòbel A pa kampionato 2021. Den Slowpitch Liga 50, ekipo Pitufos ta armando un bòm pa 2022. Nan ta tirando liña den ekiponan grandi i establesé den Liga 50. Den Beisbòl Veterano ta di The Brothers so nos ta tende. Otro ekiponan ta riba un low profile. Nos ta keda te aki pa awe.
