Entregá di material nobo na direktivanan di Little League
WILLEMSTAD -Resientemente, RBC Royal Bank N.V. (RBC) a entregá material na representantenan di tur organisashon di Beisbòl Little League di Kòrsou (CLL). Tambe a entrega material otro spònsernan manera Gobièrnu di Kòrsou i Kenley Jansen.
Durante un enkuentro ku a tuma lugá na Mancamp di CRU, tur ekipo/organisashon di Little League a risibí diferente material pa por hunga i partisipá na training i weganan di Little League.
.Nan a risibí entre otro, outfit di kècher, wante di primera base, batting tee, L-screen, practice net, Jug di awa i kahanan di bala. RBC a koperá tambe ku mas di 500 unifòrm pa e ekiponan di Liga Pabou. Sharier Dorand, Branch Manager kende a representá RBC, a entregá e materialnan ariba menshoná den presensia di District Administrator Urny Floran i representantenan di ekiponan di CLL.
Dorand a dirigí palabra i a bisa: “Aña 2020/2021 ku tabata añanan fèrfelu pa e Mundu Deportivo, e añanan ei Beisbòl Little League no por a tuma lugá debí na Covid-19 i RBC den forma kreativo a entregá material na e liganan di Little League. A sigui ku e tradishon ei na 2022 i 2023.
E entrega di material ta konforme e kontrakt ku RBC ta firma ku liganan di Little League. Fuera e sostén finansiero komo parti di spònser prinsipal di e kampionato i liganan, RBC ta aportá na proyektonan manera klínika pa umpire, kongreso, upgrade di coachnan, dirigentenan i e hóbennan.”
Kenley Jansen i Errol Bishop tambe a dirigí palabra durante e entrega di material.
Ta pendiente pa entregá unifòrm na ekiponan di Liga Willemstad i Liga Pariba.
RBC ta hopi kontentu ku Gobièrnu di Kòrsou, Kenley Jansen i CTB a koperá ku e tradishon aki.
MAS INFORMASHON DI BEISBÒL I SÒFTBÒL
Fanátikonan di Deporte bon dia. Nos ta den gara di temporada di Karnaval, pero apesar di esei vários deporte lo start den e temporada di Karnaval aki i naturalmente lo tene kuenta ku e fechanan krusial entre otro Festival di Tumba i fechanan di marchanan di Karnaval. Torneo FABB a sigi den gran forma riba djabièrnè, djasabra i djadumingu pasá. Dia 8 di yanüari tabatin entrega di material di deporte na tur organisashon di Little League. Ke mèn, liganan Pariba, Pabou i Willemstad a risibí material serka RBC Royal Bank, Gobièrnu di Kòrsou i otro spònsernan pa medio di Curacao little League Foundation. Miéntras tantu Torneo FABB ta kulminá e wikènt aki i Liga Pabou ta sigi ku su kampionato wikènt benidero.
Resientemente nos a kombersá ku Roberto Emerenciana ku ta èks polis ku a traha na Boneiru i Kòrsou. Robert Emerenciana tabata coach di Xander Bogaerts tempu ku e tabata hunga Beisbòl na Boneiru añanan 2005, 2006 i 2007. Roberto a topa ku Xander na Tio Daou Ballpark djaweps 4 di yanüari. Tabata un enkuentro hopi emoshonal entre e dosnan aki. Xander mes a sali for di dugout di tersera base na Tio Daou Ballpark i bini dirèkt riba Roberto pa brasa su èks coach di tempu e tabata na Boneiru. Dimes Jair Bogaerts pia ohochi di Xander tambe a train serka e tim di Roberto ku tabatin komo coach Daddy Peterson, Lino Adoptie, Richard Molina i otronan. Naturalmente tur hende den tribuna a atmirá e manera ku Xander a bai serka su èks coach i duna esaki un brasa i bisa, esaki ta e hòmber di tempu na Boneiru. Great pa Roberto i Xander. Roberto ta penshonadó di polis i ta rumbo pa Boneiru bèk despues di mas ku 15 aña. Nos tin e pòtrèt di e momentu na Tio Daou Ballpark.
Ban pa Slowpitch. Ekiponan Nos Tambe Por, Los Amigos i Jaws a konfirmá nan partisipashon pa e sekshon di 60+ di Amstel Bright Premier Tournament. Falta un ekipo mas i ta Sluggers i Nos Power ta pèrtando pa drenta. E aña aki ta bai tin un kantidat rèkòrt di partisipante pa Amstel Bright Premier Tournament. Dimes e torneo lo dura mas largu ku mas partisipashon di ekiponan i mas wega. Pa inskripshon i mas informashon por tuma kontakto ku Pim Fangman na number 510-4835 i naturalmente por manda app tambe.
Djabièrnè 5 di yanüari tabata e último dia di e klínikanan den kuadro di Curacao Baseball Week. Masha hopi mucha di T-ball i Pre Minor 5,6,7 i 8 aña tabata presente na Didi Deeds Field na Terra Corra. Dusty Baker tabata presente i un gran dirigente di Beisbòl di tur tempu, hòmber grandi di Little League tempu di su tempu, Jose Cijntje sr. di 88 aña tambe tabata presente pa kombersá un ratu ku Dusty Baker. Jose Cijntje ta gran fanátiko di San Francisco Giants i Dusty Baker. E hóbennan presente a disfrutá i gosa un bòl. Jose Cijntje ta èks presidente di Little League i hòmber di Beisbòl riba tereno atministrativo pa hopi aña. Jose Cijntje tabata presidente di Fundashon Drecha Kas tambe i ta tata di Jopito Cijntje hungadó di Swift, Jandoret Raiders, Bou di Palu i otro ekiponan. Jopito èks piloto di ALM, Air ALM i Insel Air ta bula avion na Djakarta ku ta leu aya na Lejano Oriente.
Jopito a konta nos basta kos di tempu di Ritz, Malta Amstel i Winston ku ta ekiponan Little, Senior i Hubenil di Frank Curiel. E tempu ei Jopito a konta nos ku ta Creme de la Creme tabata di Santa Maria manera entre otro Ron Stewart, Ludwig Jakoba, Jacky Jakoba, Richie Jakoba, Nelly Jakoba, Renato Anasagasti (Hubenil) Gerschwin Leuteria, Sor Moesquit, Son Sofia ets. Frank Curiel tabatin un stationwagen Toyota Corona i ta den e outo ei tur hungadó tabata bai i pa kolmo e outo no tabatin reverse. Sor Moesquit na edat hóben ratu ratu tabata presente ku un pick up i kos di bebe i kome pa medio di spònser Kenneth Moesquit. Hopi historia ruman. Nos a risibí un pòrtrèt di un final entre Winston Santa Maria i Eddine di Banda Ariba ku Yeto Francinet nan aki komo picher di Eddine. Nos ta keda te aki pa awe. Te mayan ku Poder di Dios.
%20copy.jpg)
