Entrevista ku Johnny Balentina manager nobo di Wild Cats

Entrevista ku Johnny Balentina manager nobo di Wild Cats

WILLEMSTAD- Johnny Balentina ta kla pa e reto di manager di e ekipo di Wild Cats nivel Dòbel A pa temporada 2024.  Na final di desèmber despues di aserkamentu di Fredje Gomez i spònser Kenley Jansen, Johnny Balentina a aseptá e reto pa dirigí Wild Cats na 2024. Den pasado, pa ta mas eksakto añanan 2015 pa 2018, Johnny a dirigí Wild Cats i logra dos título di kampion Dòbel A. Djaweps 4 di yanüari nos a topa Johnny Balentina durante klínika na Curacao Baseball Week na Tio Daou i nos a kombersá. A papia solamente riba Johnny su aktuashon komo hungadó i manager na Kòrsou den Beisbòl Dòbel A.

“Komo hungadó mi no a hunga hopi na Kòrsou den Dòbel A. 2003 ma reforsá Santa Maria, 2004 mi tabata pa keda Kòrsou, pero ma haña kontrakt na Hulanda i mi a bai hunga aya. Asina ma keda bai bini i ma kibra mi enkel den Tio Daou Ballpark den un final aki na Kòrsou. Na 2010, 2011 i 2012 mi tabata manager di Royal Scorpions i a bira kampion 2011 i 2012. 2013 mi tabatin solamente selekshon . Na 2013 parando pafó den stadion di Rif mi a bisa ku mi ta gusta e manera ku Groot Kwartier Stars ta hunga bala i ku e gainan yòng ku tin hopi spit.

Mi a haña un yamada di Gordo van Zanten dirigente di Groot Kwartier mas di fin di aña. Nos a klasifiká den e promé 4-nan i bai 5 wega den e seri semi-final ku Wild Cats pone Feco nan aki na kareda ku sòpi i yen di kos.  Na momentu ku 2014 a kaba mi no tabata pa bai niun otro tim, nos a logra loke nos tabata ke, pero ora nos a kuminsá papia riba tene algun hungadó i traha riba un farm system pa nos keda kompetitivo, debi ku mi ke keda hunga play-off kos a pega. Mi tabata ke  pa buska hungadó bon pa wanta i traha riba e farm system pa nan por bin take over.   Akinan hungadónan a kuminsá bai i ma pèrdè 2 pa 3 hungadó klave.

Einan Kenley Jansen di Wild Cats a aserká mi, anto na e momentu ei ma tuma e desishon i bai Wild Cats i keda na 2015, 2016, 2017 i 2018. Einan ma disidí di stòp ku Beisbòl i disfrutá di otro kosnan den bida.  2020 Mompy van Gurp di Royal Scorpions a aserká mi pa mi bin yuda, debí ku e tin ku bai afó.  Ma yuda un ratu i ela bolbe pidi na 2021, 2022 i 2023 pa yuda Royal Scorpions komo entrenadó, coach i ku Mompy komo manager.

‍

Despues di e temporada 2023 algun tim a aserká mi. Entre otro Santa Maria i ta einan mi kier a bai, pero dor ku negosashonnan a tarda i mi no ta tende nada mas, e kos a muri i otro timnan ta bezig. Archie Jansen i Fredje Gomez a keda papia ku mi. Fredje a bisa mi ku e ta bin serka mi na kas pa mustra mi algu i nèt ora ela yega Kenley Jansen a yama manera un kos planiá i einan mi a tuma dén. Ma bisa nan laga mi bisa Santa Maria ku mi ta bai ku Wild Cats promé mi konfirmá ku nan i asina e kos a bai. Despues di dos dia ma bisa Santa Maria ku e kos no ta bira nada, debí ku e kosnan no a bai manera mester ta. Mi a tuma desishon di bai Wild Cats.

Mi a kuminsá papia ku dirigentenan di Wild Cats. E tim ta keda kasi meskos i lo no tin masha kambio, pero plan ta pa e hóbennan haña mas chèns i pa nan tuma over. Lo bai fuerte den picher yòng, hungadónan yòng.  Hubenil pa e muchanan hunga regular eibou por desaroyá i hunga bala eibou i hunganan weganan den Dòbel A pa nan por tuma over.  Nos lo bai traha duru despues di temporada di Karnaval. Klasifiká number 1 no ta importante, pero klasifiká den e promé 4 nan ta hopi importante. Den kuminsamentu di mart lo start ku training, probablemente lo start medio mei ku kampionato. Lo mi kuminsá 6 pa 8 siman, bati den cage, front toss, side toss”, Johnny Balentina a konta Deporte Korsou Deport djaweps na Tio Daou Ballpark.

‍

‍

MAS INFORMASHON DI BEISBÒL I SÒFTBÒL

Lesadónan di Deporte Korsou Inning, bon dia. Djabièrnè tabatin apertura di Torneo FABB na Van Engelen Ballpark. E torneo di kategoría Minor i Little League lo dura 3 wikènt. Pa e último wikènt 4 ekipo di Aruba lo ta presente na Van Engelen Ballpark pa lucha pa e título manera ya a bira un tradishon. Pa hopi aña kaba ekiponan di Aruba ta djòin e torneo den e parti final. Curacao Baseball Week a terminá ku e parti di klínika ayera na Didi Deeds Park na Terra Corra. Deporte Korsou tabata presente atrobe i a saka varios pòrtrèt. Ayera tabatin Homerun Derby kaminda Mairoshendrick Martinus i djasabra a terminá ku Celebrity Golf Tournament na Old Quarry aya na Santa Barbara.

‍

Awe nos tin entrevista ku Johnny Balentina, manager nobo di Wild Cats. Den pasado Johnny tabata manager kaba di ekipo Wild Cats. Esei tabata di 2015 pa 2018 kaminda Johnny a logra dos título ku e ekipo. Tabata na 2016 i 2017 ku Johnny a logra bira kampion komo manager di Wild Cats. Nos no a papia ku Johnny riba su ekperensia i karera na Hulanda. Nos lo yena sigur dos página aki na Extra.  Johnny a hunga 3 Olimpiada ku selekshon di Hulanda i World Baseball Classic. Johnny a gana masha hopi título Oropeo ku selekshon di Hulanda. Segun nos Johnny a logra 6 título Oropeo komo miembro di selekshon di Hulanda.

Moveshonnan den Beisbòl Veterano ta realmente ketu. Djaweps nos a papia ku Ringemar Raap ku lo ta den Yesterday pa 2024. Aña pasá Ringermar por a bai nèt un wega ku Yesterday pa e ekipo klasifiká komo number 6. Ringemar no a hunga e wega ei, pero su ekipo a klasifiká lagando The Brothers den tereno. Vários hungadó ku tin nèt 40 aña lo ta rumbo pa ekipo Yesterday ku tin Andley Simmons komo un dje lidernan. Manera nos a anunsiá tin indikashon ku ekiponan Vosama i The Brothers no ta bai kampionato 2024. Vosama a anunsiá esaki pa medio di un komunikado. Di The Brothers ta rumor i pa loke ta Marchena Braves tin moveshonnan pa e ekipo aki partisipá tòg na kampionato 2024. Na 2019 e ekipo aki a keda fundá pa Ruisandro Cijntje i Evans Schoop.

Ekipo Isla Crackers tambe ta moviendo duru pa bini fuerte atrobe. Temporada 2023 ekipo Isla a terminá komo number 3 di kampionato regular i a kai vensí kontra e number 2 ku ta Santa Rosa den play-off.  Nos ta kòrda na 2017 ekipo Isla Crackers a kita un grandi for di Santa Rosa Memories. Na e okashon ei nan a bai ku Julius Veeris. Na 2015 i 2016 Isla Crackers a kai vensí kontra Jandoret Raiders dos aña sigi den final i a buska Julius Veeris pa reforsá picheo, bateo i outfield. Emerick Agatha tambe a bai Isla e aña ei pa despues bai bèk Santa Maria den Beisbòl Veterano. Erling Gosepa ku despues a hunga den Santa Maria i awor ta den Jandoret, tambe tabata ku Isla Crackers añanan 2015 i 2016.

Emerick Agatha un dje grandinan di Little League di tur tempu di Frank Curiel huntu ku Skippy Sambonan aki den Santa Maria. Saludo pa Jopito Cijntje ku ta leu aya na Mediano Oriente trahado komo piloto. Un hungadó ku a hunga Little, Senior i Hubenil ku Santa Maria. Hungadó di Swift, Bou di Palu i ketu bai pendiente di Jandoret Raiders pa ora e yega e drenta akshon, manera a pasa algun aña pasá durante Torneo Amstel Bright. Resientemente nos a haña un pòtrèt di Jopito Cijntje ku a hunga ku e grandinan di Santa Maria Little League tempu di Ritz den Senior League, Malta Amstel i Winston den Hubenil.  Hungadónan manera Jacky Jacoba (QEPD), Sor Moesquit, Gerschwin Leuteria, Jopito Cijntje (mes) Song Sofia, Randall Seferina (tata di Darren Seferina), Ramon Rosales, Ray i Mac Cijntje (èks parlamentario). Esei tabata aña 1974/1975 den Senior League.

Mac Cijntje (parlamentario) tabata tremendo picher mes for di Little League te Hubenil parse, sin pèrdè niun wega. Anke hopi ta bisa ku ela pèrdè un wega kaminda Orlando De Caster mester a dal Mac Cijntje aki un homerun. Orlando De Caster tabata konosí pa un hungadó ku kurpa grandi for di chiki,  ku un poder deskomunal.   Biniendo bèk riba e ekiponan di Santa Maria, tabatin den e tim ei tambe Charlie Cijntje i Richi Jakoba nan aki, ku despues a keda evaluá òf a move for di 18 aña òf promé pa Dòbel A.  Te mayan ku Poder di Dios.

‍