Fanátiko Kòrsou mester di bo awe 7’or den Stadion Ergilio Hato
WILLEMSTAD- Selekshon di futbòl di Kòrsou mester di apoyo di fanátikonan pa pasa pa e sigiente buelta. Nos a pèrdè 2-1 so kontra di Panama na Panama djasabra último. Un viktoria di 1-0 of mas amplio awenochi ta pone ku Kòrsou lo klasifiká pa bai huntu ku e 8 grandinan di CONCACAF.
KOMUNIKADO FFK
Nos selekshon nashonal ta klá ku preparashonnan pa nos próksimo partido kontra Panama awe 15 di yüni próksimo den Stadion Ergilio Hato pa 7’or di anochi.
Lamentabelmente nos a pèrdè nos promé partido kontra Panama ku skor di 2-1 di kual Rangelo Janga tabata e outor di nos úniko gol. Djadumingu den oranan di mardugá nos selekshon a yega Kòrsou pa nos segundo enkuentro kontra Panama. Despues di a sosegá, nos selekshon a pasa na santana di Santa Maria pa hasi un bishita na e graf di defuntu Jarzinho Pieter ku tabata forma parti di nos selekshon. Djadumingu i djaluna a kontinuá ku un seshon training den Stadion Ergilio Hato komo preparashon pa nos partido di awe.
Pa asistí na wega e bishitante mester ta kompletamente bakuná (2 bes) i e di 2 bakuna mester ta hasí promé ku promé di yüni 2021. Pa e bishitante ku no ta bakuná, ta pidi pa trese resultado di e tèst di antigen no mas bieu ku 24 ora promé ku e wega. Muchanan bou di 16 aña no mester hasi tèst di antigen. E bishitante mester presentá na wega ku su sédula i su karchi di bakunashon òf resultado di e tèst di antigen.
No lubidá di yena e parti di karchi pa registrashon i tapaboka ta obligatorio!
E partido di djamars lo bai ta unu desisivo, nos selekshon mester di e apoyo i sosten di hinter pueblo di Kòrsou pa huntu den union nos logra e viktoria!
