Ekselente notisia durante ‘Juegos Bolivarianos 2025’
FDOK a firma un MoU ku komité Olímpiko di Perú
LIMA – Ku hopi orguyo I plaser nos por anunsiá ku FDOK ofisialmente a firma un Memorandum of Understanding ( MoU ) ku Komité Olímpiko di Perú.
E akuerdo aki, ku a keda firmá pa Renzo Manyari ( Presidente Komité Olímpiko di Peru), Christine Dania (Presidente di FDOK) I Sophiyene Merien (sekretario general di FDOK), ta marka un paso importante den establesé un koperashon deportivo ku enfoke riba e siguiente puntonan di atenshon.
- Promoshon pa desaroyo di nos atletanan.
- Fortalesé oportunidatnan pa partisipá na strukturanan deportivo internashonal.
- Enkurashá interkambionan kultural entre e dos paisnan.
- Mehorá kapasidat I kolaborashon organisatorio.
E kolaborashon aki ta reflehá nos kompromiso kompartí pa avansá den deporte pa ekselensia, kreando oportunidatnan nobo I úniko pa nos atletanan, I formando kompromisonan internashonal mas profundo.
Mirando pa dilanti riba un kolaborashon fruktífero I di inspirashon.
Mashá pabien Kòrsou.
‘XX Juegos Bolivarianos Ayacucho-Lima 2025’
*Kòrsou ta keda sorprendí pa Ecuador den beisbòl*
LIMA – Djamars 02 di desèmber e kompetensia di beisbòl, bálido pa Juegos Bolivarianos 2025, a kontinuá ku un enkuentro kaminda e selekshon di Ecuador ta sorprendé e selekshon di Kòrsou.
E selekshon ekuatoriano ta sorprendé Kòrsou I ta logra un viktoria ku skor pèrtá di 10 pa 9. Kòrsou a pika dilanti 4 pa nada den promé entrada, pero no por a wanta e bentaha I finalmente ta kai vensí pa diferensia di 1 kareda.
Pa loke ta e sifranan final, Ecuador ta gana ku 10 kareda, 11 hit I 1 eror, miéntras ku Kòrsou ta pèrdè ku 9 kareda, 7 hit I 3 eror. Ku e derota di awe mainta Kòrsou tin rèkert negativo awor di 1 ganá I 2 pèrdí.
E derota aki sigur ta hasi hopi doló pa nos selekshon I ta pone ku Kòrsou awor ta den un posishon bastante difísil konsiderando ku nan ta obligá na gana di Venezuela awe tardi 4’or I konfia riba otro viktoria kontra di Colombia mañan ku Dios ke, si nan ke logra klasifiká pa playoff.
‘XX Juegos Bolivarianos Ayacucho-Lima 2025’
*ODEBO kontentu ku trabou di Michael Arvelo na Perú*
LIMA – ‘Juegos Bolivarianos 2025’ a yega su fin pa lokual ta trata e disiplina di biar I nos refri internashonal di biar, Michael Arvelo, a kumpli ku otro gran tarea di dirigí den un evento grandi I di siklo olímpiko.
Sinku dia di trabou duru ku a inisiá dia 28 di novèmber I a finalisá dia 2 di desèmber. Tur dia inisiando for di mitar di nuebe di mainta I konkluyendo despues di 9’or di anochi.
Mester bisa ku e organisadó ODEBO ta sumamente kontentu ku e trabou ehekutá pa Arvelo. Di e forma aki tambe Michael Arvelo ta sera aña den un evento úniko pa e área di Sur Amérika. Otro éksito mas pa nos rèfri internashonal di biar. Pero trabou no a kaba, ya Michael ta preparando pa 2026.
Riba e potrèt por mira Michael Arvelo sintá di dos na e mesa tékniko, huntu ku su asistente Byron Ledesma di Perú, promé na mesa, e direktor deportivo Roberto Molina, di tres na mesa, I su asistente.
