FDOK a honra baluartenan Wowo Constancia Frank Hoyer Cheo Zimmerman Gilbert Merien i nos tin nan kuríkulo kòrtiku
WILLEMSTAD -Durante e honors Night ku a tuma lugà dia 6 di aprel na WTC, FDOK a honra 4 baluarte ku ta Virgilio ‘Wowo’ Constancia, Frank Hoyer, Gilbert Merien i Marcelo’Cheo’ Zimmerman. E baluartenan menshoná tabata presente e anochi i a subi tarima pa risibí nan plakat di merito. Nos tin e kuríkulo kórtiku di e baluartenan menshoná.
HOMENAGE NA BALUARTENAN
Baluarte Nr. 1
VIRGILIO CONSTANCIA
Virgilio “Wowo” Constancia (7-09-1939) komo mucha a kuminsá hunga futbòl i tabata na edat di 20 aña ku el a pasa pa Jong Colombia kaminda el a konta ku un karera hopi éksitoso. Den e ekipo saminero el a hunga na diferente posishon.
Na numeroso okashon Wowo Constancia a forma parti di tantu selekshon di Kòrsou komo tambe di Antia Hulandes. E tabata den e ekipo nashonal ku na 1963 a finalisá na di tres puesto den zona Karibe di CONCACAF.
Komo hungadó saminero, Wowo Constancia sigur na 7 okashon a titulá kampion di Kòrsou, tambe el a festehá ku 4 título antiano i un título Karibense. Despues di esei el a bira trainer di Jong Colombia i na e funshon ei tambe el a keda koroná komo kampion di Kòrsou, kampion antiano i un sup kampionato den sekshon Karibe di CONCACAF.
Baluarte Nr. 2
FRANK DEL ROSARIO HOYER
Frank Hoyer (31-10-1924), siudadano konosí durante hopi dékada di aktividat den tènis. Pero ademas di tènis, el a hunga futbòl, basketbòl i atletismo. Na edat di 8 aña Frank a kuminsá praktiká tènis serka su tio Horacio Hoyer na La Fama Tennis Club, den bario di Cher Asile. Durante di su karera komo hungadó, Frank a biaha rònt Karibe den representashon di Kòrsou i Antia Hulandes.
Di 1938 pa 2006 el a figurá prominente den tènis, sea komo hungadó i/òf dirigente den vários organisashon. Riba nivel internashonal, entre otro e tabata den e organisashon di International Marlboro Tennis Tournament i tambe komishon di Torneo Internashonal Kopa Iyo Pimentel.
Baluarte Nr. 3
GILBERT PRUDENCIO MERIEN
Gilbert “Gibi” Merien (28-04-1947) a konta ku un karera kòrtiku pero hopi eksitoso den beisbòl lokal, komo pitcher dje ekipo Blue Hawks. Gibi a kuminsá den beisbòl na edat di 13 aña den área di Rif. Na un prinsipio e tabata hunga ku team di bario i ku esaki a bai rònt Kòrsou, te ora ku den 1963 nan a tuma inisiativa pa lanta Blue Hawks.
E team a hunga un aña so den Klase A, promové dirèkt pa ‘AA’ ku Gibi komo e “Sandy Koufax”, un pitcher sumamente popular e tempu ei di Los Angeles Dodgers. Gibi tabata skucha wega di MLB na radio, prinsipalmente di Dodgers i segun komentarionan relashoná ku Sandy Koufax su movishon komo pitcher e tabata imaginá esei i tresé den práktika, por sierto ku hopi éksito. Gibi tabata rei di ponche, pero debí na leshon su karera tabata di durashon kòrtiku.
Baluarte Nr. 4
MARCELO LUCIANO ZIMMERMAN
Marcelo “Cheo” Zimmerman (25-06-1966) a hasi un karera den bòkseo, ademas di tabata aktivo den mini futbòl i dart.
Ku 14 aña di edat el kuminsá train bòkseo na Boca Boxing Club.
Sinku aña despues el a sigui training na “Instituto Nacional de Boxeo” na Venezuela pa despues e debutá komo profeshonal.
Durante di su karera largu te ku su 40 aña, Cheo e.o. a gana título di Antia, Reino Hulandes, título di Karibe i Interamerikano den kategoria Super Mediano.
Komo profeshonal el a konta ku rèkert di 24 viktoria i 3 derota.
Despues di a kologá su glùpsnan el a kuminsá train hóbennan ku tin e pashon pa bòkseo.
