FDOK a nombra un direktiva nobo, ku Christine Dania komo presidente
Willemstad - Durante e elekshon di Federashon Deporte i Olímpiko di Kòrsou (FDOK) ku a tuma lugá dia 30 di yüni na Marjorie's Place na Kòrsou, un direktiva nobo a ser formá. Den presensia di un total di 23 miembro ku tin derecho pa vota, vários kandidato a presentá nan mes, di kual kuater pa e posishon di presidente: Christine Dania, Ruthsel Martina, Franklin Mathilda i Jurgen Faneyt.
Ku un mayoria konvisente di 18 voto, a skohe i nombra Christine Dania komo presidente di FDOK. Un kandidato, sr. Paulus Berkenveld a postulá su mes pa visepresidente i a nombr’é direktamente. Tambe tabatin seis kandidato pa e posishon di komisario: Sophyène Merien, Sherry Howell, Aishel Richardson, Nelson Maria, Alexander Makaja i Clifton Agata.
Despues ku dos èks miembro di e direktiva anterior, Nelson Maria i Aishel Richardson a retirá nan kandidatura, a forma e direktiva nobo ofisialmente via aklamashon.
Bou di liderato di Christine Dania, FDOK lo pone e atleta sentral. Segun Dania: “Atletanan mester ta e kurason di nos organisashon. Dor di brasa inovashon i traha di forma aktivo huntu ku diferente ‘stakeholder’ nos lo traha riba un ambiente deportivo fuerte na Kòrsou. Esei ta mi promesa.”
Un di e promé paso nan ku Dania ke tuma komo presidente ta prepará un plan stratégiko, den kolaborashon ku e diferente federashon, alabes konsiderando otro ‘stakeholder’ nan. E plan aki lo duna direkshon firme pa desaroyo riba área di deporte na Kòrsou.
FDOK tin konfiansa den un kapítulo nobo ku ta pone desaroyo di deporte, inovashon, kolaborashon i progreso na promé lugá. Un era nobo pa deporte na Kòrsou!
